စစ်ကောင်စီ အဓိကအခြေစိုက်ရာ နေပြည်တော်မှာ ပြီးခဲ့တဲ့ ၂ ရက်အတွင်း ဗုံးပေါက်ကွဲမှု ၃ ကြိမ်ဖြစ်ပွားခဲ့တယ်လို့ ဒေသခံတွေက ပြောပါတယ်။

နေပြည်တော်အတွင်း လုံခြုံရေးတွေ နေရာတိုင်းနီးပါး ချထားပေမယ့်လည်း မတ်လ ၁ ရက်နဲ့ ၂ ရက်‌ တို့မှာ ဗုံးပေါက်မှု ၃ ကြိမ်အထိ ဖြစ်ပွားခဲ့ပြီး ၂၀၂၃ ခုနှစ်အတွင်း ၄ ကြိမ်မြောက်လည်း ဖြစ်ပါတယ်။ 

နေပြည်တော်၊ ရွှေကြာပင်ရပ်ကွက်မှာနေထိုင်တဲ့ အမျိုးသားလွှတ်တော် ဒုဥက္ကဋ္ဌဟောင်း ဦးမြငြိမ်း ရဲ့နေအိမ်ခြံဝင်းမှာ မတ် ၁ ရက်နေ့က တကြိမ်နဲ့ ဧရာဝတီလမ်းမကြီးပေါ်က Mandalay Paradise စားသောက်ဆိုင်မှာ တကြိမ် ဗုံးပေါက်ခဲ့တာပါ။ 

မတ် ၂ ရက်နေ့မှာတော့ ရွှေကြာပင်ရပ်ကွက်အနီးက ဒက္ခိဏသီရိမြို့နယ်နဲ့ ဇမ္ဗူသီရိမြို့နယ်တို့ကို ဆက်သွယ်ထားတဲ့ ချိုင်းရွာစစ်ဆေးရေးဂိတ်မှာတကြိမ် ဗုံးပေါက်ကွဲမှု ဖြစ်ပွားခဲ့တယ်လို့ ဆိုပါတယ်။

ရွှေကြာပင် အနီးနေထိုင်သူတဦးက "ပထမနှစ်ကြိမ်ကတော့ လူထိခိုက်မှု မရှိဘူး။ မနေ့ကတော့ လုံခြုံရေးဂိတ်ကို လက်ပစ်ဗုံးနဲ့ လာပစ်တာ ထိတော့ ထိလောက်တယ်။ ဗုံးပေါက်ပြီးပြီးချင်းတော့ ဂိတ်က ပြန်ပစ်တာတော့ရှိတယ်" လို့ ပြောပါတယ်။

ဇန်နဝါရီလအတွင်းကလည်း ရွှေကြာပင်ရပ်ကွက်အုပ်ချုပ်ရေးမှူးရဲ့နေအိမ် ဗုံးပစ်ခံရပြီး ပေါက်ကွဲခဲ့ပေမဲ့ ထိခိုက်မှုတော့ မရှိခဲ့ဘူးလို့ သိရပါတယ်။