ဆွီဒင်နိုင်ငံမြို့တော် စတော့ဟုမ်းမှာ ကိုဗစ်-၁၉ကပ်ရောဂါဖြစ်ပွားပြီးနောက် ပထမဆုံး လူကိုယ်တိုင် တက်ရောက်နိုင်တဲ့ နိုဘယ်ဆုချီးမြှင့်ပွဲကို  ဒီဇင်ဘာ ၁၀ ရက်က ခမ်းခမ်းနားနား  ပြန်လည် ကျင်းပခဲ့ပါတယ်။

ဒီအခမ်းအနားမှာ ၂၀၂၀ ခုနှစ်နဲ့ ၂၀၂၁ ခုနှစ်က နိုဘယ်ဆုရရှိသူတွေလည်း တက်ရောက်လာကြတာပါ။

မနှစ်က ဆုပေးပွဲအခမ်းအနားရှိပေမယ့် နိုဘယ်ဆုရရှိသူတွေက မိခင်နိုင်ငံမှာသာ ဆုလက်ခံ ရယူ ခဲ့ရတာကြောင့် ဒီနှစ်ကျမှ အခမ်းအနားကို  ကိုယ်တိုင်ကိုယ်ကျ တက်ရောက် လာကြတာလည်း ဖြစ်ပါတယ်။

နိုဘယ်ဆု ၆ ဆုထဲက အမျိုးအစား ၅ ခုကို ဆွီဒင်နိုင်ငံ၊ စတော့ဟုမ်းမြို့မှာ နှစ်စဉ်ဆုချီးမြှင့်လေ့ ရှိပြီး  ငြိမ်းချမ်းရေး နိုဘယ်ဆုကိုတော့  နော်ဝေနိုင်ငံ၊ အော်စလိုမြို့မှာ သီးခြားအခမ်းအနားနဲ့  ဒီဇင်ဘာ ၁၀ ရက်မှာပဲ ကျင်းပပါတယ်။ 

ဘဏ်တွေကျရှုံးမှုကြောင့် ပိုမိုနက်ရှိုင်းတဲ့ စီးပွားရေးပျက်ကပ်တွေ ဖြစ်လာစေနိုင်တဲ့အပေါ် ဘယ်လို ရပ်တန့်တွန်းလှန်ရမလဲဆိုတဲ့ သုတေသနစာတမ်းအတွက် စီးပွားရေးပညာရှင်တွေဖြစ်တဲ့ ဒေါက်ဂလပ်စ် ဒိုင်းမွန်းနဲ့ ဖီးလစ်ပ်ဒစ်ဗစ်ဂ်တို့နဲ့အတူ အမေရိကန်ဗဟိုဘဏ်ဥက္ကဋ္ဌဟောင်း ဘန်း ဘာနန်ကီက စီးပွားရေးဆိုင်ရာ နိုဘယ်ဆုကို ပူးတွဲရရှိခဲ့ပါတယ်။   

သိပ္ပံပညာရှင် ကယ်ရိုလင်းဘာ့တ်တိုဇီ၊ မော်တန်မယ်လ်ဒယ်လ်နဲ့ ဘယ်ရီရှပ်လက်စ်တို့က ဆဲလ်ဇီဝဗေဒ အတွင်းသဘောကို ထိုထွင်းသိမြင်နိုင်ပြီး ဒြပ်ပေါင်းအသစ်တွေ ပေါ်ပေါက်လာဖို့ မော်လီကျူးအချင်းချင်း ပေါင်းစပ်မှုကို ခွင့်ပြုတဲ့ တုံ့ပြန်ချက်ကို ရှာဖွေတွေ့ရှိခဲ့တာကြောင့် ဓာတုဗေဒဆိုင်ရာ နိုဘယ်ဆုကို ပူးတွဲ ရရှိခဲ့ပါတယ်။ 

ရှပ်လက်စ်ကတော့ နိုဘယ်ဆု ၂ ကြိမ်ရရှိထားတဲ့ ထိပ်ထိန်းသိပ္ပံပညာရှင်အစုအဝေးမှာ ပါဝင်လာပါတယ်။ 

နောက်ထပ်သိပ္ပံပညာရှင် အလန်းအက်စ်စပတ်၊ ဂျွန်ကလော်ဆာနဲ့ အန်တွန်ဇိုင်လင်ဂါတို့က ခရစ်ပ်တိုဂရပ်ဖီနဲ့ ကွန်ပျူတာနည်းပညာတို့မှာ အလျင်အမြန်တိုးတက်နေတဲ့ အက်ပလီကေးရှင်း အသစ်တွေအတွက် အခြေခံအုတ်မြစ်ချပေးနိုင်တဲ့ ကွမ်တမ်မက္ကန်းနစ်ဆိုင်ရာ စမ်းသပ်မှုကြောင့် ရူပဗေဒဆိုင်ရာ နိုဘယ်လ်ဆိုကို ပူးတွဲဆွတ်ခူးနိုင်ခဲ့တာပါ။ 

ဆွီဒင်မျိုးရိုးဗီဇပညာရှင် စဗန်တေး ပေ့ဘိုကတော့ လူသားသမိုင်းအစက မျိုးသုဉ်း ပျောက်ကွယ်သွားတဲ့ ဘိုဘေးဘီဘင်တွေကတဆင့် ယနေ့ခေတ်လူသားတွေအဖြစ် ဆင့်ကဲ ပြောင်းလဲလာတဲ့ နားလည်သိရှိမှုကို ပိုမိုခိုင်မာစေတဲ့ ရှာဖွေ့တွေ့ရှိချက်တွေကြောင့် ဆေးပညာဆိုင်ရာ နိုဘယ်ဆုကို ရရှိခဲ့တာပါ။

ပြင်သစ်စာရေးဆရာမကြီး အန်နီ အာနို ကတော့ ကိုယ်တိုင်ရေးအတ္ထုပတ္တိစာအုပ်တွေမှာ မိမိမှတ်ဉာဏ်နဲ့ လူမှု မညီမျှတွေကို လေ့လာဆန်းစစ်ထားတာကြောင့် ဒါဟာ "ရဲရင့်မှုနဲ့ လက်တွေ့ကျတဲ့ ထိုးထွင်းအသိဉာဏ် " တို့အတွက် စာပေဆိုင်ရာ နိုဘယ်ဆုကို ရရှိခဲ့တာပါ။ 

နိုဘယ်ဆုပေးပွဲ အခမ်းအနားအပြီး စတော့ဟုမ်းမြို့တော်ခန်းမမှာ ကျင်းပတဲ့ ဂုဏ်ပြုညစာစားပွဲကို ဆွီဒင်တော်ဝင်မိသားစုနဲ့အတူ အစိုးရတာဝန်ရှိသူတွေ၊ နိုင်ငံအသီးသီးက စီပွားရေး ခေါင်းဆောင်တွေနဲ့ ဂုဏ်သရေရှိလူကြီးမင်းတွေလည်း တက်ရောက်လာခဲ့ကြပါတယ်။