ကာတာ ကမ္ဘာ့ဖလားဘောလုံးပွဲမှာ   ပရိသတ်တွေအကြား ငြင်းခုံ ဝေဖန် အပြော အများဆုံးဖြစ်ခဲ့တာကတော့ လူကျွံဘောဖမ်းတဲ့ နည်းပညာပြဿနာပါ။

Semi-Automated Offside တစိတ်တပိုင်း အလိုအလျောက်စစ်ဆေးတဲ့ နည်းပညာလို့ ခေါ်ပါတယ်။ ၃ နှစ်လောက် အချိန်ယူ သုတေသနလုပ်ပြီး စမ်းသပ်လေ့လာခဲ့တယ်လို့ ဖီဖာ ဥက္ကဋ္ဌက  ပြောထားပါတယ်။

အုပ်စုပွဲစဉ်အတွင်း နာမည်ကြီး အာဂျင်တီးနားအသင်းက ဆော်ဒီအာရေဗျအသင်းကို ရှုံးနိမ့်ခဲ့တဲ့  အဲဒီလူကျွံဘောနည်းပညာက လူပြောသူပြောအများဆုံး ဖြစ်ခဲ့ပါတယ်။ အာဂျင်တီးနားအသင်းဟာ ၁၃ မိနစ်အတွင်း သွင်းခဲ့သမျှ ၃ ဂိုးစလုံး လူကျွံဘောအဖြစ် သတ်မှတ်ခံခဲ့ရပါတယ်။

VAR 2.0 အနေနဲ့ “Limb Tracking Technology” အကူအညီနဲ့ ကွင်းထဲမှာရှိနေတဲ့ ကစားသမားတိုင်းရဲ့ ခြေလက်တွေကို စဉ်ဆက်မပြတ် ခြေရာခံနေတာ ဖြစ်ပါတယ်။

ကစားသမား တယောက်ချင်းမှာ ဒေတာပွိုင့် ၂၉ နေရာ သတ်မှတ်ထားပြီး တစက္ကန့်တိုင်းမှာ အချက်အလက်ပေးပို့ချက်အကြိမ် ၅၀ အတွင်း စွမ်းအားမြင့် ကင်မရာ ၁၂ လုံးက စောင့်ကြည့်ရင်း နေရာအနေအထားကို သတ်မှတ်ပါတယ်။

လူသာမန်မျက်လုံးအမြင်မှာ စင်တီမီတာလောက် ကွာဟမှုရှိပေမဲ့ အလိုအလျောက်စနစ်က လူကျွံဘောအဖြစ် သတ်မှတ်နိုင်တဲ့အကြောင်း VAR စနစ်ကတဆင့် ကွင်းလယ်ဒိုင်လူကြီးကို သတင်းပေးပို့ပါတယ်။ ကွင်းလယ်ဒိုင် စစ်ဆေးနိုင်ဖို့အတွက် ၃ ဖက်မြင်ဂရပ်ဖစ်အရုပ်ကို ချက်ချင်း ဖန်တီးပေးနိုင်ပါတယ်။

ဒီနည်းပညာကို 2021 FIFA Arab Cup နဲ့ 2021 FIFA Club World Cup တွေမှာ အကြိမ်ကြိမ် စမ်းသပ်ခဲ့ပြီး ၂၀၂၂ ကာတာကမ္ဘာ့ဖလားပွဲမှာ တရားဝင် စတင်အသုံးပြုတာ ဖြစ်ပါတယ်။

ဘောလုံးသမားရဲ့ ခြေထောက်စည်းကျွံမနေဘဲ လက်မောင်းတဘက် ကျော်နေတာလောက်နဲ့ လူကျွံဘောသတ်မှတ်တဲ့ VAR Video Assistant Referee ဗီဒီယိုအကူစည်းကြပ်ဒိုင်ရဲ့ ဆုံးဖြတ်ချက်ကို ဘောလုံးပရိသတ် အတော်များများက ဘဝင်မကျခဲ့ကြတာတွေရှိပေမဲ့ ဒီနည်းပညာကို အီတလီစီးရီးအေမှာ စတင်အသုံးပြုတော့မယ်လို့ သတင်းတွေမှာ တွေ့ရပါတယ်။

နောက်ဆုံးပေါ် နည်းပညာတွေဟာ လူသားတွေကို အမှားနည်းနိုင်အောင် ကူညီပေးနိုင်ပေမဲ့ ရှုပ်ထွေးလွန်းတဲ့ အခြေအနေတွေမှာတော့ လူသားဒိုင်လူကြီးတွေရဲ့ ဆင်ခြင်တုံတရားနဲ့ ဆုံးဖြတ်ရမယ့် အခြေအနေတွေ ဘယ်လောက်ကြုံနိုင်မလဲဆိုတာ ဆက်လက် စောင့်ကြည့်ကြရမှာ ဖြစ်ပါတယ်။