ယူကရိန်းအရှေ့ပိုင်း ဘတ်ခ်မွတ်မြို့ကနေ တပ်တွေပြန်ဆုတ်သွားမယ်ဆိုရင် ရှေ့တန်း စစ်မျက်နှာစာတခုလုံး ပြိုကျသွားလိမ့်မယ်လို့ ရုရှားကြေးစားစစ်တပ် ဝဂ္ဂနာစစ်ဘက်ဆိုင်ရာ ကုမ္ပဏီကို ပူးတွဲတည်ထောင်သူ ယက်ဗ်ဂျေညီ ပရီဂေါ့ရှင်က မတ်လ ၄ ရက်မှာ ပြောလိုက်ပါတယ်။

ပြီးခဲ့တဲ့သီတင်းပတ်အတွင်း တိုက်ပွဲတွေ ပိုပြင်းထန်လာပြီး ရုရှားတပ်တွေက ဘက်ပေါင်းစုံကနေ တိုက်နေလို့ ဝဂ္ဂနာကြေးစားတပ်ဖွဲ့တွေဟာ ဘတ်ခ်မွတ်ကို လက်တွေ့ကျကျ ဝိုင်းရံထားတယ်လို့လည်း ပရီဂေါ့ရှင်က ပြောပါတယ်။

ဒါပေမဲ့ ရုရှားအစိုးရဟာ ဖေဖော်ဝါရီလမှာ ကတိပြုထားတဲ့ ခဲယမ်းမီးကျောက်အများစုကို ပြီးခဲ့တဲ့ သီတင်းပတ်ကုန်အထိ မတင်ပို့ရသေးဘူးလို့လည်း ဆိုပါတယ်။

ခုလို လက်နက်ခဲယမ်းတွေ ရောက်မလာတာဟာ သာမန်ဗျူရိုကရေစီကြောင့် မဟုတ်ရင် သစ္စာဖောက်မှုပဲလားလို့ ရုရှားကာကွယ်ရေးဦးစီးချုပ်တွေ အပါအဝင် ထိပ်တန်းဗိုလ်ချုပ်တွေကို ပုံမှန်ဝေဖန်လေ့ရှိတဲ့ ပရီဂေါ့ရှင်က ပြောပါတယ်။

ပြီးခဲ့တဲ့လက သူဟာ ကာကွယ်ရေးဝန်ကြီး ဆာဂေးလ်ရွှိုင်ဂူနဲ့ တခြားလူတွေကို နိုင်ငံတော် သစ္စာဖောက်မှုနဲ့ စွပ်စွဲခဲ့ပြီး ပြည်သူ့စစ်တွေဆီ လက်နက်ခဲယမ်းတွေ ထောက်ပံ့တာကို ဖြတ်တောက်ခဲ့ပါတယ်။

“ကျနော်တို့တပ်တွေ ပြန်ဆုတ်သွားမယ်ဆိုရင် ယူကရိန်းစစ်ပွဲကို ရှုံးဖို့ အဓိကခြေလှမ်းကို လှမ်းခဲ့သူတွေအဖြစ် သမိုင်းမှာ ထာဝရ နာမည်ကျဆင်းသွားလိမ့်မယ်။ ဒါက ခဲယမ်းမီးကျောက် လိုအပ်မှု ပြဿနာပဲ” လို့ ပရီဂေါ့ရှင်က ပြောခဲ့ပါတယ်။

ရုရှားတပ်တွေ လက်နက်ခဲယမ်းမရရင် ရုရှားအစိုးရနဲ့ ကြေးစားစစ်တပ် အကြီးအကဲတို့ကြား တင်းမာမှုရဲ့ နောက်ဆုံးလက္ခဏာဖြစ်တဲ့ ယူကရိန်းအရှေ့ပိုင်း ဘတ်ခ်မွတ်မြို့တဝိုက်မှာ ရုရှားရဲ့ ခြေကုပ်က အန္တရာယ်ရှိနေတယ်လို့လည်း ပရီဂေါ့ရှင်က သတိပေးပါတယ်။

