close

စစ်ဗိုလ်ချုပ်သစ်တွေ ပြောင်းလဲမဲ့အစား ယူကရိန်းစစ်ပွဲ အဆုံးသတ်ရန် ရုရှားကို အမေရိကန် တိုက်တွန်း

ရုရှားမှာ ဆက်တိုက်ဖြစ်ပျက်နေတဲ့ ပြဿနာတွေဟာ စစ်ရေးခေါင်းဆောင်မှုပိုင်း လှုပ်ခတ်သွားဖွယ်ရှိကြောင်း ပင်တဂွန်စစ်ဌာနချုပ်က ဇန်နဝါရီ ၁၂ ရက်မှာ ပြောကြားလိုက်ပြီး မော်စကိုအနေနဲ့ ၁ နှစ်နီးပါး ကျူးကျော်စစ်ကို ကြီးကြပ်ဖို့အတွက် စစ်ဗိုလ်ချုပ်အသစ်တွေ လှည့်ပြောင်း တာဝန်ပေးမယ့်အစား စစ်ပွဲကို အဆုံးသတ်လိုက်ဖို့ တိုက်တွန်းလိုက်ပါတယ်။

ရုရှားဟာ ယူကရိန်းမှာ စစ်ရေးလှုပ်ရှားမှုကို ကြီးကြပ်ဖို့ စစ်ဦးစီးချုပ် ဗာလရီ ဂေရာဆီမော့ဗ် ကို ဗုဒ္ဓဟူးနေ့က ခန့်အပ်လိုက်ပါတယ်။

ပြီးခဲ့တဲ့ အောက်တိုဘာလကပဲ ရုရှားဟာ ဆာဂေးဆူရိုဗီခင်ကို အဲဒီရာထူးမှာ ထည့်ထားပြီး အခုကတော့သူဟာ ဂေရာဆီမော့ဗ်ရဲ့ လက်ထောက်အဖြစ် ဆက်ရှိနေမှာဖြစ်ပါတယ်။

ဝန်ထမ်းအပြောင်းအရွှေ့နဲ့ ပတ်သက်ပြီး ရုရှားရဲ့ ကြေညာချက်ကို သေချာပေါက် သိရှိထားပြီးတော့ ဒါကလည်း ဆက်ပြီးစောင့်ကြည့်ရမယ့်ကိစ္စဖြစ်ကြောင်း အမေရိကန် ကာကွယ်ရေးဌာန သတင်းပြန်ကြားရေး အတွင်းရေးမှူး ဗိုလ်မှူးချုပ် ပက်ထရစ် ရိုက်ဒါ က ပြောပါတယ်။

ဒီရာထူးအပြောင်းအလဲကိစ္စတွေကလည်း ဒီကျူးကျော်မှု စတင်ကတည်းက ရုရှားစစ်တပ် ရင်ဆိုင်ခဲ့ရတဲ့ စနစ်ကျတဲ့ စိန်ခေါ်မှုတချို့ကို ထင်ဟပ်နေနိုင်တယ်လို့ ပြောတာကလွဲလို့ ဒါဟာ ယူကရိန်းစစ်မြေပြင်မှာ ဘယ်လိုသက်ရောက်မှုတွေ ရှိနိုင်မလဲ ဆိုတာတွေကို မှန်းဆနေမှာ မဟုတ်ဘူးလို့လည်း သူကဆိုပါတယ်။

ရုရှားရဲ့ ထောက်ပံ့ပို့ဆောင်ရေးပြဿနာတွေ၊ ကြီးကြပ်ကွပ်ကဲမှုနဲ့ ထိန်းချုပ်မှုပြဿနာတွေ၊ ပံ့ပိုးထိန်းသိမ်းမှု ပြဿနာတွေ၊ စိတ်ဓာတ်ရေးရာပိုင်းနဲ့ သူတို့ကိုယ်တိုင်ချမှတ်ထားတဲ့ မဟာဗျူဟာ ရည်မှန်းချက်တွေ အောင်မြင်ဖို့ ကြီးကြီးမားမား ရှုံးနိမ့်မှုတွေအကြောင်းကိုလည်း ဆွေးနွေးထားကြောင်း ဗိုလ်မှူးချုပ် ပက်ထရစ် ရိုက်ဒါက သတင်းစာရှင်းလင်းပွဲမှာ ပြောသွားပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
Up