နီပေါနိုင်ငံမှာ ပြီးခဲ့တဲ့ရက်ပိုင်းက ပျက်ကျခဲ့တဲ့  ယဲတီလေကြောင်းလိုင်း ATR 72 လေယာဉ်ရဲ့ လေယာဉ်မှူးခန်းအသံဖမ်းစက်နဲ့ Black box လေယာဉ်ပျံသန်းမှု အချက်အလက် အသံဖမ်းစက်တွေကို လေယာဉ်ပျက်ကျတဲ့နေရာမှာရှာတွေ့ခဲ့သလို အလောင်း ၂ လောင်းကို ထပ်မံ ရှာတွေ့ခဲ့ပါတယ်။

အဲ့ဒီပစ္စည်းတွေဟာ စုံစမ်းစစ်ဆေးသူတွေအနေနဲ့ လေယာဉ် မတော်တဆမှု ဖြစ်ရတဲ့ အကြောင်းရင်းကို ဆုံးဖြတ်ရာမှာ အကူအညီပေးနိုင်ပါတယ်။

ခရီးသည် ၇၂ ဦးနဲ့ လေယာဉ်အမှုထမ်းတွေ တင်ဆောင်လာတဲ့ ယဲတီလေကြောင်းလိုင်း ATR 72 လေယာဉ်ဟာ ဇန်နဝါရီ ၁၅ ရက်နေ့က နီပေါနိုင်ငံမြို့တော် ခတ္တမန္ဒူကနေ ကမ္ဘာလှည့်ခရီးသည်တွေ အသွားများတဲ့  ပိုခါရာမြို့ကို အသွား ပျက်ကျခဲ့တာဖြစ်ပါတယ်။

အစောပိုင်းမှာ လူပေါင်း ၆၈ ဦးရဲ့ ရုပ်အလောင်းတွေကို တွေ့ရှိထားပြီး တချိန်တည်းမှာပဲ ကယ်ဆယ်ရေးသမားတွေဟာ အမြင်မသဲကွဲနိုင်လောက်အောင် တိမ်ထူတဲ့ ရာသီဥတု အခြေအနေမှာပဲ စာရင်းထဲမပါရှိတဲ့ ခရီးသည်တွေကို မြစ်အစပ် လျှိုတွေမှာလည်း လိုက်ရှာခဲ့ကြတာကြောင့် လေယာဉ်ပျက်ကျပြီး ၂၄ နာရီကျော်အကြာမှာ နောက်ထပ် အလောင်းနှစ်လောင်းကို ရှာတွေ့ခဲ့တာပါ။

အမှောင်ကျလာတာနဲ့အမျှ ကျန် ပျောက်ဆုံးနေသူ ၂ ဦးကို ရှာဖွေရေး ခေတ္တရပ်ဆိုင်းထားရပြီး ဇန်နဝါရီ ၁၇ ရက် ဒီနေ့မှာ  ရှာဖွေရေးကို ပြန်စမယ်လို့ ခတ္တမန္ဒူလေဆိပ်မှ ကယ်ဆယ်ရေး ညှိနှိုင်းရေးဌာန တာဝန်ရှိသူတဦးက ပြောပါတယ်။

သေဆုံးသွားသူ အယောက် ၇၀ ရဲ့ ရုပ်အလောင်းတွေကို ပိုခါရာမြို့ရှိ ရေခဲတိုက်မှာ ထားရှိပြီး ရေခဲတိုက်အပြင်ဘက်မှာ လူအုပ်ကြီး စုရုံးရောက်ရှိနေတဲ့အတွက် အဓိကရုဏ်းနှိမ်နင်းရေး ရဲတပ်ဖွဲ့ဝင်တွေက စောင့်ကြပ်ပေးနေရပါတယ်။

ဒီလောင်းတွေထဲက အလောင်း ၂၄ လောင်းအတွက် သေဆုံးပြီးနောက် အလောင်းစစ်ဆေးမှု လုပ်ငန်းစဉ်ကို ပိုခါရာမှာ ပြုလုပ်မှာဖြစ်ပြီး ကျန်တာကိုတော့ ခတ္တမန္ဒူကို ပို့ဆောင်မှာဖြစ်ကြောင်း ပြည်တွင်းမီဒီယာတွေမှာ ဖော်ပြပါတယ်။