ဘတ်ခ်မွတ်မြို့တောင်ပိုင်းက တိုက်ပွဲတွေမှာ ရုရှားတပ်မဟာ ၁၅၅ က ခေါင်းဆောင်တွေဟာ မြို့ကိုသိမ်းပိုက်ဖို့ ကြိုးပမ်းရင်း အပြင်းအထန် ဆုံးရှုံးခဲ့ရပြီးတဲ့နောက် တိုက်ခိုက်ဖို့အမိန့်ကို ငြင်းဆန်ခဲ့တယ်လို့ ယူကရိန်းစစ်ဘက်အရာရှိတွေနဲ့ လေ့လာသုံးသပ်သူတွေက ပြောပါတယ်။

ယူကရိန်းတပ်ဖွဲ့ဝင်တွေဟာ ဘတ်ခ်မွတ်ဒေသမှာ ရုရှားရဲ့တိုက်ခိုက်မှု ၉၅ ကြိမ်ကို ချေမှုန်းနိုင်ခဲ့တယ်လို့ ယူကရိန်းစစ်တပ်က ပြောခဲ့ပါတယ်။ ယူကရိန်းစစ်ပွဲကြောင့် လူပေါင်း သောင်းနဲ့ချီ သေဆုံးခဲ့ရပြီး သန်းနဲ့ချီ တိမ်းရှောင်ခဲ့ရတာပါ။

မြို့ကြီးတွေမှာ အပျက်အစီးတွေ လျော့သွားပေမဲ့ အနောက်နိုင်ငံတွေရဲ့ လက်နက်အကူအညီတွေနဲ့အတူ ယူကရိန်းတပ်တွေက နိုင်ငံအရှေ့ဘက်နဲ့ တောင်ဘက်ဆီ ရုရှားရဲ့ ချီတက်မှုကို ကန့်သတ်ထားနိုင်ခဲ့ပါတယ်။

ရုရှားစစ်တပ်က ဝိုင်းထားတာခံရတဲ့ ဘတ်ခ်မွတ်မြို့ကို ဆက်ပြီး ခုခံကာကွယ်သွားဖို့ ယူကရိန်းထိပ်တန်း စစ်ဦးစီးချုပ်တွေက ကတိပြုထားတယ်လို့ ယူကရိန်းသမ္မတ ဗိုလိုဒီမာ ဇလန်းစကီးက မတ်လ ၆ ရက်မှာ ပြောပါတယ်။

ထိပ်တန်း စစ်ဘက်အရာရှိတွေနဲ့ အစည်းအဝေးအတွင်း ဇလန်းစကီးက ယူကရိန်း ကာကွယ်ရေးဦးစီးချုပ်နဲ့ ဒေသဆိုင်ရာ စစ်ဦးစီးချုပ်တွေကို မေးရာမှာ သူတို့ ဘယ်လို ရှေ့ဆက်မလဲဆိုတာ အဆိုပြုခဲ့ကြတယ်လို့ သူက ဆက်ပြောပါတယ်။

ယူကရိန်း ဗိုလ်ချုပ်ကြီးတွေက ကာကွယ်ရေး ဘယ်လိုအားဖြည့်မလဲ ဆိုတာပဲ တုံ့ပြန်ပြီး နောက်ဆုတ်ဖို့ မတုံ့ပြန်ခဲ့ကြဘူးလို့ ဇလန်းစကီးက နိုင်ငံကိုပြောတဲ့ ရုပ်သံမိန့်ခွန်းအတွင်း ပြောခဲ့တာပါ။

ဘတ်ခ်မွတ်မြို့အနောက်ပိုင်း ချာဆစ်ဗ်ယာဒေသမှာ ကတုတ်ကျင်းတွေ၊ ကာကွယ်ရေး ရှေ့တန်း ခံစစ်စည်းအသစ်တွေကို တူးဖော်တည်ဆောက်နေပြီး ဒေသခံတွေကတော့ ဒေသတွင်းကနေ ထွက်သွားနေကြပါပြီ။

