ရုရှားရေတပ်စစ်သင်္ဘောအုပ်စုဟာ ဒီဇင်ဘာ ၂၁ ရက်ကနေ ၂၇ ရက်အထိ လေ့ကျင့်ဖို့ စီစဉ်ထားတဲ့ ရုရှား-တရုတ် ပူးတွဲရေတပ်စစ်ရေးလေ့ကျင့်မှုအတွက် အရှေ့တရုတ်ပင်လယ်ကို ထွက်ခွာသွားပြီလို့ ရုရှားကာကွယ်ရေးဝန်ကြီးဌာနက ဒီဇင်ဘာ ၁၉ ရက်မှာ ပြောပါတယ်။

၂၀၁၂ ခုနှစ်ကတည်းက နှစ်စဉ်ပြုလုပ်လာတဲ့ ဒီ ပူးတွဲ ရေတပ်စစ်ရေးလေ့ကျင့်မှု အစီအစဉ်မှာ အရှေ့တရုတ်ပင်လယ်အတွင်း ဒုံးကျည်နဲ့ အမြောက်တွေ ပစ်ခတ်လေ့ကျင့်မယ်လို့ ရုရှား ကာကွယ်ရေးဝန်ကြီးဌာနက ဆိုပါတယ်။

“ဒီစစ်ရေးလေ့ကျင့်မှုရဲ့ အဓိကရည်ရွယ်ချက်က ရုရှားနဲ့ တရုတ် နှစ်နိုင်ငံအကြား ရေတပ်ပူးပေါင်းဆောင်ရွက်မှုကို အားကောင်းခိုင်မာလာစေဖို့နဲ့ အာရှ-ပစိဖိတ်ဒေသအတွင်း တည်ငြိမ်အေးချမ်းမှုကို ထိန်းသိမ်းဖို့ဖြစ်တယ်” လို့ ရုရှားက ပြောပါတယ်။

ရုရှားက “အထူးစစ်ဆင်ရေး” လို့ အမည်တပ်ပြီး ဒီနှစ် ဖေဖော်ဝါရီလထဲမှာ ယူကရိန်းအပေါ် ကျူးကျော်စစ် စတင်ခဲ့ကတည်းက ရုရှားအစိုးရဟာ တရုတ်အစိုးရနဲ့ နိုင်ငံရေး၊ လုံခြုံရေးနဲ့ စီးပွားရေးအရ ချိတ်ဆက်မှု ပိုတိုးမြှင့်ဖို့ ကြိုးစားလာခဲ့တာပါ။

တရုတ်သမ္မတ ရှီကျင့်ဖျင်ကိုလည်း အနောက်မဟာမိတ်အုပ်စု ဆန့်ကျင်ရေးအတွက် အဓိကမဟာမိတ်အဖြစ် ရုရှားက ရှုမြင်ထားတာပါ။

ဖေဖော်ဝါရီလထဲမှာပဲ ဒုတိယကမ္ဘာစစ် ပြီးတဲ့နောက်ပိုင်း ဥရောပမှာ အကြီးမားဆုံး မြေပြင်စစ်ဆင်ရေးကို ရုရှားအစိုးရက မစတင်မီ ရက်ပိုင်းအလိုမှာ ရုရှား-တရုတ် နှစ်နိုင်ငံအကြား “အကန့်အသတ်မရှိ” တဲ့ မဟာဗျူဟာမြောက် ပူးပေါင်းဆောင်ရွက်မှုဆိုင်ရာ သဘောတူညီမှုကို လက်မှတ်ရေးထိုးခဲ့ကြပါတယ်။

ဒါပေမဲ့ တရုတ်အစိုးရကတော့ ယူကရိန်းအပေါ် ရုရှားရဲ့လုပ်ရပ်တွေအတွက် စိုးရိမ်မှု ပြခဲ့တာမျိုး ရှိပါတယ်။

ဒီစစ်ရေးလေ့ကျင့်မှုမှာ ဗာရက်-ဒုံးကျည်တပ် ခရူဇာစစ်သင်္ဘောတစင်း အပါအဝင် ရုရှားနိုင်ငံဘက်က စစ်သင်္ဘော ၄ စင်း ပါဝင်မှာဖြစ်သလို တရုတ်နိုင်ငံဘက်ကလည်း စစ်သင်္ဘော ၆ စင်းအထိ ပါဝင်လေ့ကျင့်မှာပါ။ နှစ်ဖက်စလုံးက လေယာဉ်နဲ့ ရဟတ်ယာဉ်တွေလည်း ဒီလေ့ကျင့်မှုမှာ ပါဝင်လေ့ကျင့်ဖို့ ရှိနေပါတယ်။