နိုင်ငံတွင်းမှာ လျှပ်စစ်ဓာတ်အားလောက်အောင်မပေးနိုင်တဲ့ စစ်ကောင်စီဟာ ဆိုလာစနစ်ကနေရတဲ့ လျှပ်စစ်ဓာတ်အားတွေကို ပြည်သူတွေဆီကနေ ပြန်ဝယ်ဖို့ကြိုးစားနေပြီး ဆိုလာနဲ့ ဆက်စပ်ပစ္စည်းတွေကို ပြည်ပကနေ သွင်းတာအတွက်လည်း အကောက်ခွန်ကင်းလွတ်ခွင့်ပြုမယ်လို့ ကြေညာပါတယ်။

စစ်ကောင်စီရဲ့ စီမံကိန်းနဲ့ ဘဏ္ဍာရေးဝန်ကြီးက ဧပြီ ၂၀ ရက်စွဲနဲ့ ထုတ်ပြန်လိုက်တာဖြစ်ပြီး နိုင်ငံတော်အကျိုးအတွက် ပြည်တွင်းလျှပ်စစ်ဓာတ်အား လုံလောက်စေဖို့အတွက်လို့ ဆိုပါတယ်။

ကင်းလွတ်ခွင့်ပြုတဲ့ပစ္စည်းတွေကတော့ နေရောင်ခြည်ကကနေ စွမ်းအင်ထုတ်လုပ်ပေးနိုင်တဲ့ ဆိုလာချပ်တွေ၊ ပေါင်းစပ်ထိန်းချုပ်ကိရိယာတွေ၊ ဆိုလာ အင်ဗာတာ၊ အိမ်သုံးတပ်ဆင်မှုပုံစံတွေ၊ ရေပေါ်မှာတပ်ဆင်တဲ့စနစ်နဲ့ ဆိုလာထိန်းချုပ်ကိရိယာနဲ့ တွဲလျက်တင်သွင်းလာတဲ့ ဘက်ထရီတွေ ဖြစ်ပါတယ်။

မြန်မာနိုင်ငံမှာ စစ်ကောင်စီအာဏာသိမ်းပြီးနောက် တနှစ်ထက် တနှစ် လျှပ်စစ်ဓာတ်အားပေးနိုင်တဲ့ ပမာဏ လျော့လာနေပြီး ရန်ကုန်မှာတော့ ဆိုလာစနစ်ကနေရတဲ့ လျှပ်စစ်ဓာတ်အားတွေကို ပြန်ဝယ်ဖို့ကမ်းလှမ်းနေပါတယ်။

ရန်ကုန်မြို့က အဆောက်အဦတွေရဲ့ခေါင်မိုးတွေ၊ ကိုယ်ပိုင်မြေနေရာတွေမှာ တပိုင်တနိုင် တပ်ဆင်ထားတဲ့ အသေးစားဆိုလာစနစ်ကနေ လုပ်ငန်းအတွက်သုံးပြီး ပိုလျှံတဲ့ လျှပ်စစ်ဓာတ်အားတွေကို ရန်ကုန်ဓာတ်အားဖြန့်ဖြူးမှုကွန်ရက်ဆီ ချိတ်ဆက်ပြီး ရောင်းချနိုင်တယ်လို့ ရန်ကုန်လျှပ်စစ်ဓာတ်အားပေးရေးကော်ပိုရေးရှင်းက မနေ့က ကြေညာထားပါတယ်။

ဝယ်ယူမယ့်နှုန်းကတော့ ၁၀၀ ကီလိုဝပ်ကနေ ၁ မဂ္ဂါဝပ်အထိကို တယူနစ်အတွက် ၈၅ ကျပ်၊ ၁ မဂ္ဂါဝပ်ကနေ ၁၀ မဂ္ဂါဝပ်အထိကို တယူနစ် ကျပ် ၈၀ နဲ့ ဝယ်ယူမယ်လို့ဆိုပြီး လုပ်ငန်းစဉ်နဲ့ ပုံစံတွေကို ထပ်ပြီး ထုတ်ပြန်ပေးမယ်လို့ ဆိုပါတယ်။