ပုသိမ်အကျဉ်းထောင်အတွင်း စစ်အုပ်စုရဲ့ အကြမ်းဖက်ညှဉ်းပန်းနှိပ်စက် ပစ်ခတ်သတ်ဖြတ်မှုနဲ့ ပတ်သက်ပြီးတော့ တရားမျှတမှု ဖော်ဆောင်နိုင်ဖို့ ကြိုးပမ်းဆောင်ရွက်သွားမယ်လို့ အမျိုးသားညီညွတ်ရေးအစိုးရ (NUG) လူ့အခွင့်အရေးဆိုင်ရာဝန်ကြီးဌာနက ဇန်နဝါရီ ၈ ရက်မှာ ထုတ်ပြန်ပါတယ်။

ပြီးခဲ့တဲ့ ဇန်နဝါရီ ၅ ရက်နဲ့ ၆ ရက်နေ့က စတင်ပြီး ပုသိမ်ထောင် အတွင်းမှာ အကြမ်းဖက်စစ်အုပ်စု လက်အောက်ခံ ထောင်ဝန်ထမ်းတွေနဲ့ ရဲတပ်ဖွဲ့ရဲ့ အကြမ်းဖက်မှုကြောင့် မတရား ဖမ်းဆီး အကျဉ်းချခံနေရတဲ့ ပြည်သူတယောက် အသက်ဆုံးရှုံးခဲ့ရပြီး၊ အယောက် ၇၀ လောက် ဒဏ်ရာရရှိခဲ့ကာ၊ ၁ ယောက် ပျောက်ဆုံးနေဆဲဖြစ်တယ်လို့ NUG လူ့အခွင့်အရေးဆိုင်ရာ ဝန်ကြီးဌာနကဆိုပါတယ်။

အမျိုးသားညီညွတ်ရေးအစိုးရ၊ လူ့အခွင့်အရေးဆိုင်ရာဝန်ကြီးဌာနအနေနဲ့ ဒီဖြစ်စဉ် အပါအဝင် အကျဉ်းထောင်အတွင်း အကြမ်းဖက်မှုတွေ၊ ညှဉ်းပန်း နှိပ်စက်မှုတွေ၊ မတရား သတ်ဖြတ်မှုတွေနဲ့ ပတ်သက်ပြီး မှတ်တမ်းတင်ထိန်းသိမ်းပြီး ကုလသမဂ္ဂ အပါအဝင် နိုင်ငံတကာအဖွဲ့အစည်းတွေဆီ ပေးပို့တာတွေ အပါအဝင် နည်းလမ်းအမျိုးမျိုးနဲ့ ကြိုးပမ်းဆောင်ရွက်သွားမယ်လို့ ဆိုပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ချက်မှာတော့ ပုသိမ်အကျဉ်းထောင်မှာ ထောင်ဝန်ထမ်းနဲ့ ရဲအင်အား အများအပြားက နိုင်ငံရေးအကျဉ်းသားတွေကို ပြင်းထန်စွာ ညှဉ်းပန်းနှိပ်စက်ခဲ့တာကြောင့် နိုင်ငံရေးအကျဉ်းသားတယောက်ဖြစ်သူ ဝင်းမင်းထက် (ခ) မဲကြီး သေဆုံးသွားကြောင်း ကြားသိရပြီး အဆိုပါသေဆုံးမှုကို ဆက်လက်အတည်ပြုနေဆဲ ဖြစ်တယ်လို့ ပြောပါတယ်။ 

အကျဉ်းသား ၈ ယောက်ကတော့ ပုသိမ်ဆေးရုံအသစ်မှာ ဆေးကုသမှုခံနေရတယ်လို့ သိရပြီး သူတို့ဟာလည်း အသက်အန္တရာယ် စိုးရိမ်ဖွယ်ရာ အခြေအနေ ဖြစ်ပေါ်တယ်လို့ ဆိုပါတယ်။

ပုသိမ်အကျဉ်းထောင်ဖြစ်စဉ်မှာ ရဲတပ်ဖွဲ့ဝင် ၂ ဦး၊ အကျဉ်းဦးစီးဌာန ဝန်ထမ်း ၉ ဦး၊ ပေါင်း ၁၁ ဦး ဒဏ်ရာရရှိခဲ့ပြီး အချုပ်သား ၁ ဦး  အချင်းချင်း ရိုက်နှက်မှုကြောင့် သေဆုံးခဲ့ကာ အကျဉ်းသား၊ အချုပ်သား ၆၃ ဦးမှာ ဒဏ်ရာရရှိခဲ့တယ်လို့ စစ်ကောင်စီက သတင်းထုတ်ထားပါတယ်။

အကျဉ်းသားတယောက်ထံကနေ  ကီးပတ်ဖုန်း တလုံးကို ရှာဖွေသိမ်းဆည်းရမိခဲ့လို့ လိုအပ်သလို အရေးယူဖို့လုပ်ဆောင်ရာမှာ အကျဉ်းသားတွေက ထောင်ဝင်းတံခါးတွေ၊ CCTVတွေ၊ အိပ်ဆောင်ကွပ်ပျစ်တွေကို ရိုက်ချိုးဖျက်ဆီးပြီး ထောင်ဝန်ထမ်းတွေနဲ့ လုံခြုံရေးတပ်ဖွဲ့ဝင်တွေကို ရန်မူတိုက်ခိုက်လာလို့ အဓိကရုဏ်းနှိမ်နင်းရေး လက်နက်နဲ့ ခြောက်လှန့် ပစ်ခတ်ပြီး ဒုတ်/ဒိုင်းတွေ အသုံးပြုနှိမ်နင်းခဲ့တာလို့လည်း စစ်ကောင်စီကထုတ်ပြန်ပါတယ်။