ဟောင်ကောင်ကိုဝင်ရောက်လာတဲ့ ခရီးသွားတွေဟာ အစိုးရက သတ်မှတ်ထားတဲ့ ကိုဗစ်-၁၉ မိုဘိုင်းလ်အပလီကေးရှင်းကိုလည်း အသုံးပြုစရာ မလိုတော့ကြောင်း အမှုဆောင်အရာရှိချုပ် ဂျွန်လီက ဒီဇင်ဘာ ၁၃ ရက်မှာ ပြောပါတယ်။

ကမ္ဘာ့နေရာအများစုမှာ ကိုဗစ်-၁၉ ဆိုင်ရာ ကန့်သတ်ချက်တွေ လျှော့ချလာပြီးနောက်မှာ ကမ္ဘာ့ဘဏ္ဍာရေးအချက်အချာ ဟောင်ကောင်မှာလည်း ခရီးသွားလာမှုနဲ့ စီပွားရေးလုပ်ငန်းတွေ ပြန်လည်စတင်မှုအပေါ် အရှိန်မြှင့်လုပ်ဆောင်ဖို့ ရည်ရွယ်ပြီး ဒီကန့်သတ်ချက်တွေကို ပိုမိုဖြေလျှော့တဲ့သတင်း ထွက်ပေါ်လာတာဖြစ်ပါတယ်။

တရုတ်ပြည်မကြီးက ကိုဗစ်ဆိုင်ရာ လိုအပ်ချက်တွေကို ဖြေလျှော့လိုက်ပြီးနောက်မှာ စားသောက်ဆိုင်တွေ၊ အားကစားခန်းမတွေ၊ ကလပ်တွေ၊ အလှပြင်ဆိုင်တွေမှာ အသွားအလာကို အခြေခံပြီး ဝင်ရောက်ခွင့် ထိန်းချုပ်ထားတဲ့ ဖုန်းအက်ပလီကေးရှင်းကိုပါ အစိုးရက ဖျက်သိမ်းခဲ့ပါတယ်။

စီးပွားရေးအုပ်စုကြီးတွေ၊ သံတမန်တွေနဲ့ ဒေသခံအများအပြားက ဟောင်ကောင်ရဲ့ ကိုဗစ်-၁၉ စည်းမျဉ်းတွေကို ရှုတ်ချခဲ့ပြီး သူတို့ရဲ့ ယှဉ်ပြိုင်နိုင်စွမ်းနဲ့ နိုင်ငံတကာ ဘဏ္ဍာရေးအချက်အချာ နေရာတခုအဖြစ် ရပ်တည်နေတာကိုပါ ခြိမ်းခြောက်နေတယ်ဆိုပြီး ပြစ်တင် ရှုတ်ချခဲ့ကြပါတယ်။

ဒီကိုဗစ်စည်းမျဉ်းတွေဟာ ၂၀၂၀ ပြည့်နှစ်အစောပိုင်းကတည်းက ဟောင်ကောင်ရဲ့ စီးပွားရေးကို ဖိအားပေးနေခဲ့ပြီး ထိန်းချုပ်ဖို့နဲ့ လွတ်လပ်ခွင့်ကို ကန့်သတ်ဖို့ ပေကျင်းရဲ့ အားထုတ်မှုတွေကြောင့် ပြည်ပရောက် နိုင်ငံသားတွေနဲ့ ပြည်တွင်း ဒေသခံမိသားစုတွေနဲ့ သူတို့ရဲ့ စီးပွားရေးလုပ်ငန်းတွေ အစုလိုက် အပြုံလိုက် ထွက်ခွာစေခဲ့ပါတယ်။