နာမည်ကျော် သရုပ်‌ဆောင် အင်ဒီလျူး သရုပ်ဆောင်ထားတဲ့ The Wandering Earth 2 ရုပ်ရှင်ဟာ ဇန်နဝါရီ ၂၂ ရက်က စတင်ရုံတင်ပြသခဲ့ရာမှာ ရုံတင်ပြီး တလအတွင်း အမေရိကန် ဒေါ်လာ ၅၇၂ သန်းကျော် ဝင်ငွေရရှိခဲ့ပြီး စံချိန်တင်ခဲ့တယ်လို့ Box office မှတ်တမ်းအရ သိရပါတယ်။

ဒီရုပ်ရှင်ဟာ ၂၀၁၉ က ရုံတင်ခဲ့တဲ့ The Wandering Earth ရုပ်ရှင်ရဲ့ နောက်ဆက်တွဲ ရုပ်ရှင်ဖြစ်ပြီး ပြသချိန် ၂ နာရီ ၅၃ မိနစ်နဲ့ ရုပ်ရှင်ကုန်ကျစရိတ် အမေရိကန်ဒေါ်လာ သန်း ၅၀ နီးပါး အသုံးပြုကာ ‌ဒါရိုက်တာ ဖရန့်ကိုက ရိုက်ကူးထားတာဖြစ်ပြီး China Film Group ကော်ပိုရေးရှင်းက ထုတ်လုပ်ဖြန့်ချိတာ ဖြစ်ပါတယ်။

ပရိသတ်တဦးက “သုံးနာရီနီးပါးအချိန်တွင်းမှာ ဒါရိုက်တာဖရန့်ကိုက ရုပ်ရှင်ထဲမှာပါတဲ့ ဇာတ်ကောင်တွေနဲ့ ပတ်သက်တဲ့ အကြောင်းအရာတွေ အများကြီးကို လေ့လာစေပါတယ်။ CG visual effects တွေနဲ့ အရည်အသွေး ပိုကောင်းလာတဲ့အတွက် ကြည့်လို့ကောင်းပါတယ်” လို့ ပြောပါတယ်။

အဆိုပါရုပ်ရှင်ဟာ နေလုံးကြီး အလွန်ကြီးမားလာတဲ့အတွက် ကမ္ဘာပျက်စီးမယ့် အန္တရာယ်ကို ရှောင်တိမ်းဖို့ အလွန်စွမ်းအားကြီးတဲ့ အိုင်ယွန်ဒုံးအင်ဂျင်စက်တွေနဲ့ ကမ္ဘာကို တခြားကြယ်စုဆီ ရွှေ့သွားဖို့ ကြံစည်တဲ့အကြောင်းကို ဇာတ်အိမ်တည် ရိုက်ကူးထားတာပါ။

၂၀၁၉ ခုနှစ်မှာ ရုံတင်ပြသခဲ့တဲ့ The Wandering Earth ရုပ်ရှင်ဟာ Box office မှာ အောင်မြင်မှုတွေ ရရှိခဲ့ပြီး နောက်ဆက်တွဲအနေနဲ့ ၂၀၂၁ စက်တင်ဘာ ၁၃ ရက်မှာ The Wandering Earth 2 ရုပ်ရှင်ကို စတင်ရိုက်ကူးခဲ့ပြီး ၂၀၂၃ ဇန်နန်ဝါရီ ၂၂ ရက်မှာ ရုံတင်ပြသခဲ့ပါတယ်။