ဘင်္ဂလားဒေ့ရှ် လူစည်ကားသည့်စျေးတွင် ပေါက်ကွဲမှုဖြစ်၊ ၁၇ ဦးထက်မနည်းသေဆုံး
ဘင်္ဂလားဒေ့ရှ်နိုင်ငံမြို့တော် ဒါကာမှာ မတ်လ ၇ ရက်က လူစည်ကားတဲ့ဈေးတခုမှာ ကြီးမားတဲ့ပေါက်ကွဲမှုကြောင့် လူ ၁၇ ဦးထက်မနည်း သေဆုံးပြီး အများအပြား ဒဏ်ရာရခဲ့ပါတယ်။
ပေါက်ကွဲမှုဟာ မတ်လ ၇ ရက် ဒေသစံတော်ချိန် ၅ နာရီလောက်မှာ ဒက္ကာမြို့ဟောင်းရှိ Siddique ဆီဒစ်ဈေးဧရိယာရှိ ၇ ထပ် အဆောက်အအုံအတွင်းမှာ ဖြစ်ပွားခဲ့ကြောင်း ဒေသဆိုင်ရာ မီးသတ်ဌာန တာဝန်ရှိသူတဦးက ပြောပါတယ်။
သန့်ရှင်းရေးသုံးပစ္စည်းတွေအတွက် စတိုးဆိုင်အများအပြားရှိတဲ့ အဲဒီ ၇ ထပ်တိုက် အဆောက်အအုံမှာ ပေါက်ကွဲမှုဖြစ်ပွားခဲ့ပြီး အထပ် ၂ ထပ် ပျက်စီးခဲ့ကြောင်း မီးသတ်ဌာန တာဝန်ရှိသူ ဒီနိုမိုနီ ရှာမားက ပြောပါတယ်။
ပေါက်ကွဲမှုကြောင့် အဆောက်အအုံ ၂ လုံး ပျက်စီးပြီး တခြား ၅ ထပ် အဆောက်အအုံလည်း ပျက်စီးခဲ့ကြောင်း တာဝန်ရှိသူတွေက ပြောပါတယ်။
သူနဲ့ကပ်လျက် အဆောက်အအုံရှိ ဘဏ်ခွဲတခုရဲ့ မှန်နံရံတွေလည်း ကွဲအက်သွားခဲ့တဲ့အပြင် လူစည်ကားတဲ့လမ်းရဲ့ တဖက်ခြမ်းမှာ ရပ်နေတဲ့ ခရီးသည်တင် ဘတ်စ်ကားတစီးလည်း ပျက်စီးခဲ့ပါတယ်။
ပေါက်ကွဲရတဲ့ အကြောင်းရင်းကို ချက်ချင်း ရှင်းရှင်းလင်းလင်း မသိရသေးပါဘူး။ ကယ်ဆယ်ရေးလုပ်ငန်းတွေ လုပ်ဆောင်နေတာကြောင့် သေဆုံးသူအရေအတွက် တိုးလာနိုင်ကြောင်း တာဝန်ရှိသူတွေက ပြောပါတယ်။
