၂၀၂၂ ခုနှစ်မှာ ရုရှားနိုင်ငံပိုင် နော့တ် စထရင်းမ် ရေအောက်ဓာတ်ငွေ့ပိုက်လိုင်းတွေကို ပျက်စီး စေခဲ့တဲ့ ပေါက်ကွဲမှုမှာ အနောက်နိုင်ငံတွေ ပါဝင်ပတ်သက်နေတယ်ဆိုတဲ့ စွပ်စွဲချက်တွေအပေါ် မြောက်ကိုးရီယား နိုင်ငံပိုင်မီဒီယာကလည်း ပါဝင်ဖိအားပေးလာခဲ့ပါတယ်။ 

ဒါဟာ ပြုံးယမ်းက မော်စကိုအပေါ် ထောက်ခံကြောင်း ဖော်ပြခဲ့တဲ့ နောက်ဆုံးဖြစ်ရပ်တခု ဖြစ်ပါတယ်။ 

မော်စကိုဟာ ပြီးခဲ့တဲ့နှစ် စက်တင်ဘာလက ဓာတ်ငွေ့ပိုက်လိုင်းပေါက်ကွဲမှု နောက်ကွယ်မှာ အနောက်နိုင်ငံတွေ ပါဝင်နေတယ်ဆိုပြီး သက်သေအထောက်အထား ဖော်ပြခြင်းမရှိဘဲ ဒီအပေါ်မှာ ဆုပ်ကိုင်ထားတာပါ။ 

ရုရှားက နိုင်ငံတကာစုံစမ်းစစ်ဆေးမှုတခု ပြုလုပ်ဖို့ တောင်းဆိုထားပေမယ့် အနောက်နိုင်ငံ တာဝန်ရှိသူတွေကတော့ ဒီစွပ်စွဲချက်တွေအပေါ်မှာ ငြင်းဆန်ထားပါတယ်။

မြောက်ကိုးရီးယားနိုင်ငံပိုင် သတင်းအေဂျင်စီ KCNA မှာဖော်ပြထားတဲ့ ဆောင်းပါးတခုမှာတော့ နိုင်ငံတကာရေးရာ ဝေဖန်သုံးသပ်သူ အန် ချွိုင် ဟရို့ခ် က ဘက်လိုက်မှုမရှိတဲ့ စုံစမ်းစစ်ဆေးမှု တခု ဆောင်ရွက်ဖို့ ရုရှားက တောင်းဆိုခဲ့တဲ့အပေါ် ထောက်ခံရေးသားထားပါတယ်။ 

“ကမ္ဘာကြီးအနေနဲ့ အမေရိကန်ရဲ့ ရက်စက်တဲ့ နိုင်ထက်စီးနင်းမှုတွေ၊ အာဏာအလွဲသုံးစားပြုမှုတွေ နဲ့ စနစ်တကျ ပူးပေါင်း လှည့်စားမှုတွေမှာ စက်ဆုပ်ဖွယ် နည်းလမ်းတွေအတိုင်း အသုံးချနေတာကို ကောင်းစွာ သတိပြုမိဖို့ လိုအပ်ပါတယ်” လို့ ရေးသားထားပါတယ်။

ဒီလို ပေါက်ကွဲမှုဖြစ်ပွားခဲ့တဲ့ အထူးစီးပွားရေးဇုန်တွေတည်ရှိရာ ဆွီဒင်နဲ့ဒိန်းမတ်နိုင်ငံတို့က စုံစမ်း စစ်ဆေးသူတွေဟာလည်း တမင်ဖျက်ဆီးမှုကြောင့် ဒီပေါက်ကွဲမှုဖြစ်ပွားခဲ့တာလို့ မှတ်ချက်ပေး ခဲ့ပေမယ့် ဒီဖြစ်ရပ်အတွက် ဘယ်သူတာဝန်ရှိတယ်ဆိုတဲ့ သူတို့ယုံကြည်မှုအပေါ်မှာတော့ ထုတ်ဖော် ပြောဆိုခြင်း မရှိပါဘူး။