ထိုင်ဝမ်အာဏာရ ဒီမိုကရက်တစ်တိုးတက်ရေးပါတီ (DPP) ရဲ့ ဒုတိယသမ္မတ ဝီလျံလိုင်ဟာ ထိုင်ဝမ်သမ္မတလောင်းအဖြစ် မဲဆွယ်စည်းရုံးရေးမှာ ပါဝင်ယှဉ်ပြိုင်ဖို့ မတ် ၁၅ ရက်က တရားဝင် စာရင်းသွင်းခဲ့ပြီး ထိုင်ဝမ်ကျွန်းကို တရုတ်ဆီကနေ ကာကွယ်ဖို့နဲ့ ငြိမ်းချမ်းရေး ရရှိစေဖို့ ကတိပြု ပြောကြားခဲ့ပါတယ်။

အခုနှစ် ဇန်နဝါရီလမှာ DPP ပါတီရဲ့ ဥက္ကဋ္ဌတာဝန်ကို ထမ်းဆောင်ခဲ့တဲ့ လိုင်ဟာ ပါတီဌာနချုပ်မှာ ပါတီရဲ့ သမ္မတလောင်းအဖြစ် အရွေးခံဖို့ စာရင်းသွင်းနေချိန်မှာ ပြောဆိုခဲ့တာဖြစ်ပြီး ထိုင်ဝမ်ဟာ ဒီမိုကရေစီရဲ့ရှေ့တန်းမှာ ရပ်တည်နေကြောင်း ပြောကြားခဲ့ပါတယ်။

“ထိုင်ဝမ်ဟာ အင်ဒို-ပစိဖိတ်ဒေသရဲ့ ပထမဆုံး ကျွန်းကွင်းဆက်မှာ အဓိက ပထဝီဝင် အနေအထားမှာ ရှိနေတာကြောင့် တရုတ်ရဲ့ နှုတ်နဲ့ ခြိမ်းခြောက်မှုတွေ၊ စစ်ဘက်ဆိုင်ရာ ခြိမ်းခြောက်မှုတွေ၊ မရိုးမသားနဲ့ ကျင့်ဝတ်မဲ့တဲ့ နည်းလမ်းတွေကနေ သံတမန်ရေးရာ ဖိနှိပ်မှုနဲ့ ငြိမ်းချမ်းရေးတဖက် စစ်ပွဲတဖက် ပုံစံမျိုး နိုင်ငံရေးကစားလိုတဲ့ သူတို့ရဲ့ စံ ၂ မျိုး ဗျူဟာရဲ့ ခြိမ်းခြောက်မှုအမျိုးမျိုးကို တိုက်ရိုက်ရင်ဆိုင်နေရတယ်” လို့လည်း လိုင်က ပြောပါတယ်။

ထိုင်ဝမ်ကို ဆက်ပြီး ခိုင်မာအားကောင်းအောင်၊ ဒီမိုကရေစီ ရှေ့တန်းကို ကာကွယ်ပြီး ထိုင်ဝမ်ရဲ့ လုံခြုံရေးကို သေချာစေရအောင် စည်းလုံးညီညွတ်ရမယ်လို့လည်း သူက ဆိုပါတယ်။

ပြီးခဲ့တဲ့ ၂၀၂၀ ခုနှစ် ရွေးကောက်ပွဲမှာ တရုတ်ဘက်ကို ရပ်တည်မယ်လို့ ကတိပြုပြီး အာဏာရ DPP ပါတီက အလွယ်တကူ အနိုင်ရခဲ့တာဖြစ်ပြီး အထူးသဖြင့် တရုတ်အုပ်ချုပ်မှုကို လက်ခံဖို့ ထိုင်ဝမ်ကို တရုတ်က ဖိအားတွေ တိုးပေးနေတာကြောင့် ပေကျင်းနဲ့ ဆက်ဆံရေးဟာ ၂၀၂၄ ခုနှစ်အတွက် အစီအစဉ်မှာ ထိပ်ဆုံးကနေ ရှိနေပါတယ်။

ထိုင်ဝမ်ဒုသမ္မတ ဝီလျံလိုင်ဟာ ၂၀၁၈ ခုနှစ်တုန်းက ဝန်ကြီးချုပ်ရာထူးရှိချိန်မှာ လွှတ်တော်အတွင်း ထိုင်ဝမ်ရဲ့ လွတ်လပ်တဲ့ အမှုထမ်းဖြစ်ပြီး သူ့ရပ်တည်ချက်ကလည်း ထိုင်ဝမ်ဟာ အချုပ်အခြာအာဏာပိုင် လွတ်လပ်တဲ့နိုင်ငံဖြစ်ပြီး ပေကျင်းအတွက် ကျော်လွန်လို့မရတဲ့ မျဉ်းနီတကြောင်းဖြစ်တယ်လို့ ပြောကြားခဲ့ပြီးတော့ တရုတ်နိုင်ငံကို ဒေါသထွက်အောင် လုပ်ခဲ့သူဖြစ်ပါတယ်။