ဘရာဇီးနိုင်ငံမှာ လတ်တလော ရေကြီးမှုတွေကြောင့် သေဆုံးသူ ၄၆ ဦးအထိ မြင့်တက်လာပြီး ဖေဖော်ဝါရီ ၂၁ ရက်က ကယ်ဆယ်ရေးလုပ်သားတွေနဲ့ စေတနာ့ဝန်ထမ်းတွေဟာ ပျောက်ဆုံးနေ သူတွေကို ရှာဖွေတွေ့ရှိဖို့ မျှော်လင့်ချက်နဲ့ ရွှံ့နွံတွေကို တူးဖော်ပြီး အပျက်အစီးတွေကို ဖယ်ရှားခဲ့ကြပါတယ်။

ဆော်ပေါ်လိုပြည်နယ်၊ ဆောင်ဆီဘက်စတီယိုမြို့ရှိ ဘာရာဒိုဆာဟီကမ်းခြေရဲ့ လမ်းမတွေပေါ်မှာ မီးသတ်သမားတွေနဲ့ စေတနာ့ဝန်ထမ်းတွေဟာ အမှိုက်တွေစုပုံနေတဲ့ အပျက်အစီးတွေအောက်မှာ ပေါက်တူးတွေ၊ ပုဆိန်တွေနဲ့အပြင် လက်ဗလာတွေနဲ့လည်း တူးဖော်ရှင်းလင်းပြီး ရှာဖွေနေကြပါတယ်။

သီတင်းပတ်ကုန်မှာ မိုးသည်းထန်စွာ ရွာသွန်းမှုကြောင့် နိုင်ငံအရှေ့တောင်ပိုင်းရှိ ကမ်းရိုးတန်းမြို့တွေမှာ မြေပြိုမှုတွေနဲ့ ရေလွှမ်းမိုးမှုတွေ ဖြစ်ပေါ်ခဲ့ပါတယ်။

လူပေါင်း ၂,၅၀၀ နီးပါး အိုးမဲ့အိမ်မဲ့ဖြစ်နေဆဲ သို့မဟုတ် နေအိမ်စွန့်ခွာနေရဆဲဖြစ်ကြောင်းနဲ့ ကယ်ဆယ်ရေးလုပ်ငန်းတွေကို ဆက်လုပ်နေကြောင်း ဆော်ပေါ်လိုပြည်နယ်အစိုးရက ထုတ်ပြန်ချက်တခုမှာ ပြောကြားခဲ့ပါတယ်။

ဆောင်ဆီဘက်စတီယိုမြို့မှာပဲ သေဆုံးသူ အများဆုံးဖြစ်ပြီး ၄၅ ဦး ရှိပါတယ်။ သီတင်းပတ်ကုန်ပိုင်းကတည်းက နိုင်ငံ့အချမ်းသာဆုံးပြည်နယ်ရဲ့ ကမ်းရိုးတန်းဒေသမှာ မိုးရေချိန် ၂၃ ဒသမ ၆ လက်မကျော်ထိ ရွာသွန်းခဲ့ပြီး ဘရာဇီးလ်မှာ အမြင့်ဆုံးဖြစ်ခဲ့ကြောင်း အစိုးရက ပြောပါတယ်။ လာမယ့်ရက်တွေမှာ မိုးပိုလာမယ်လို့ ခန့်မှန်းထားပါတယ်။