မကွေးတိုင်း၊ ပေါက်မြို့နယ်မှာ ဧပြီ ၁၄ ရက် မနက်ပိုင်းက စစ်ကောင်စီအထိုင်စခန်းတိုက်ခိုက်ခံရပြီး အရာရှိ တယောက် အပါအဝင် ၃ ယောက်သေဆုံးခဲ့တယ်လို့ ပခုက္ကူခရိုင် တပ်ရင်း(၁၄)၊တပ်ခွဲ(၂) Black ပြောက်ကျားတပ်ဖွဲ့ကနေ သိရပါတယ်။

ပေါက်မြို့နယ် ရွှေဘုံသာ ပျူစောထီးရွာက စစ်တပ်အထိုင်ချထားတဲ့ကင်းကို ဒီနေ့ မနက် ၅ နာရီကနေ ၆ နာရီခွဲအထိ ဒေသကာကွယ်ရေးပူးပေါင်းတပ်ဖွဲ့တွေက လက်နက်ကြီး ၆၀ မမ အလုံး ၃၀ လောက်အပါအဝင်လက်နက်ငယ်တွေနဲ့ ပစ်ခတ်တိုက်ခိုက်ခဲ့တာလို့ Black ပြောက်ကျားတပ်ဖွဲ့ရဲ့တာဝန်ခံ ရဲဘော်ဥသြက ပြောပါတယ်။

“အဲဒီတိုက်ပွဲအတွင်းမှာ စစ်ကောင်စီဘက်က ၃ ယောက်သေတယ်။ အဲဒီ ၃ ယောက်ထဲမှာမှ စစ်ကောင်စီဘက်က ၃ ပွင့်အဆင့်ရှိတဲ့ ဗိုလ်ကြီးတယောက်ပါတယ်ဗျ။ ကိုယ်ဘက်ကတော့ အထိခိုက်အကျဆုံးမရှိဘဲ ပြန်ဆုတ်နိုင်ခဲ့တယ်။ အဲဒီပျူစခန်းမှာ အင်အားဘယ်လောက်ရှိတယ်ဆိုတာတော့ ခန့်မှန်းလို့မရဘဲ ၁၀၀ တော့မပြည့်ဘူး။ ကပစ ၂၄ နဲ့လည်း အကွာဝေးက ၅ မိုင်လောက်ဘဲရှိတာ။”

အဲဒီတိုက်ခိုက်မှုကို ပခုက္ကူခရိုင်တပ်ရင်း ၁၄၊ တပ်ခွဲ ၂ ကဦးဆောင်ပြီး တပ်ခွဲ (၁၊၃၊၄) ၊Special Force 7 Column၊Justic Fighter၊ ပေါက်မြောက်ပိုင်းတော်လှန်ရေးတပ်ဦး NPRF၊ဂဠုန်တပ်ဖွဲ့တို့ပူးပေါင်းတိုက်ခဲ့ကြတာလို့ ဆိုပါတယ်။

စစ်ကောင်စီဘက်က ထိခိုက်သေဆုံးတဲ့အခြေနေကို သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာမတွေ့ရသေးပါဘူး။