တရုတ်နိုင်ငံမှာ အမျိုးသားပြည်သူကွန်ဂရက် (NPC) ကို စတင်ကျင်းပခဲ့ချိန်မှာပဲ ၂၀၂၃ ခုနှစ်အတွက် စီပွားရေး တိုးတက်မှုနှုန်းကို သင့်တင့်တဲ့ ၅ ရာခိုင်နှုန်းဝန်းကျင် ပြည့်မြောက်ဖို့ မတ် ၅ ရက် ရည်မှန်းခဲ့ကြပါတယ်။ 

ဒါဟာ ဆယ်စုနှစ်တစ်ခုအတွင်း အကြီးမားဆုံးအစိုးရအပြောင်းအလဲကို အကောင်အထည်ဖော်ဖို့ ပြင်ဆင်နေချိန်လည်း ဖြစ်ပါတယ်။ 

တရုတ်နိုင်ငံရဲ့  ပြည်တွင်းအသားတင်ထုတ်ကုန်(GDP)ဟာ ပြီးခဲ့တဲ့နှစ်မှာ ၃ ရာခိုင်နှုန်း တိုးတက်လာခဲ့ပေမယ့် ဒါက ဆယ်စုနှစ်များစွာအတွင်း အဆိုးရွားဆုံးနှုန်းထားတွေထဲက တခု ဖြစ်ပါတယ်။ 

သုံးနှစ်တာ ကိုဗစ်-၁၉ ကန့်သတ်ချက်တွေနဲ့အတူ ကြီးမားကျယ်ပြန်တဲ့ အိမ်ခြံမြေကဏ္ဍဆိုင်ရာ အကျပ်အတည်းအပြင် ပုဂ္ဂလကလုပ်ငန်းတွေအပေါ် ကန့်သတ်ထိန်းချုပ်မှုနဲ့ ပို့ကုန်တွေအပေါ် ဝယ်လို အားကျဆင်းလာမှုကြောင့် GDP တိုးတက်မှုနှုန်းလည်း နည်းပါးခဲ့တာပါ။

ရာထူးကထွက်ခွာသွားတဲ့ ဝန်ကြီးချုပ် လီခဲ့ချိန်ရဲ့ လုပ်ငန်းအစီရင်စံထဲမှာ စီပွားရေးတည်ငြိမ်မှု နဲ့ စားသုံးမှုချဲ့ထွင်နိုင်ဖို့ လိုအပ်ကြောင်း အလေးထားပြောကြားခဲ့ပြီး ဒီနှစ်အတွက် မြို့ပြ အလုပ်အကိုင်ပေါင်း ၁၂ သန်း ဝန်းကျင်လောက် ဖန်တီးပေးနိုင်ဖို့ ရည်ရွယ်ထားတယ်လို့လည်း ဆိုပါတယ်။ 

ဒါကြောင့် မနှစ်က သတ်မှတ်ထားတဲ့ ၁၁ သန်း ပမာဏထက် ပိုမိုမြင့် တက်လာခဲ့တာဖြစ်သလို အိမ်ခြံမြေကဏ္ဍမှာရှိနေသေးတဲ့ အန္တရာယ်တွေကိုလည်း လီက သတိပေးခဲ့ပါတယ်။

လီဟာ ဒီနှစ်အတွက် ဘတ်ဂျတ်လိုငွေပြမှုကို GDP ရဲ့  ၃ရာခိုင်နှုန်း သတ်မှတ်ထားပြီး ပြီးခဲ့တဲ့နှစ်က ၂ ဒသမ ၈ ရာခိုင်နှုန်းထက် အနည်းငယ် မြင့်တက်လာခဲ့တာပါ။ 

ထိုင်ဝမ်အရေးမှာလည်း လီက တရုတ်နိုင်ငံအနေနဲ့ ရေလက်ကြားဖြတ်ကျော် ဆက်ဆံရေး တိုးတက်လာအောင် ငြိမ်းချမ်းစွာ မြှင့်တင်သင့်သလို အကြမ်းဖက်မှု မပါဝင်တဲ့ ထိုင်ဝမ်နဲ့ ပြန်လည်ပေါင်းစည်းရေး လုပ်ငန်းစဉ်ကိုပါ ရှေ့တိုးလုပ်ဆောင်သင့်တယ်ဆိုပြီး လေသံ ပျော့ပျောင်း ခဲ့ပါတယ်။ 

ဒါပေမယ့် ထိုင်ဝမ်လွတ်လပ်ရေးအပေါ် ဆန့်ကျင်ကန့်ကွက်မယ့် ခိုင်မာတဲ့ခြေလှမ်းတွေလည်း ပါဝင်တယ်လို့ လီက ပြောဆိုခဲ့ပါတယ်။ 

အမျိုးသားပြည်သူ့ကွန်ဂရက်အစည်းအဝေးကို မြို့တော် ဘေဂျင်းရှိ တီရန်မင်ရင်ပြင် အနောက်ဘက်က ပြည်သူ့ခန်းမဆောင်ကြီးမှာ လုံခြုံရေးတင်းကျပ်ကာ ကိုယ်စားလှယ်ပေါင်း ၂၉၄၈ ဦးနဲ့အတူ မတ်လ ၁၃ ရက်အထိ ကျင်းပသွားမှာဖြစ်ပါတယ်။