Абдурасул Ҳоҷиев, духтур-ҷарроҳи Маркази шаҳрии ёрии таъҷилии тиббӣ барои бе зарурат таъин ва гузаронидани доруи “Лидаза” ба Севинч Шукуроваи 17-сола, ки боиси марги ахирӣ шудааст, боздошт ва алайҳи ӯ бо ҷурми “номатлуб иҷро гардидани вазифаи касбӣ, ки боиси марги шахс шудааст” парвандаи ҷиноятӣ боз гардидааст.

Дар ин бора Додситонии шаҳри Душанбе хабар медиҳад.

Ин ниҳод дар вакуниш ба муроҷиати кушоди Шоира Зуҳурова, модари Севинч Шукурова, ки дар шабакаҳои иҷтимоӣ нашр шуд, навиштааст, ҳодисаи марги ӯ, ки рӯзи 8-уми апрел рух додааст, аз ҷониби ин ниҳод, мавриди санҷиш қарор дода шуда, баъди ташхиси комиссиони судӣ-тиббӣ маълум гардид, ки “сабаби марги ноболиғ Шукурова С. пайдо шудани садамаи анафилактикӣ аз маҳлули дорувории “Лидаза” буда, ки аз ҷониби духтур-ҷарроҳ Ҳоҷиев Абдурасул Муҳамадиевич бе зарурият таъин ва гузаронида шудааст”.

“Дар натиҷаи номатлуб иҷро намудани вазифаҳои касбӣ аз ҷониби духтур-ҷарроҳ Ҳоҷиев А.М. ҳолати ноболиғ Шукурова С. вазнин гардида, номбурда фавтидааст”, – омадааст дар иттилоияи Додситонии шаҳри Душанбе.

Ин ниҳод гуфтааст, дар робита ба ҳодисаи мазкур рӯзи 16-уми майи соли 2023 аз ҷониби Додситонии ноҳияи Исмоили Сомонии шаҳри Душанбе нисбати Абдурасул Ҳоҷиев барои “аз ҷониби корманди тиб номатлуб иҷро гардидани вазифаи касбӣ, ки боиси марги шахс гаридааст” (моддаи 129 қисми 2-и КҶ Ҷумҳурии Тоҷикистон) парвандаи ҷиноятӣ оғоз гардида, нисбаташ чораи пешгирӣ дар намуди ба ҳабс гирифтан татбиқ карда шуд.

Ин банди қонунгузорӣ, аз панҷ то ҳашт соли зиндонро пешбинӣ мекунад.

Додситонии пойтахт гуфтааст, тафтиши пешакии парвандаи ҷиноятӣ идома дорад.

Ёдовар мешавем, ки муроҷиати Шоира Зуҳурова, як сокини шаҳри Душанбе ба Рустами Эмомалӣ, шаҳрдори пойтахт ва раиси Маҷлиси миллии Маҷлиси Олӣ ва Озода Эмомалӣ, роҳбари Дастгоҳи иҷроияи Президенти Тоҷикистон дар пайи марги духтараш Севинч Шукурова дар шабакаҳои иҷтимоӣ баҳси зиёдро барангехт. Ин модар дар муроҷиати худ даъво кардааст, ки духтари 17-солааш бо сабаби саҳлангорӣ ё хунукназарии духтури Маркази ёрии таъҷилии шаҳри Душанбе ба ҳалокат расидааст.

“Духтурам ягон беморӣ надошт ва танҳо баъди таъин ва гузаронидани маҳлули “Лидаза” аз ҷониби духтур Абдурасул Ҳоҷиев ҳоли ӯ якбора бад шуда, дертар ба ҳалокат расид”, – гуфтааст ин зан.

Маврид ба зикр аст, ки ин ягона ҳолати марги нафаре бинобар хунукназарии духтур намебошад. Қаблан низ чанд табиб барои хунукназарӣ боздошт ва нисбаташон парвандаҳои ҷиноятӣ боз шуда буд.