နျူးကလီးယားလက်နက် ပိုင်ဆိုင်ထားတဲ့ မြောက်ကိုးရီးယားနိုင်ငံက မတ် ၁၂ ရက်မှာ မဟာဗျူဟာမြောက် ခရုဇ်ဒုံးကျည် ၂ စင်းကို ရေငုပ်သင်္ဘောကတဆင့် စမ်းသပ်ပစ်လွှတ်ခဲ့တယ်လို့ နိုင်ငံပိုင်ရုပ်သံ KRT မှာ ဖော်ပြပါတယ်။

အမေရိကန်နဲ့ တောင်ကိုးရီးယားအကြား ပူးပေါင်းစစ်ရေးလေ့ကျင့်မှု စတင်တော့မယ့်အချိန်မှာပဲ မြောက်ကိုးရီးယားက အခုလို အင်အားပြ ပစ်ခတ်ခဲ့တာပါ။ 

မတ် ၁၃ ရက်က မြောက်ကိုးရီးယားနိုင်ငံပိုင် KRT ရုပ်သံမှာ ရေငုပ်သင်္ဘောကတဆင့် ပစ်လွှတ်လိုက်တဲ့ ဒုံးကျည်ဓာတ်ပုံ ၅ ပုံ ကို ထုတ်ပြန်ခဲ့ပြီး ဒါဟာ ရေငုပ်သင်္ဘောတပ်ဖွဲ့ရဲ့ ရေအောက်တိုက်ခိုက်မှုဆိုင်ရာ စစ်ဆင်ရေးအတွက် စမ်းသပ်ခဲ့တာဖြစ်တယ်လို့ ဖော်ပြထားပါတယ်။ 

ဒီစစ်ဆင်ရေးဟာ မြောက်ကိုးရီးယားနိုင်ငံရဲ့ နျူကလီးယား ဟန့်တားရေးဆိုင်ရာ စီမံချက် တစိတ်တပိုင်းဖြစ်သလို ဒီဒုံးကျည်ပစ်လွှတ်မှုစနစ်ရဲ့ ယုံကြည်စိတ်ချရမှုကိုပါ အတည်ပြုခဲ့တာ ဖြစ်ကြောင်း သိရပါတယ်။ 

တောင်ကိုးရီးယားနိုင်ငံရဲ့ ပူးတွဲစစ်ဦးစီးချုပ်ဖြစ်သူကတော့ နိုင်ငံစစ်တပ်ကို အမြင့်ဆုံး တပ်လှန့်ထားတဲ့အပြင် ထောက်လှမ်းအေဂျင်စီအနေနဲ့လည်း ဒီလိုဒုံးကျည်ပစ် လွှတ်မှုဆိုင်ရာ အသေးစိတ်အချက်အလက်တွေကို ခွဲခြမ်းစိတ်ဖြာနိုင်ဖို့အတွက် အမေရိကန် ထောက်လှမ်းရေးအဖွဲ့နဲ့ ပူးပေါင်းဆောင်ရွက်နေတယ်ဆိုပြီး တုံ့ပြန်ထားပါတယ်။ 

“Freedom Shield 23" လို့ အမည်ပေးထားတဲ့ တောင်ကိုရီးယားနဲ့ အမေရိကန်တပ်ဖွဲ့အကြား ပူးတွဲစစ်ရေးလေ့ကျင့်မှုကို မတ် ၁၃ ရက်စပြီး ၁၁ ရက်ကြာ ပြုလုပ်သွားဖြစ်ပြီး ၂၀၁၇ ခုနှစ်နောက်ပိုင်း အမြင့်ဆုံးအတိုင်းအတာနဲ့အတူ ပါဝင်သွားကြမှာပါ။ 

မြောက်ကိုးရီးယားဘက်ကတော့ ဒီလိုစစ်ရေးလေ့ကျင့်မှုဟာ သူတို့နိုင်ငံကို ကျူးကျော်ဖို့ အစမ်းလေ့ကျင့်မှုအဖြစ် မှတ်ယူထားတာကြောင့် ကာလရှည်ကြာ သဘောထားတင်းမာစွာနဲ့ တုံ့ပြန်ခဲ့ပါတယ်။