အစ္စရေးသိမ်းပိုက်ထားတဲ့ အနောက်ဘက်ကမ်းဒေသမှာ ပါလက်စတိုင်း သေနတ်သမား တဦးက အစ္စရေးညီအစ်ကို နှစ်ယောက်ကို ကားပေါ်ကနေ သေနတ်နဲ့ပစ်ခတ် သတ်ဖြတ်ခဲ့ပြီးနောက် ဖေဖော်ဝါရီ ၂၇ ရက်က နာဘလုစ်မြို့အနီးရှိ ဟာဝါရာမြို့ငယ်မှာ အစ္စရေး အခြေချသူတွေကလည်း ပါလက်စတိုင်းနေအိမ်တွေကို မီးရှို့ တိုက်ခိုက်ခဲ့ပါတယ်။

အစ္စရေးအခြေချနေထိုင်သူတွေက အိမ်တွေနဲ့ ကားတွေကို တိုက်ခိုက်မှုအတွင်း ပါလက်စတိုင်းလူမျိုးတဦး သေဆုံးသွားတယ်လို့လည်း ပါလက်စတိုင်း တာဝန်ရှိသူတွေက ပြောပါတယ်။

ရိုက်တာသတင်းဌာနက ရရှိထားတဲ့ ဗီဒီယိုထဲမှာတော့ အခြေချနေထိုင်သူတွေဟာ ဟာဝါရာမြို့က လမ်းတခုကို ပိတ်ဆို့ပြီး ပါလက်စတိုင်းနေအိမ်တွေကို မီးရှို့တာတွေ၊ ကျောက်ခဲနဲ့ ပစ်ပေါက်တာတွေ လုပ်ဆောင်နေကြတာကို တွေ့ရပါတယ်။

နှစ်နိုင်ငံအကြား တင်းမာမှုလျှော့ချနိုင်မယ့် နည်းလမ်းတွေအတွက် အစ္စရေးနဲ့ ပါလက်စတိုင်း တာဝန်ရှိသူတွေ ဂျော်ဒန်နိုင်ငံမှာ တွေ့ဆုံဆွေးနွေးခဲ့စဉ်မှာပဲ ဒီဖြစ်ရပ် ပေါ်ပေါက်လာခဲ့တာပါ။

အစ္စရေးညီအစ်ကို ပစ်ခတ်ခံရမှုအတွက် တာဝန်ခံပြောဆိုတာမျိုးတော့ လောလောဆယ်မှာ မရှိသေးပါဘူး။ အစ္စရေးစစ်တပ်က ဒီသေနတ်သမားဟာ လမ်းဆုံးကိုရောက်လာပြီး အစ္စရေးကားတွေရှိရာ ဘက်ကို ဆက်တိုက်ပစ်ခတ်ခဲ့တယ်လို့ ဆိုပါတယ်။

ဒီပစ်ခတ်မှုအတွင်း သေဆုံးသွားသူတွေဟာ အခင်းဖြစ်ပွားရာ ဟာဝါရာမြို့အနီးက ၅ မိုင်အကွာမှာရှိတဲ့ ဟာဘရာကာမြို့ခံ ညီအစ်ကို နှစ်ယောက် ဖြစ်ပြီး ဒီနယ်မြေဧရိယာဟာ ပါလက်စတိုင်းနဲ့ အခြေချနေထိုင်သူတွေကြားမှာ မကြာခဏ ပဋိပက္ခဖြစ်ပွားလေ့ရှိတဲ့ နေရာတခု ဖြစ်တယ်လို့လည်း ဆိုပါတယ်။

သေဆုံးသွားသူ နှစ်ယောက်ထဲက တယောက်ဟာ ဂျူးကျမ်းစာသင်ကျောင်းသားတွေအတွက် အစီအစဉ်တခုအတွင်းပါဝင်တဲ့ စစ်သားတဦးပါ။

အခြေချနေထိုင်မှုဆန့်ကျင်ရေး လှုပ်ရှားမှုဆိုင်ရာ တာဝန်ခံတဦးဖြစ်သူ ဂါဆန် ဒက်ဂ်လာစ်က ဒီတိုက်ခိုက်မှုအပြီးမှာ ကား ၁၅ စီး အပါအဝင် ပါလက်စတိုင်းနေအိမ် အများအပြား မီးလောင်ဆုံးရှုံးခဲ့ရတယ်လို့ ပြောပါတယ်။

အစ္စရေးအခြေချနေထိုင်သူတဦးရဲ့ ပစ်ခတ်မှုကြောင့် အသက် ၃၇ နှစ်အရွယ် ပါလက်စတိုင်း လူမျိုးတဦး သေဆုံးခဲ့ရတယ်လို့ ပါလက်စတိုင်း တာဝန်ရှိသူတွေက ပြောပါတယ်။ အဲ့ဒီနယ်မြေ ဧရိယာမှာ လှုပ်ရှားနေတဲ့ အစ္စရေးစစ်တပ်ကတော့ ချက်ချင်း မှတ်ချက်ပေး ပြောဆိုတာမျိုး မရှိသေးပါဘူး။