မြောက်ကိုရီးယားဟာ မတ်လ ၁၄ ရက်က အရှေ့ဘက်ကမ်းရိုးတန်းကနေ တာတိုပစ် ပဲ့ထိန်းဒုံးကျည်နှစ်စင်းကို ပစ်လွှတ်လိုက်အပြီးမှာ ဒုံးကျည်ပစ်လွှတ်တာနဲ့ နျူးကလီးယား စမ်းသပ်တာအပါအဝင် နောက်ထပ် ရန်စတဲ့လုပ်ရပ်တွေကို အရှိန်မြှင့်လာနိုင်ခြေရှိကြောင်း ဂျပန်အစိုးရ ထိပ်တန်းပြောရေးဆိုခွင့်ရှိသူ ဟိရိုကာဇု မတ်ဆုနိုက ပြောပါတယ်။

ဒုံးကျည် လွှတ်တင်ပြီးပြီးချင်း မကြာခင်မှာပဲ ပြုလုပ်တဲ့ ပုံမှန်သတင်းစာရှင်းလင်းပွဲမှာ ဂျပန်အစိုးရအဖွဲ့အတွင်းဝန် မတ်ဆုနိုက “မြောက်ကိုရီးယားရဲ့ စစ်ရေးလှုပ်ရှားမှုတွေနဲ့ ပတ်သက်ပြီးတော့ အမေရိကန်နဲ့ တောင်ကိုရီးယားတို့နဲ့အတူ နီးနီးကပ်ကပ် ပူးပေါင်း ဆောင်ရွက်သွားမှာဖြစ်ပြီး လိုအပ်တဲ့ အချက်အလက်တွေကို စုဆောင်း ခွဲခြမ်းစိတ်ဖြာကာ သတိရှိရှိနဲ့ စောင့်ကြည့်နေဖို့ အစွမ်းကုန် ကြိုးပမ်းသွားမှာ ဖြစ်ကြောင်းနဲ့ ဂျပန်နိုင်ငံရဲ့ ငြိမ်းချမ်းရေးနဲ့ လုံခြုံရေးအတွက် တတ်နိုင်သမျှ ဆောင်ရွက်ပေးနေကြောင်း” ပြောပါတယ်။ 

တောင်ကိုရီးယား ပူးတွဲစစ်ဦးစီးချုပ်ရုံး (JCS) ကလည်း ဒုံးကျည်တွေကို တောင်ကိုရီးယားရဲ့ အနောက်ဘက် ကမ်းရိုးတန်းအနီးရှိ တောင်ပိုင်း ဟွမ်ဟဲပြည်နယ်ကနေ ဒေသစံတော်ချိန် မနက် ၇ နာရီ ၄၀ မိနစ်မှာ ပစ်ခတ်ခဲ့ကြောင်း ပြောကြားခဲ့ပါတယ်။

တောင်ကိုရီးယားနဲ့ အမေရိကန်တို့ဟာ ပူးတွဲစစ်ရေးလေ့ကျင့်မှုကို နှစ်ချီ လုပ်ဆောင်လာချိန်အတွင်း အကြီးမားဆုံး ပူးတွဲစစ်ရေးလေ့ကျင့်မှုကို ပြုလုပ်နေချိန်မှာ မြောက်ကိုရီးယားက ဒုံးကျည်ပစ်လွှတ်မှု ထပ်မံလုပ်ဆောင်ခဲ့တာပါ။

မြောက်ကိုရီးယားဟာ ရေငုပ်သင်္ဘောမှ မဟာဗျူဟာမြောက် ခရုဇ်ဒုံးကျည်နှစ်စင်းကို စမ်းသပ်ပစ်ခတ်ပြီးနောက် ၂ ရက်အကြာလည်း ဖြစ်ပါတယ်။

မြောက်ကိုရီးယားခေါင်းဆောင် ကင်မ်ဂျုံအန်းဟာ ပြီးခဲ့တဲ့သီတင်းပတ်အတွင်းက သူ့ရဲ့စစ်တပ်ကို စစ်ရေးလေ့ကျင့်မှုတွေ အရှိန်မြှင့်လုပ်ဆောင်ဖို့နဲ့ လိုအပ်လာရင် တကယ့်စစ်ပွဲကို ဆင်နွှဲသွားမယ်လို့ အမိန့်ထုတ်ထားပါတယ်။