လက်နက်များ တိုးမြှင့်ထောက်ပံ့ရန် ဥရောပနိုင်ငံများကို ယူကရိန်းသမ္မတ တိုက်တွန်း
ယူကရိန်းနိုင်ငံအတွက် လက်နက်တွေ တိုးမြှင့်ထောက်ပံ့ဖို့နဲ့ ရုရှားအပေါ် ပိတ်ဆို့အရေးယူမှုတွေ ထပ်မံချမှတ်ဖို့ ယူကရိန်းသမ္မတ ဇလန်းစကီးက မတ်လ ၂၃ ရက်က ဥရောပကို တိုက်တွန်းလိုက်ပြီး အဲ့လိုမှမလုပ်ရင် စစ်ပွဲက နှစ်နဲ့ချီပြီး ကြာနိုင်တယ်လို့ ပြောလိုက်ပါတယ်။
ကုလသမဂ္ဂအကြီးအကဲ အန်တိုနီယို ဂူတာရက်စ်နဲ့ အီးယူခေါင်းဆောင်တွေ တွေ့ဆုံဆွေးနွေးနေချိန်မှာ ဇလန်းစကီးက ရထားတစီးပေါ်ကနေ ဗီဒီယိုမိန့်ခွန်း ပြောကြားခဲ့တာ ဖြစ်ပါတယ်။
အီးယူခေါင်းဆောင်တွေကို ရှည်ရှည်လျားလျား ထိမိပြတ်သားစွာ ပြောကြားထားတဲ့ အဲဒီမိန့်ခွန်းထဲမှာ ယူကရိန်းကို ကျူးကျော်လာတဲ့ ရုရှားကို တနှစ်ကျော်ကြာ ထိန်းထားနိုင်ဖို့ အရေးယူဆောင်ရွက်နေတာ ၂၇ နိုင်ငံ အစုအဖွဲ့ကိစ္စအထိ ဖြစ်ခဲ့ပြီလို့လည်း ဆိုပါတယ်။
“တွေ့ဆုံပွဲတိုင်း၊ ဆွေးနွေးမှုတိုင်း၊ ကျနော်တို့ရဲ့ ပူးပေါင်းလုပ်ဆောင်မှု နေ့ရက်တိုင်းဟာ ငြိမ်းချမ်းရေး ပြန်လည်ရရှိဖို့ ပိုနီးကပ်လာပြီး ယူကရိန်းနဲ့ ဥရောပတခွင်လုံးကို မကောင်းဆိုးဝါး ရုရှားဆီကနေ လွတ်မြောက်ဖို့ ပိုနီးစပ်လာတယ်” လို့လည်း ဆိုပါတယ်။
တကယ်လို့ ဥရောပက နှောင့်နှေးတုံ့ဆိုင်းနေရင် မကောင်းဆိုးဝါးက အင်အားပြန်လည်စုဖွဲ့ဖို့ အချိန်ရသွားပြီး နှစ်ပေါင်းများစွာ စစ်ပွဲဆင်နွှဲနေရလိမ့်မယ်လို့လည်း ပြောပါတယ်။
ဒါ့အပြင် စစ်မြေပြင်မှာ နာရီတိုင်း အရေးကြီးနေပေမဲ့ တာဝေးပစ်ဒုံးကျည်တွေ ထောက်ပံ့မှု ကြန့်ကြာနေတာဟာ ယူကရိန်းအတွက် သိသာထင်ရှားနေလို့ အထူးသဖြင့် တာဝေးပစ်ဒုံးကျည်များ၊ ခဲယမ်းမီးကျောက်များနဲ့ ပိုခေတ်မီတဲ့ လေယာဉ်တွေ လိုအပ်ကြောင်း ထပ်လောင်းပြောကြားခဲ့ပါတယ်။
ဥရောပသမဂ္ဂ (အီးယူ) ဟာ ယူကရိန်းကို အဖွဲ့ဝင်အဖြစ် ပေးအပ်မယ့် လုပ်ငန်းစဉ်ကို အရှိန်မြှင့်ဖို့ လိုအပ်ကြောင်းလည်း ပြောပါတယ်။
ဇလန်းစကီးဟာ ရုရှားအပေါ် ပိုပြင်းထန်တဲ့ ဒဏ်ခတ်ပိတ်ဆို့မှုတွေလုပ်ဖို့ အချက်ပြရာမှာ အီးယူရဲ့ နှောင့်နှေးမှုလို့ အထူးဝေဖန်ခဲ့ပါတယ်။
တကယ်လို့ ပူးပေါင်းဆောင်ရွက်မှုမှာ နှောင့်နှေးခြင်း၊ တုံ့ဆိုင်းခြင်း မရှိဘူးဆိုရင် ယူကရိန်းရဲ့ အောင်ပွဲဆီကို ပြတ်ပြတ်သားသား ကြိုးပမ်းဆောင်ရွက်ရင် ရုရှားအကြမ်းဖက်မှုကို ရပ်တန့်ဖို့ အောင်ပွဲက အခုနှစ်မှာပဲ ဖြစ်လိမ့်မယ်လို့လည်း ပြောပါတယ်။