ရုရှားစစ်တပ်က မတ်လ ၂ ရက်ကစပြီး ဘတ်ခ်မွတ်မြို့ကို ထိုးစစ်ဆင်လာတဲ့အပြင် ခုတော့ မြို့ကို အပြင်းအထန် စီးနင်းတိုက်ခိုက်နေပြီလို့ ယူကရိန်း စစ်ဦးစီးအရာရှိချုပ်က ပြောခဲ့ပါတယ်။

ရုရှားတပ်တွေက နှစ်ဝက်ကျော် အချိန်ကာလအတွင်း ပထမဆုံး အကြီးစားအောင်ပွဲအဖြစ် မြို့ကိုသိမ်းပိုက်ဖို့ တရစပ် တိုက်ခိုက်နေတဲ့ကြားက မြို့ပျက်ကြီးထဲမှာ ယူကရိန်း စစ်တပ်တွေက သူတို့ရဲ့ တပ်စခန်းတွေကို ဖက်တွယ်ထားဆဲ ဖြစ်ပါတယ်။

ရုရှားကာကွယ်ရေးဝန်ကြီး ဆာဂေးလ်ရွှိုင်ဂူကလည်း ယူကရိန်းအရှေ့ပိုင်း ဘတ်ခ်မွတ်မြို့ကို သိမ်းနိုင်ရင် ရုရှားတပ်တွေ နောက်ထပ် ထိုးစစ်ဆင်နိုင်လိမ့်မယ်လို့ မတ်လ ၇ ရက်မှာ ပြောလိုက်ပါတယ်။

အနောက်နိုင်ငံတွေက ယူကရိန်းကို လက်နက်တွေ ပိုတိုးပေးပို့နေပေမဲ့ ရုရှားကတော့ စစ်မြေပြင်မှာ ဆောင်ရွက်ပုံလမ်းကြောင်းတွေကို ပြောင်းမှာမဟုတ်ဘူးလို့ ရွှိုင်ဂူက ဆက်ပြောပါတယ်။

ဘတ်ခ်မွတ်မြို့ရဲ့ နာမည်ကိုလည်း ဆိုဗီယက်ခေတ်က နာမည်ကို ရည်ညွှန်းရင်း အာတီယိုမော့ဗ်စ်ခ်မြို့ လွတ်မြောက်ရေး ဆက်လုပ်သွားမယ်လို့ ရွှိုင်ဂူက ရုပ်သံကနေ မှတ်ချက်ပေး ပြောဆိုပါတယ်။

“ဒီမြို့ဟာ ယူကရိန်းအရှေ့ပိုင်း ဒွန်ဘတ်စ်ဒေသကြီးအတွင်း ယူကရိန်းတပ်တွေ ခုခံကာကွယ်ဖို့ အရေးပါတဲ့ အချက်အချာဖြစ်တယ်။ ဒီမြို့ကို ထိန်းချုပ်နိုင်ရင် ယူကရိန်း ကာကွယ်ရေးစည်းတွေအတွင်း နက်နက်ရှိုင်းရှိုင်း ဆက်ပြီး ထိုးစစ်ဆင်နိုင်လိမ့်မယ်” လို့လည်း ရွှိုင်ဂူက ပြောပါတယ်။

စက်မှုလုပ်ငန်း အကြီးအကျယ်ဖွံ့ဖြိုးတဲ့ ဒွန်ဘတ်စ်ဒေသကြီးထဲမှာ ဒန်ညက်စ်နဲ့ လူဟန့်စ်မြို့ ၂ မြို့ကို ယူကရိန်းရဲ့ တခြားဒေသ ၂ ခုနဲ့အတူ သိမ်းပြီး ရုရှားပိုင်နက်ထဲ ရောက်ပြီးသားလို့ ရုရှားက အခိုင်အမာ ပြောထားပါတယ်။

ရုရှားရဲ့ ကြေးစားစစ်တပ်အုပ်စု အကြီးအကဲ ယက်ဗ်ဂျေညီ ပရီဂေ့ါရှင်က ဘတ်ခ်မွတ်တိုက်ပွဲကို ဦးဆောင်နေပြီး သူ့တပ်တွေက မြို့ကို လက်တွေ့ကျကျ ဝိုင်းထားပြီးပြီလို့ သောကြာနေ့က ပြောခဲ့ပါတယ်။