ချဲလ်ဆီးအသင်းဟာ မိုနာကိုနောက်ခံလူ ဘတ်ဒီယာရှိလာကို ပေါင် ၃၃ သန်းနဲ့ခေါ်ယူဖို့ သဘောတူညီမှုရရှိခဲ့တယ်လို့သိရပါတယ်။

အရပ် ၆ ပေ ၄ လက်မမြင့်တဲ့ အသက် ၂၁ နှစ်ရှိ ပြင်သစ်နောက်ခံလူဟာ လာမယ့်ရက်ပိုင်းအတွင်းမှာ ချဲလ်ဆီးအသင်းနဲ့ ဆေးစစ်မှုခံယူမှာဖြစ်တယ်လို့ သတင်းတွေကဖော်ပြပါတယ်။ 

ချဲလ်ဆီးအသင်းဟာ ပြီးခဲ့တဲ့နွေရာသီကတည်းက ဘယ်ခြမ်းမှာကစား နိုင်တဲ့ ဗဟိုနောက်ခံလူတစ်ဦးကိုရှာဖွေခဲ့ပြီး လိုက်ဇစ်က ခရိုအေးရှားနောက်ခံလူ ဂဗာဒီယိုနဲ့ အဆင်မပြေ ဖြစ်ခဲ့တာပါ။

လက်ရှိအချိန်မှာတော့ ကမ္ဘာ့ဖလားပြိုင်ပွဲဝင်ပြင်သစ်လူစာရင်းမှာပါဝင်ခဲ့တဲ့ ဘယ်ခြေသန် ဗဟိုနောက်ခံလူ ဘတ်ဒီယာရှီလာကိုခေါ်ယူဖို့ သဘောတူညီမူရယူနိုင်ခဲ့တာပါ။

သူဟာ တနင်္ဂနွေနေ့က ကစားခဲ့တဲ့ ဘရက်စ်နဲ့ပွဲစဉ်မှာ  မိုနာကိုလူစာရင်းကနေချန်လှပ်ခံခဲ့ရပါတယ်။ မိုနာကိုအကယ်ဒမီထွက်တစ်ဦးဖြစ်တဲ့ ဘတ်ဒီယာရှိလာဟာ ၂၀၁၈ ခုနှစ်ကတည်းက အသင်းကြီးမှာပွဲ ထွက်ခွင့်ရခဲ့ပြီး စုစုပေါင်း ၁၃၅ ပွဲမှာ ၆ ဂိုးသွင်းခဲ့ပါတယ်။