စပါးအသင်းမှာ တကိုယ်ကောင်းဆန်တဲ့ ကစားသမားတွေများနေကြောင်း ဆောက်သမ်တန်နဲ့ ၃ ဂိုးစီ သရေကျတဲ့ ပွဲစဉ်အပြီးမှာ နည်းပြကွန်တီက ဝေဖန်ပါတယ်။

စပါးအသင်းဟာ အမှတ်ပေးဇယားအောက်ဆုံးက ဆောက်သမ်တန်ကို ၃ ဂိုး ၁ဂိုးနဲ့ ဦးဆောင်ခဲ့ပေမဲ့ ချေပဂိုး ၂ ဂိုး ဆက်တိုက်ပေးရပြီး သရေတစ်မှတ်သာ ရယူနိုင်ခဲ့တာပါ။

ပွဲအပြီးမှာတော့ ကစားသမားတွေဟာ အသင်းလိုက် ကစားတာမျိုးမရှိခဲ့ဘဲ တကိုယ်ကောင်းဆန်တဲ့သူတွေက များနေတယ်လို့ နည်းပြကဝေဖန်ခဲ့တာပါ။

“ကစားသမားတွေအနေနဲ့ တာဝန်ယူမှုရှိရပါလိမ့်မယ်။ တကိုယ်ကောင်းဆန်တဲ့သူတွေများနေပြီး အသင်းတစ်သင်းလို မမြင်တွေ့ခဲ့ရဘူး။ လက်ရှိအချိန်မှာ ကျနော်တို့ရဲ့ပုံစံက အသင်းတစ်သင်း မဟုတ်သလို စိတ်အားထက်သန်မှုလည်းမရှိဘူး။ ကျနော်တို့ဟာ နှလုံးသားကို ကွင်းပေါ်မှာထားပြီး အသင်းရဲ့လိုဂိုအတွက် ကစားဖို့အဆင်သင့်ဖြစ်မနေဘူး”လို့ နည်းပြကွန်တီက ပြောပါတယ်။

စပါးအသင်းဟာ ဒီပွဲသရေရလဒ်ကြောင့် အဆင့်လေးနေရာကနေ ဖယ်မပေးခဲ့ရပေမယ့် နှစ်ပွဲပိုကစား ထားတဲ့အခြေအနေမှာ နယူးကာဆယ်နဲ့ နှစ်မှတ်၊ လီဗာပူးနဲ့ ၇ မှတ်သာ ကွာဟတော့တာ ဖြစ်ပါတယ်။