အမေရိကန်သမ္မတဟောင်း ဒေါ်နယ်ထရမ့်ပ်ဟာ နာမည်ကြီးညစ်ညမ်း ရုပ်သံဇာတ်ကား သရုပ်ဆောင်တစ်ယောက်ကို နှုတ်ပိတ်ခပေးခဲ့တဲ့ကိစ္စနဲ့ပတ်သက်လို့ မတ်လ ၂၁ ရက်မှာ သူ ဖမ်းဆီးခံရနိုင်တယ်လို့  ပြောဆိုထားပါတယ်။

သူ့ကိုထောက်ခံသူတွေအနေနဲ့ ဒီကိစ္စအပေါ် ကန့်ကွက်ဆန္ဒပြကြဖို့ကိုလည်း ထရမ့်ပ်က တောင်းဆို ခဲ့ပါတယ်။ ရီပတ်ဘလီကန်ပါတီဝင်တချို့ကတော့ ထရမ့်မ်ကို ထောက်ခံတယ်လို့ တွစ်တာလူမှုကွန်ရက်ပေါ်မှာ ရေးသားဖော်ပြခဲ့ကြပါတယ်။

ဒီမိုကရက်ပါတီဝင်အများစုနဲ့ သဘောထားပျော့ပျောင်းတဲ့ ရီပတ်ဘလီကန် ပါတီဝင်တွေကတော့ ထရမ့်ပ်ကို ဒီကိစ္စအကြောင်းရေးသားချက်အပေါ်  တိုက်ရိုက်မှတ်ချက်ပေးတာမျိုး မရှိသေးပါဘူး။ ထရမ့်ရဲ့ ပြောရေးဆိုခွင့်ရှိသူ တစ်ဦးကလည်း ဒီသမ္မတဟောင်းအပေါ် ဖမ်းဆီးရေးနဲ့ ပတ်သက်ပြီး အကြောင်းကြားထားတာမျိုး မရှိသေးဘူးလို့ ဆိုပါတယ်။

SpaceX ၊ Tesla နဲ့ Twitter ကုမ္ပဏီတွေရဲ့ အမှုဆောင်အရာရှိချုပ်ဖြစ်သူ အီလွန်မက်စ် ကတော့ ဒီဖမ်းဆီးမှုသာဖြစ်လာခဲ့မယ်ဆိုရင် ထရမ့်ပ်အနေနဲ့ လာမယ့်ရွေးကောက်ပွဲမှာ သောင်ပြိုကမ်းပြို အနိုင်ရလိမ့်မယ်ဆိုပြီး သူ့အမြင်ကို တွစ်တာ လူမှုကွန်ရက်ပေါ်မှာ ရေးသားထားပါတယ်။

ထရမ့်ပ်ဟာ လာမယ့် ၂၀၂၄ ခုနှစ် သမ္မတရွေးကောက်ပွဲအတွက် ရီပတ်ဘလီကန်ပါတီ ကိုယ်စားပြု ဝင်ရောက်ယှဉ်ပြိုင်ဖို့ ကြိုးပမ်းနေတုန်းမှာပဲ ဒီစုံစမ်းစစ်ဆေးမှုက အချိန်ကိုက်ထွက် ပေါ်လာခဲ့တာပါ။