ရုရှားနိုင်ငံ ခါဘာရော့ဗ်စ်ခ်ဒေသရဲ့ အုပ်ချုပ်ရေးမှူးဟောင်း ဆာရ်ဂျေ ဖှူရ်ဂါလ်ကို ရုရှားတရားရုံးက ဖေဖော်ဝါရီ ၁၀ ရက်မှာ ထောင်ဒဏ် ၂၂ နှစ် ချမှတ်လိုက်ပါတယ်။ 

ဒေသတွင်း နာမည်ကြီး နိုင်ငံရေးသမား ဖှူရ်ဂါလ်ဟာ လူသတ်မှုကျူးလွန်ဖို့ ကြိုးပမ်းမှုနဲ့ စီးပွားရေးပြိုင်ဘက်တွေကို တခြားသူကလုပ်ကြံတဲ့ပုံစံမျိုးနဲ့ သတ်ဖြတ်ဖို့ ကြံစည်အမိန့်ပေးမှုတွေမှာ အပြစ်ရှိကြောင်း တွေ့ရှိရတယ်လို့ ဆိုပါတယ်။ 

ဖှူရ်ဂါလ်ဟာ ၂၀၀၄ ခုနှစ်နဲ့ ၂၀၀၅ ခုနှစ်အတွင်းက ရာဇ၀တ်မှုတွေနဲ့ ဆက်နွှယ်နေတယ်ဆိုတဲ့ စွဲချက်တွေကို ငြင်းဆိုခဲ့ပါတယ်။ 

သူ့ကို စီရင်ချက်ချခြင်းကို အယူခံဝင်ပြီး တရားသေလွှတ်ဖို့ တောင်းဆိုခဲ့ကြတယ်လို့ သူ့ရဲ့ ရှေ့နေတွေက မော်စကိုမြို့အပြင်ဘက် တရားရုံးမှာ ပြောဆိုပါတယ်။ 

အသက် ၅၂ နှစ်အရွယ် ဖှူရ်ဂါလ်ကို မော်စကိုမြို့အရှေ့ဘက် မိုင်ပေါင်း ၃၈၀၀ လောက်အကွာက ခါဘာရော့ဗ်စ်ခ် ဒေသမှာ အုပ်ချုပ်ရေးမှူး လုပ်နေတုန်း ၂၀၂၀ ပြည့်နှစ် ဇူလိုင်လမှာ ဖမ်းဆီးခံခဲ့ရတာပါ။

သူ့ကို ဖမ်းဆီးခဲ့မှုကြောင့် ဒေသတွင်းမှာ ဆန္ဒပြပွဲကြီးတွေ ပေါ်ပေါက်လာခဲ့ပြီး သူ့ကို ထောက်ခံပြတဲ့အနေနဲ့ ရက်သတ္တပတ်ပေါင်းများစွာ လမ်းတွေပေါ် ထွက်ခဲ့ကြပါတယ်။ 

သူ့ကို ကျောထောက်နောက်ခံပြုသူတွေကတော့ ဖှူရ်ဂါလ်ကို စွဲချက်တွေဟာ နိုင်ငံရေးအရ လှုံ့ဆော်မှုဖြစ်ပြီး မော်စကို ကို အမှီအခိုကင်းလွန်းတာကြောင့် အပြစ်ပေးခံရတာလို့ ပြောပါတယ်။ 

အမျိုးသားရေးဝါဒီ လစ်ဘရယ်ဒီမိုကရက်တစ်ပါတီ  ကိုယ်စားပြုတဲ့ ဖှူရ်ဂါလ်ဟာ အဲဒီအချိန်က အာဏာရနေတဲ့ ကရင်မလင်ထောက်ခံသူ အုပ်ချုပ်ရေးမှူးကို ဖြုတ်ချဖို့ မော်စကိုဆန့်ကျင်ရေး စိတ်ဓာတ်တွေတက်ကြွနေကြတဲ့ ၂၀၁၈ ခုနှစ် ရွေးကောက်ပွဲမှာ အံ့အားသင့်ဖွယ် အနိုင်ရရှိခဲ့တာ ဖြစ်ပြီး ရုရှားရဲ့ တင်းတင်းကျပ်ကျပ် ထိန်းချုပ်ထားတဲ့ ရွေးကောက်ပွဲစနစ်အတွက် တုန်လှုပ်စရာ ရလဒ်လည်း ဖြစ်ပါတယ်။ 

သမ္မတဗလာဒီမာပူတင်ဟာ "ယုံကြည်မှုဆုံးရှုံးခြင်း"လို့ ကိုးကားပြီး ၂၀၂၀ ပြည့်နှစ်မှာ ဖမ်းဆီးခံရ ပြီးနောက်မှာ ဖှူရ်ဂါလ်ကို ရာထူးကနေထုတ်ပယ်ခဲ့ပြီးတော့ သူ့နေရာမှာ မော်စကို ကို ပိုပြီးလိုလားတဲ့ တယောက်ကို ခန့်အပ်ခဲ့ပါတယ်။