ပြင်သစ်နိုင်ငံ၊ လိုင်ယွန်မြို့အနီး ဗူးလ်အော့ဗလန်ရှိ လူနေအဆောက်အအုံတခုမှာ ဒီဇင်ဘာ ၁၆ ရက် မနက်အစောပိုင်းက မီးလောင်မှုအတွင်း အသက် ၃ နှစ်မှ ၁၅ နှစ်ကြား ကလေးငါးဦး အပါအဝင် လူ ၁၀ ဦး သေဆုံးခဲ့ကြောင်း ပြည်ထဲရေးဝန်ကြီး ရီဟဲရ် ဒါ့မဲ့နန်က ပြောပါတယ်။

မြေညီထပ်ကနေ စတင်လောင်ကျွမ်းတဲ့ မီးလောင်မှုဟာ ၇ ထပ်တိုက် အဆောက်အဦပေါ်ကို မကူးစက်ခင်မှာ လူ ၄ ဦး ဒဏ်ရာအပြင်းအထန် ရရှိခဲ့ကြောင်း ကယ်ဆယ်ရေး အာဏာပိုင်တွေက ဒေသတွင်းမီဒီယာတွေကို ပြောကြားခဲ့ပါတယ်။

အခုတော့ မီးငြိမ်းသွားပေမဲ့ ဆိုရှယ်မီဒီယာမှာတင်တဲ့ ဗွီဒီယိုဖိုင်မှာတော့ ဒီနေ့အစောပိုင်းက အဆောက်အဦရဲ့အထက်မှာ မီးခိုးလုံးမည်းမည်းကြီးက တိမ်လိုဖြစ်နေတာကို တွေ့ရပါတယ်။

မီးလောင်မှုဟာ မနက် ၃ နာရီလောက်မှာ ဖြစ်ပွားခဲ့ပြီး မီးလောင်ရတဲ့ အကြောင်းရင်းကိုတော့ မသိရသေးဘူးလို့ ဒါ့မဲ့နန်က ပြောပါတယ်။