ဝေါလ်စထရိဂျာနယ် သတင်းထောက်တယောက်ကို ရုရှားက ဖမ်းဆီးထိန်းသိမ်းတဲ့အပေါ် အလွန်အမင်း စိုးရိမ်ပူပန်နေပြီး မော်စကိုရဲ့ မီဒီယာကို ကန့်သတ်ခြိမ်းခြောက်ဖို့ ကြိုးပမ်းမှုတွေကို ကန့်ကွက်ကြောင်း အမေရိကန်ပြည်ထောင်စုနဲ့ တခြားနိုင်ငံပေါင်း ၄၀ ကျော်က ဧပြီ ၁၇ ရက်မှာ ပူးတွဲကြေညာချက် ထုတ်ပြန်ခဲ့ပါတယ်။

ဧပြီ ၁၇ ရက်က ကုလသမဂ္ဂမှာ အမေရိကန်သံအမတ်ကြီး လင်ဒါ သောမတ်စ် ဂရင်းဖီးလ်က ဖတ်ပြခဲ့တဲ့ ကြေညာချက်ထဲမှာ နိုင်ငံရေးအရ ထိန်းသိမ်းထားသူတွေကို လွှတ်ပေးဖို့နဲ့ မီဒီယာအဖွဲ့ဝင်တွေ အပါအဝင် လွတ်လပ်စွာ ထုတ်ဖော်ပြောဆိုခွင့်ကို ပြင်းထန်စွာ နှိပ်ကွပ်တာကို အဆုံးသတ်ဖို့တွေ ဖော်ပြထားပါတယ်။

ကုလသမဂ္ဂဆိုင်ရာ ရုရှားသံအမတ်ကြီး ဗာစီလီ နေဘန်ဇီယာ ကတော့ ဒီထုတ်ပြန်ချက်နဲ့အပေါ် ဒါ သူနဲ့သက်ဆိုင်တဲ့ကိစ္စ မဟုတ်ကြောင်း၊ ဒီကိစ္စကို ကိုင်တွယ်ဖြေရှင်းတဲ့ ရုရှားအေဂျင်စီတွေနဲ့သာ ဆိုင်ကြောင်း၊ အပြစ်ရှိ မရှိကို တရားရုံးကပဲ ဆုံးဖြတ်ပေးနိုင်ကြောင်း ပြောသွားပါတယ်။

မနှစ်က ယူကရိန်းကို ရုရှားမကျူးကျော်ခင်လေးမှာပဲ ဝေါလ်စထရိဂျာနယ်က ခန့်အပ်ထားတဲ့ သတင်းထောက် အီဗန်ဂါ့ရှ်ကိုဗစ်ချ်ဟာ ပြီးခဲ့တဲ့လက အူရာလ်စ်တောင်တန်းမြို့ ယဲကာထရင်န်ဘာ့ဂ်မှာ ဖမ်းဆီးခံခဲ့ရတာပါ။

၁၉၈၆ ခုနှစ်နောက်ပိုင်း ရုရှားမှာ သူလျှိုလုပ်တယ်ဆိုတဲ့ စွပ်စွဲချက်နဲ့ အမေရိကန် သတင်းထောက်တဦးကို ပထမဆုံးအကြိမ် ဖမ်းဆီးထိန်းသိမ်းခံရတာ ဖြစ်ပါတယ်။

ဝေါလ်စထရိဂျာနယ် သတင်းစာကတော့ ထောင်ဒဏ် အနှစ် ၂၀ အထိ ချမှတ်ခဲ့တဲ့ စွဲချက်ကို ပယ်ချခဲ့ပါတယ်။

အိမ်ဖြူတော်ကလည်း အဲဒီစွဲချက်ကို အဓိပ္ပာယ်မဲ့တဲ့ လှောင်ရယ်စရာကိစ္စလို့ ခေါ်ဆိုခဲ့ပြီး သမ္မတ ဂျိုးဘိုင်ဒင်က ဂါ့ရှ်ကိုဗစ်ချ်ကို ဖမ်းဆီးထိန်းသိမ်းမှုဟာ လုံးဝတရားမဝင်ကြောင်း ပြောကြားခဲ့ပါတယ်။

ရုရှားရဲ့ ဖက်ဒရယ်လုံခြုံရေးဌာန FSB ကတော့ ဂါ့ရှ်ကိုဗစ်ချ်ဟာ ရုရှားနိုင်ငံရဲ့ စစ်ဘက်-စက်မှုလုပ်ငန်းဆိုင်ရာ အဆောက်အဦနဲ့ ပတ်သက်ပြီးတော့ နိုင်ငံတော်လျှို့ဝှက်ချက်တွေကို စုဆောင်းနေတယ်လို့ စွပ်စွဲထားတာပါ။

ကရင်မ်လင်က သူ့ကို လက်ပူးလက်ကြပ် ဖမ်းမိတာလို့ ပြောဆိုထားပေမဲ့လည်း အဲဒီ ပြောဆိုချက်ကို ပံ့ပိုးတဲ့ ဘာအထောက်အထားကိုမှ မထုတ်ပြန်ထားပါဘူး။

အမေရိကန်ပြည်ထောင်စုကတော့ ဂါ့ရှ်ကိုဗစ်ချ်ကို “မှားယွင်းစွာ ဖမ်းဆီးခံရခြင်း” အဖြစ် ပြီးခဲ့တဲ့သီတင်းပတ်က သတ်မှတ်ခဲ့ပြီး သူလျှိုစွဲချက်တွေဟာ အတုအယောင်သာဖြစ်ပြီးတော့ ဒီအမှုဟာ နိုင်ငံရေးအရ သက်ရောက်မှုရှိတယ်လို့ ဆိုထားပါတယ်။