အင်္ဂလိပ်ရေလက်ကြားကို ဖြတ်ကျော်လာကြတဲ့ ရွှေ့ပြောင်းနေထိုင်သူတွေထဲက ကလေး အယောက် ၂၀၀ ဟာ ပျောက်ဆုံးနေကြောင်း လူဝင်မှုကြီးကြပ်ရေးဝန်ကြီး ရောဘတ် ဂျန်ရစ်ခ်က ဗြိတိန်လွှတ်တော်အမတ်တွေကို ဇန်နဝါရီ ၂၄ ရက်မှာ ပြောကြားလိုက်ပါတယ်။

ကလေးပျောက်ဆုံးမှုပေါင်း ၄၀၀ ကျော်ရှိခဲ့ပြီး ပျောက်ဆုံးနေသူ ၂၀၀ ကျော်ကို စာရင်းမပြုစုနိုင်သေးကြောင်း ဂျန်ရစ်ခ်က ပြောပါတယ်။

ပျောက်ဆုံးနေတဲ့ ကလေးငယ်တွေရဲ့ ၈၈ ရာခိုင်နှုန်းဟာ အယ်လ်ဘေးနီးယားလူမျိုးတွေ ဖြစ်ကြောင်းလည်း ဂျန်ရစ်ခ်က ဆိုပါတယ်။

အင်္ဂလိပ်ရေလက်ကြားကို လှေငယ်တွေနဲ့ ဖြတ်ကူးလာကြတဲ့ ရွှေ့ပြောင်းနေထိုင်သူ အရေအတွက် တဟုန်ထိုးတက်လာတာကြောင့် အစိုးရဟာ ခိုလှုံခွင့်တောင်းခံသူတွေကို နေရေးထိုင်ရေးကူညီဖို့ ဟိုတယ်တွေကို သုံးလာခဲ့ပြီး အဲဒါကို ကလေးသူငယ်တွေ လုံခြုံရေးအတွက် မသင့်လျော်ဘူးလို့ အတိုက်အခံ လွှတ်တော်အမတ်တွေက ပြစ်တင်ဝေဖန်ခဲ့ကြပါတယ်။

ရေလက်ကြားကိုဖြတ်ပြီး အင်္ဂလန်ကို ရောက်ရှိလာသူဦးရေဟာ ပြီးခဲ့တဲ့ ၂ နှစ်အတွင်း နှစ်ဆတိုးလာခဲ့ပြီး ကွန်ဆာဗေးတစ်အစိုးရအတွက် အဓိက နိုင်ငံရေးပြဿနာ ဖြစ်လာခဲ့ပါတယ်။

ဗြိတိန်အစိုးရဟာ အင်္ဂလိပ်ရေလက်ကြားကို ဖြတ်ကျော်လာတဲ့ ရွှေ့ပြောင်းနေထိုင်သူတွေကို နိုင်ငံမှာ မကျန်ရအောင် တားဆီးမယ့် အစီအမံတွေကို ပြီးခဲ့တဲ့ဒီဇင်ဘာလမှာ ကြေညာခဲ့ပြီး အဲဒီအစီအမံတွေမှာ ဝန်ကြီးချုပ် ဆူနက်ခ်က တရားမဝင် လူဝင်မှုကြီးကြပ်ရေးကို ကိုင်တွယ်ဖြေရှင်းမယ့် မဟာဗျူဟာမြောက်မြားစွာကို အကြမ်းဖျင်း ဖော်ပြထားပါတယ်။