အာဏာသိမ်း ၂ နှစ်ကျော် ကာလအတွင်း  နိုင်ငံတဝန်းမှာ စစ်ကောင်စီက ချိပ် ပိတ်သိမ်းဆည်းခဲ့တဲ့ နေအိမ်၊ အဆောက်အဦနဲ့ အကြီးစားပစ္စည်းစတဲ့ ပိုင်ဆိုင်မှုပေါင်း အနည်းဆုံး ၇၅၁ ခု ရှိခဲ့တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။

၂၀၂၁ ခုနှစ် ဖေဖော်ဝါရီ ၁ ရက်ကနေ အခုနှစ် မတ် ၃၁ ရက်အထိ စစ်အုပ်စုက မြန်မာနိုင်ငံအနှံ့က ဒီမိုကရေစီအရေး တက်ကြွလှုပ်ရှားသူတွေကို ပစ်မှတ်ထားပြီးတော့ သူတို့ရဲ့ ပိုင်ဆိုင်မှုတွေကို အဓမ္မချိပ်ပိတ်သိမ်းဆည်းမှုတွေကို ကျူးလွန်နေကြတာ ဖြစ်ပါတယ်။

လတ်တလောမှာတော့ အဆိုပါ ချိပ်ပိတ်သိမ်းဆည်းမှု ၇၅၀ ကျော်ထဲမှာ ဒီမိုကရေစီ ရေးတက်ကြွလှုပ်ရှားသူနဲ့ အရပ်သား ၆၃၆ ယောက်ရဲ့ ပိုင်ဆိုင်မှုတွေပါဝင်ပြီး အဲဒီထဲက အနည်းဆုံးလူအယောက် ၃၀၀ ကတော့ လွှတ်တော်အမတ်တွေ၊ အမျိုးသားဒီမိုကရေစီအဖွဲ့ချုပ် အဖွဲ့ဝင်တွေ၊ ဒါမှမဟုတ် ထောက်ခံသူတွေ ပါဝင်တယ်လို့ အေအေပီပီက ပြောပါတယ်။

အေအေပီပီက စုဆောင်းကောက်ယူထားတဲ့ စာရင်းတွေအရ ချိပ်ပိတ်သိမ်းဆည်းမှုတွေဟာ ဒီမိုကရေစီအရေးလှုပ်ရှားမှုကို ထောက်ခံအားပေးမှုကြောင့် ပစ္စည်းဥစ္စာပိုင်ဆိုင်သူကို စစ်အုပ်စုက ဖမ်းဆီးဖို့ရည်ရွယ်တာ၊ ဒါမှမဟုတ် လက်တွေ့အမှန်တကယ် ဖမ်းဆီးတာတွေနဲ့ စပ်လျဉ်းပြီးတော့ မကြာခဏ ဖြစ်ပွားလေ့ရှိတာကို တွေ့ရှိရတယ်လို့ ဆိုပါတယ်။

ချိပ်ပိတ်သိမ်းဆည်းမှု အမျိုးအစားတွေထဲမှာတော့ အိမ်နဲ့ တိုက်ခန်းက ၆၄၁ လုံးနဲ့ အများဆုံး ပါဝင်နေပြီး ဆိုင်၊ စီးပွားရေးလုပ်ငန်း၊ ခြံ၊ ဆေးရုံဆေးခန်း၊ စားသောက်ဆိုင်၊ စာသင်ကျောင်း၊ တည်းခိုခန်း၊ ဟိုတယ်နဲ့ ဘာသာရေးအဆောက်အအုံတွေပါမချန် ပြောင်ပြောင်တင်းတင်း သိမ်းဆည်းထားခဲ့တာကို တွေ့ရပါတယ်။

ဒါ့အပြင် တိုင်းဒေသကြီးနဲ့ ပြည်နယ်အလိုက် ချိပ်ပိတ်သိမ်းဆည်းခံရတဲ့ ရာခိုင်နှုန်းအရ ကြည့်မယ်ဆိုရင် မြေပြင်တိုက်ပွဲတွေ ပြင်းထန်နေတဲ့ စစ်ကိုင်းတိုင်းမှာ အများဆုံးချိပ်ပိတ် သိမ်းဆည်းခံရတာကို တွေ့ရပြီး အဲဒီနောက်မှာတော့ ရန်ကုန်တိုင်းနဲ့ မန္တလေးတိုင်းတွေက အစဉ်လိုက် အများဆုံးဖြစ်နေတာကို တွေ့ရပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ် ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာ ဖြစ်ပါတယ်။

ဒါ့အပြင် တိုင်းဒေသကြီးနဲ့ ပြည်နယ်တွေအနှံ့အပြား ဒေသခံ ပြည်သူ့ကာကွယ်ရေး တပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေလည်း ပြင်းထန်နေပါတယ်။