အသင်းနည်းပြတန်ဟတ်ဂ်ဟာ တခြားသူတွေနဲ့ မတူညီတဲ့ နည်းပြဖြစ်တယ်လို့ နောက်ခံလူ မက်ဂွဲယားက ချီးကျူးပြောပါတယ်။

အသင်းခေါင်းဆောင်မက်ဂွဲယားဟာ နည်းပြတန်ဟတ်ဂ် လက်ထက်မှာ တတိယဦးစားပေး နောက်ခံလူအဖြစ် အသုံးပြုခံနေရပေမယ့် တန်ဟတ်ဂ်အပေါ် အကောင်းမြင်ပေးပြီး ချီးကျူးခဲ့တာပါ။

သူဟာ ပုံမှန်တွေ့နေကျ နည်းပြတွေနဲ့မတူဘဲ ထူးခြားတဲ့ ခံယူချက်ရှိတဲ့ နည်းပြဖြစ်ကြောင်း၊ ဒီရာသီမှာ သူ့ရဲ့ တွေးခေါ်သုံးသပ်မှုတွေဟာ အလုပ်ဖြစ်တယ်ဆိုတာ သက်သေပြခဲ့ပြီးဖြစ်ကြောင်း မက်ဂွဲယားကချီးကျူးခဲ့တာပါ။ 

“သူလုပ်တဲ့အရာတွေနဲ့ ပြောသမျှအရာတွေ အားလုံးမှာ တောင်းဆိုမှုတွေ အတော်လေးများတယ်။ လေ့ကျင့်ရေးမှာပဲဖြစ်ဖြစ်၊ ဘောလုံးပေးပို့မှုလုပ်ချိန်မှာပဲ ဖြစ်ဖြစ် လွဲချော်မှုဖြစ်လိုက်တာနဲ့ သူက တခါတည်းရောက်လာပြီး သူလိုချင်တာကို တောင်းဆိုတတ်တယ်။ သူက မြင့်မားတဲ့ အဆင့်အတန်းပဲလိုချင်တဲ့သူဖြစ်တယ်”လို့ မက်ဂွဲယားက ပြောပါတယ်။

ယူနိုက်တက်အသင်းခေါင်းဆောင်းတစ်ဦးအနေနဲ့ တနင်္ဂနွေနေ့ ဗိုလ်လုပွဲစဉ်မှာ ဆုဖလားကိုင်မြှောက်ခွင့်ရဖို့က အိပ်မက်တစ်ခုဖြစ်ပြီး ပထမဆုံးဆုဖလားလည်းဖြစ်ကြောင်း မက်ဂွဲယားက ပြောသွားပါတယ်။