ပေါ့ပ်အိုင်ကွန်အနေနဲ့ တင်စားခံရတဲ့ ဒေးဗစ်ဘိုဝီရဲ့ အနှစ် ၆၀ သက်တမ်းအတွင်း မယုံနိုင်စရာကောင်းတဲ့ စုဆောင်းမှုတွေနဲ့ အမှတ်တရပစ္စည်း ၈၀,၀၀၀ ကျော်ကို ၂၀၂၅ ခုနှစ်မှာ မော်ကွန်းတိုက်အနေနဲ့ အများပြည်သူအတွက် ဖွင့်လှစ်ပေးမယ်လို့ “Victoria and Albert” ပြတိုက် ဒါရိုက်တာ ဟန့်တ်က ထုတ်ပြန်ပါတယ်။

ပြတိုက်ဖွင့်လှစ်ဖို့ “Blavatnik” မိသားစုဖောင်ဒေးရှင်းနဲ့ “Warner” တေးဂီတအုပ်စုတို့က အမေရိကန်ဒေါ်လာ ၁၂ သန်းဝန်းကျင် လှူဒါန်းခဲ့ပြီး လန်ဒန်အရှေ့ပိုင်း ဘုရင်မ အယ်လိဇဘက် အိုလံပစ်ပန်းခြံမှာရှိတဲ့ “V and A East Storehouse” မှာ ဖွင့်လှစ်မယ်လို့ သိရပါတယ်။

ပြတိုက်မှာ ဘိုဝီပိုင်ဆိုင်တဲ့ တေးဂီတ ဗွီဒီယို၊ ဒီဇိုင်း၊ ဆုတွေ၊ လက်ရေးသီချင်း၊ တေးဂီတနဲ့ ဆိုင်တဲ့ စာရွက်စာတမ်း၊ ဓာတ်ပုံနဲ့ အနုပညာ အယ်လ်ဘမ်တွေကို ခင်းကျင်းပြသထားမှာ ဖြစ်ပြီး ဘိုဝီရဲ့ အံဩဖို့ကောင်းတဲ့ အနုပညာတွေကို လေ့လာနိုင်ဖို့ အများပြည်သူအတွက် ဖွင့်လှစ်ပေးတာလို့ ဟန့်တ်က ပြောပါတယ်။

ဘိုဝီရဲ့ ဂီတ၊ ပြဇာတ်၊ ရုပ်ရှင်၊ ဖက်ရှင်နဲ့ စတိုင်တွေက ဘာလင်၊ တိုကျိုနဲ့ လန်ဒန်မှာ ကျော်ကြားခဲ့ပြီး လေဒီဂါဂါနဲ့ တခြားအနုပညာရှင်တွေရဲ့ ဒီဇိုင်းနဲ့ ယဉ်ကျေးမှု အပေါ်မှာလည်း လွှမ်းမိုးမှုရှိခဲ့တယ်လို့ ဟန့်တ်က ဆိုပါတယ်။

ဘိုဝီက လန်ဒန်တောင်ပိုင်းမှာ မွေးဖွားခဲ့ပြီး ၂၀၁၆ ခု အသက် ၆၉ နှစ်မှာ ကွယ်လွန်ခဲ့တာ ဖြစ်ပါတယ်။