ပါကစ္စတန်ပြည်ထဲရေးဝန်ကြီး ရာနာဆနောင်လာက ဝန်ကြီးချုပ်ဟောင်း အင်မ်ရန်ခန်းကို ဖမ်းဆီးပြီး တရားရုံး တင်မှာဖြစ်ကြောင်း မတ်လ ၁၄ ရက်က ဒေသတွင်း ရုပ်သံလိုင်းတွေကနေ တိုက်ရိုက်ထုတ်လွှင့်တဲ့ လူထုစုဝေးပွဲမှာ ပြောကြားခဲ့ပါတယ်။

ဝန်ကြီးချုပ်ဟောင်း ခန်းကို ထောက်ခံသူ အနည်းစုဟာ သူ အဖမ်းခံရနိုင်ခြေရှိတာကို ဆန့်ကျင်ကန့်ကွက်တဲ့အနေနဲ့ ကရာချိ အပါအဝင် မြို့တွေမှာ လမ်းတွေပိတ်ဆို့ ဆန္ဒပြခဲ့ကြပါတယ်။

ဝန်ကြီးချုပ်ဟောင်းကို ထောက်ခံသူတချို့နဲ့ ရဲတပ်ဖွဲ့ဝင်တွေ လာဟိုးမြို့ရှိ သူ့ရဲ့နေအိမ် အပြင်ဘက်မှာ မတ်လ ၁၄ ရက်က ထိပ်တိုက်တွေ့ခဲ့ပြီး အများအပြား ဒဏ်ရာရခဲ့ကြကြောင်း အစိုးရပြောရေးဆိုခွင့်ရှိသူကရော မျက်မြင်သက်သေတွေကပါ ပြောပါတယ်။

ရဲတွေကလည်း ခန်း ထောက်ခံသူတွေကို နံပါတ်တုတ်တွေနဲ့ ရိုက်နှက်ပြီး မျက်ရည်ယိုဗုံးတွေနဲ့လည်း ပစ်ဖောက်ခဲ့ကြတာကြောင့် တချို့ဟာ ခန်းရဲ့ နေအိမ်ခြံဝင်း မြက်ခင်းပြင်ပေါ်ကို ပြုတ်ကျခဲ့ကြကြောင်း ပါတီကနေထုတ်ပြန်တဲ့ ဗီဒီယိုပုံရိပ်တွေအရ သိရပါတယ်။

မြို့တော် အစ္စလာမ္မာဘတ်ရှိ အောက်တရားရုံးဟာ ၂၀၁၈ ခုနှစ်ကနေ ၂၀၂၂ ခုနှစ်အထိ အင်မ်ရန်ခန်း အာဏာရချိန်အတွင်း နိုင်ငံတော်လက်ဆောင်ပစ္စည်းတွေကို တရားမဝင် ရောင်းချမှုအတွက် ဆင့်ခေါ်မှုအများအပြား လုပ်ဆောင်ခဲ့ပေမဲ့ ခန်းက မလာရောက်ခဲ့တာကြောင့် ဖမ်းဝရမ်းထုတ်ထားကြောင်း သူ့ရဲ့လက်ထောက် ဖာဝဒ် ချောင်ဒရီက ရိုက်တာသတင်းဌာနကို ပြောပါတယ်။ ခန်းကတော့ သူ့ကိုစွပ်စွဲထားချက်တွေမှာ အမှားမလုပ်ထားကြောင်း ငြင်းဆိုထားပါတယ်။

ဒီရက်ပိုင်းမှာ သူ့ကိုထောက်ခံသူတွေနဲ့ တရားဥပဒေစိုးမိုးရေး တာဝန်ရှိပုဂ္ဂိုလ်တွေအကြား ထိပ်တိုက်ရင်ဆိုင်မှုတွေ ဖြစ်ပွားခဲ့တာကြောင့် မတ်လ ၁၈ ရက်မှာ သူ တရားရုံးကို လာရောက်မယ်လို့ အာမခံချက်ပေးဖို့ ဆန္ဒရှိကြောင်း မတ်လ ၁၅ ရက်က ဗီဒီယိုမိန့်ခွန်းမှာ ပြောကြားခဲ့ပါတယ်။

သူ့မိန့်ခွန်းထဲမှာ ခန်းက အရင်က အစ္စလမ္မာဘတ်မှာ စစ်သွေးကြွတိုက်ခိုက်မှု ၂ ကြိမ် ကြုံခဲ့ရတာကြောင့် တရားရုံးရှေ့မှောက်မှာ လုံခြုံရေးဆိုင်ရာ စိုးရိမ်မှုတွေ ရှိနေကြောင်းလည်း ပြောသွားပါတယ်။