ကာတာနိုင်ငံက ရွှေ့ပြောင်းအလုပ်သမားတွေကို လျော်ကြေးပေးဖို့ ကိစ္စမှာ ကမ္ဘာ့ဘောလုံးအဖွဲ့ချုပ် FIFA ဥက္ကဋ္ဌ ဂီယန်နီ အင်ဖန်တီနိုအနေနဲ့  ကြားဝင်ညှိနှိုင်းပေးဖို့ နီပေါလူမှုအဖွဲ့အစည်း ၃၀ ကျော်က တောင်းဆိုလိုက်ပါတယ်။ 

ရွှေ့ပြောင်းအလုပ်သမားတွေဟာ ကာတာဆီကနေ ရရှိရမယ့် ငွေကြေးတွေကို ပေးဖို့ အငြင်းခံနေရတာကြောင့် လျော်ကြေးပေးဖို့ တောင်းဆိုနေကြတာပါ။ 

၂၀၂၂ ခုနှစ် ကမ္ဘာ့ဖလားအိမ်ရှင်နိုင်ငံ ကာတာဟာ ရွှေ့ပြောင်းအလုပ်သမားတွေအပေါ် ဆက်ဆံပုံနဲ့ ပတ်သက်ပြီး လူ့အခွင့်အရေးအဖွဲ့တွေရဲ့ ပြင်းပြင်းထန်ထန် ဝေဖန်မှုကို ရင်ဆိုင်နေရပါတယ်။

ကာတာအစိုးရဟာ သူ့နိုင်ငံရဲ့ အလုပ်သမားစနစ်ဟာ လုပ်ဆောင်ဆဲဖြစ်ကြောင်း ပြောထားပေမဲ့ အိမ်ရှင်နိုင်ငံအတွင်း ထောင်နဲ့ချီတဲ့ ရွှေ့ပြောင်းအလုပ်သမားတွေ အပိတ်ခံထားရပြီး ခေါင်းပုံဖြတ်ခံနေရတယ်ဆိုတဲ့ ၂၀၂၁ ခုနှစ် Amnesty International အစီရင်ခံစာရဲ့ စွပ်စွဲချက်တွေကိုတော့ ငြင်းဆိုထားပါတယ်။ 

အင်ဖန်တီနိုဆီ အိတ်ဖွင့်ပေးစာထဲမှာ နီပေါအဖွဲ့အစည်း အများအပြားက သူတို့ မတရား ပြုကျင့်ခံခဲ့ရကြောင်း ပြောပြခဲ့ကြတဲ့ အလုပ်သမားတွေနဲ့ ချစ်ခင်ရသူတွေကို ဆုံးရှုံးခဲ့ကြရတဲ့ မိသားစုတွေအတွက် လျော်ကြေးငွေတွေကို တောင်းဆိုခဲ့ကြပါတယ်။ 

စာထဲမှာ အလုပ်သမားတွေ နီပေါကို ပြန်လာပြီဆိုရင် ခိုးယူခံထားရတဲ့ လုပ်ခကို ပြန်ရရှိဖို့အတွက် ကာတာက တည်ထောင်ထားတဲ့ လျော်ကြေးရန်ပုံငွေကို လက်လှမ်းမီဖို့ မဖြစ်နိုင်တော့ဘူး လို့ ဆိုထားပါတယ်။

နိုင်ငံတကာ လွတ်ငြိမ်းချမ်းသာခွင့်အဖွဲ့ Amnesty International ရဲ့ အဆိုအရ နီပေါနိုင်ငံမှ လုပ်သား ၄ သိန်းလောက်ဟာ ကာတာနိုင်ငံရှိ ကဏ္ဍအသီးသီးမှာ အလုပ်လုပ်နေကြပြီး ၂၀၂၂ ခုနှစ် ကမ္ဘာ့ဖလား အိမ်ရှင်အဖြစ် လက်ခံကျင်းပဖို့အတွက် လိုအပ်တဲ့ ဧရာမ အခြေခံအဆောက်အဦ ပရောဂျက်တွေကို တည်ဆောက်ရာမှာ ကြီးမားတဲ့ အခန်းကဏ္ဍကနေ ပါဝင်ခဲ့ပါတယ်။ 

FIFA နဲ့ ပြိုင်ပွဲကျင်းပရေး ဗဟိုကော်မတီ တို့ကတော့ ဒီကိစ္စအပေါ် ချက်ချင်း မှတ်ချက် မပေးသေးပါဘူး။