ဆူဒန်နိုင်ငံမှာ လွန်ခဲ့တဲ့ ၆ရက်တာအတွင်း ပြင်းထန်တဲ့ တိုက်ပွဲတွေကြောင့် လူပေါင်း ၄၁၃ဦး သေဆုံးကာ ၃,၅၅၁ဦး ထိခိုက်ဒဏ်ရာရရှိခဲ့တယ်လို့  ဧပြီ ၂၁ ရက်မှာ ကမ္ဘာ့ကျန်းမာရေးအဖွဲ့ (WHO)က အတည်ပြုပါတယ်။ 

WHO ရဲ့ ပြောရေးဆိုခွင့်ရှိသူ မာဂရက် ဟားရစ်(စ်) က "ဒီအရေအတွက်ကို လောလောဆယ်မှာ ရရှိထားပြီး ဒီ့ထက် တိုးလာခဲ့ရင်လည်း အံ့သြစရာ မဟုတ်တော့ပါဘူး" လို့ ဂျနီဗာမြို့မှာ ပြုလုပ်တဲ့ သတင်းစာရှင်းလင်းပွဲအတွင်း ပြောဆိုပါတယ်။ 

ဧပြီ ၂၀ ရက်အထိ ဆူဒန်နိုင်ငံမှာ လူပေါင်း ၃၃၀ ဦး သေဆုံးခဲ့ပြီး ၃,၂၀၀နီးပါး ဒဏ်ရာရရှိခဲ့တယ်လို့ WHOက သတင်းထုတ်ပြန်ခဲ့ပါသေးတယ်။ 

ဒီသတင်းစာရှင်းလင်းပွဲမှာပဲ ယူနီဆက်ဖ် ရဲ့ ပြောရေးဆိုခွင့်ရှိသူ ဂျိမ်းစ် အယ်လ်ဒါက ဆူဒန်နိုင်ငံရဲ့ စစ်ရေး ပဋိပက္ခအတွင်း အနည်းဆုံး ကလေးငယ် ၉ ဦး သေဆုံးခဲ့တဲ့အပြင် အယောက် ၅၀ ထက်မနည်း ထိခိုက်ဒဏ်ရာ ရရှိခဲ့တယ်လို့ ဆိုပါတယ်။ 

"ဒီလိုတိုက်ပွဲတွေ ဆက်ဖြစ်နေသရွေ့တော့ အရေအတွက်က တိုးလာဦးမှာပဲ" လို့ သူက ဖြည့်စွက်ပြောပါတယ်။

ဒီတိုက်ပွဲတွေကြားမှာ အာဟာရချို့တဲ့နေတဲ့ ကလေးတွေနဲ့ ပက်သက်ပြီး စိုးရိမ်ပူပန်ကြောင်း အယ်လ်ဒါက ပြောဆိုခဲ့သလို "အရေးကြီးတဲ့ အသက်ကယ်ဆယ်ရေးဆိုင်ရာ အကူအညီတွေကို ကလေးပေါင်း ၅ သောင်း ဝန်းကျင်အတွက် ပေးအပ်ရာမှာလည်း အန္တရာယ်ရှိနေတယ်" လို့ သူက မှတ်ချက်ပေးပါတယ်။