ဘိုင်ယန်မြူးနစ်အသင်းဆီ ပြောင်းရွှေ့လာခဲ့တာဟာ မန်စီးတီးနည်းပြ ဂွါဒီယိုလာနဲ့ ဆက်ဆံရေးကြောင့် မဟုတ်ကြောင်း ကန်ဆယ်လိုက ပြောပါတယ်။

ဘယ်နောက်ခံလူ ကန်ဆယ်လိုဟာ အာဆင်နယ်နဲ့ အက်ဖ်အေဖလားပွဲစဉ်မှာ ပွဲထွက်ခွင့်မရ ဖြစ်ခဲ့ပြီးနောက် နည်းပြဂွါဒီယိုလာနဲ့ အချင်းများခဲ့တယ်လို့ သတင်းထွက်ပေါ်ခဲ့တာပါ။ အဲဒီနောက်မှာတော့ ကန်ဆယ်လိုဟာ ဘိုင်ယန်မြူးနစ်အသင်းဆီ ရာသီကုန်အထိ အငှားစာချုပ်နဲ့ ပြောင်းရွှေ့ခဲ့ပြီး ဘိုင်ယန်ဘက်က ပေါင် ၆၁ သန်းခွဲနဲ့ အပြီးသတ်ခေါ်ယူခွင့် ရှိပါတယ်။

ဘိုင်ယန်နဲ့ စာချုပ်ချုပ်ဆိုပြီးနောက် ပြုလုပ်ခဲ့တဲ့ သတင်းစာရှင်းလင်းပွဲမှာတော့ မန်စီးတီးကနေ ထွက်ခွာလာခဲ့တာဟာ ပွဲထွက်ခွင့်မရခဲ့လို့သာဖြစ်ပြီး နည်းပြဂွါဒီယိုလာနဲ့ ဆက်ဆံရေး မပြေမှုတွေကြောင့်ဆိုတဲ့ သတင်းတွေက မဟုတ်မှန်ကြောင်း ဖြေရှင်းခဲ့ပါတယ်။

ကြီးမားတဲ့ သမိုင်းအစဉ်အလာရှိတဲ့ ဘိုင်ယန်မြူးနစ်အသင်းနဲ့အတူ စိန်ခေါ်မှုအသစ်တွေကို စတင်သွားချင်ပြီး အဲဒါက သူ့ရဲအိပ်မက်တခုဖြစ်တယ်လို့ ကန်ဆယ်လိုက စာချုပ်ချုပ်ဆိုအပြီးမှာ ပြောသွားပါတယ်။