ပီရူးသမ္မတ ဒီနာဘိုလူအာတာဟာ လမ်းပေါ်ထွက် ဆန္ဒထုတ်ဖော်နေသူတွေရဲ့ တောင်းဆိုချက်အရ ရွေးကောက်ပွဲတွေကို ရက်ရှေ့တိုး ကျင်းပပေးဖို့ ဖေဖော်ဝါရီ ၁၀ ရက်မှာ တောင်းဆိုလိုက်ပါတယ်။ 

ပီရူးနိုင်ငံရဲ့ ဒီမိုကရေစီဟာ လက်တင်အမေရိကဒေသမှာ အပျက်အစီးဆုံးဖြစ်တယ်လို့လည်း ပြောကြားလိုက်ပြီး ပီရူးနိုင်ငံသားတွေဟာ ပီရူးမှာ ဒီမိုကရေစီကို ပြန်အားကောင်းအောင် လုပ်ရမယ်လို့လည်း အစိုးရသက်တမ်း ၂ လအတွက် ရုပ်သံမိန့်ခွန်းမှာ သမ္မတဘိုလူအာတာက ပြောဆိုပါတယ်။

လက်ဝဲဝါဒီသမ္မတ ပေဒရို ကက်စ်တီလိုကို ဒီဇင်ဘာ ၇ ရက်က ရာထူးမှ ဖယ်ရှားခဲ့ရာကနေ လူ ၄၈ ဦး သေဆုံးခဲ့တဲ့ သီတင်းပတ်တွေအတွင်း ဆန္ဒပြမှုတွေ ဖြစ်ပွားခဲ့ပြီးနောက်မှာ ပီရူးနိုင်ငံမှာ လွှတ်တော်ကိုယ်စားလှယ်တွေဟာအခုနှစ်အတွင်း ရွေးကောက်ပွဲတွေကို အချိန်စောပြီး ကျင်းပပေးဖို့ ရှိ၊မရှိနဲ့ ပတ်သက်လို့ သဘောထား ကွဲလွဲနေကြတုန်း ဖြစ်ပါတယ်။

ဆန္ဒပြပွဲတွေကို အကြမ်းဖက်ဖြိုခွင်းခံရပြီးနောက်မှာ ကက်စ်တီလိုကို ထောက်ခံတဲ့ ဆန္ဒပြပွဲတွေ ကနေ ပိုကျယ်ပြန့်တဲ့ အစိုးရဆန့်ကျင်ရေး လှုပ်ရှားမှုအဖြစ် မြန်မြန်ဆန်ဆန် ပြောင်းလဲ သွားပါတယ်။ 

နိုင်ငံတဝှမ်း အတားအဆီးတွေ ပိတ်ဆို့ထားတဲ့ ဆန္ဒပြသူတွေဟာ အခုတော့ သမ္မတ ဘိုလွာတေး ရာထူးမှ နုတ်ထွက်ရေး၊ ရွေးကောက်ပွဲ စောစောကျင်းပရေးနဲ့ ဖွဲ့စည်းပုံ အခြေခံဥပဒေသစ်ကို တောင်းဆိုနေကြတာပါ။ 

ပီရူးရဲ့ ကမ္ဘာလှည့်ခရီးသည်တွေကို ဆွဲဆောင်ရာ မာချူးပီချူး ရှေးဟောင်းသုတေသနနေရာကို ဖေဖော်ဝါရီ ၁၅ ရက်မှာ ပြန်ဖွင့်လှစ်နိုင်ဖို့ လုပ်ဆောင်နေကြောင်းလည်း သမ္မတက အသိပေး ထားပါတယ်။