ဆူဒန်မှာ ဆက်လက်ဖြစ်ပွားနေတဲ့ ပဋိပက္ခတွေဟာ အာဖရိက အရှေ့မြောက်ပိုင်းဒေသတခုလုံးကို မတည်မငြိမ်ဖြစ်စေနိုင်ကြောင်း ကမ္ဘာ့စားနပ်ရိက္ခာအစီအစဉ် (WFP) မှ တာဝန်ရှိသူတဦးက မေ ၂ ရက်မှာ သတိပေး ပြောကြားခဲ့ပါတယ်။

စစ်ပွဲကြောင့် လူပေါင်း ၁ သိန်းကျော် နိုင်ငံရဲ့နယ်စပ်တွေကို ဖြတ်ကျော်ထွက်ပြေးခဲ့ရပြီး တိုက်ပွဲတွေ ဖြစ်ပွားနေတဲ့ တတိယပတ်မှာ လူသားချင်းစာနာထောက်ထားမှုဆိုင်ရာ အကျပ်အတည်းကို ဖန်တီးနေကြောင်း ကုလသမဂ္ဂ တာဝန်ရှိသူတွေက ပြောပါတယ်။

နောက်ထပ် အပစ်အခတ် ရပ်စဲရေးကိုလည်း စစ်ပွဲတွေဆင်နွှဲနေတဲ့ အင်အားစုတွေက ချိုးဖောက်ခဲ့ကြောင်း ဆိုပါတယ်။

ဆူဒန်ရဲ့ ဆင်းရဲတဲ့ အိမ်နီးချင်းနိုင်ငံတွေဟာ ဒုက္ခသည်အကျပ်အတည်းကို ကိုင်တွယ်ဖြေရှင်းပေးနေပြီး လူဦးရေ ၃ ပုံ ၂ ပုံလောက်က ပြင်ပ အထောက်အပံ့တချို့ကို မှီခိုနေရတဲ့ နိုင်ငံတွင်း အကူအညီပေးရေး လမ်းကြောင်းတွေကို ပိတ်ဆို့ တိုက်ခိုက်နေတာကြောင့် ပဋိပက္ခဟာ ပိုမိုကျယ်ပြန့်တဲ့ ဘေးဒုက္ခအသွင် ဆောင်သွားနိုင်တဲ့ အန္တရာယ်ရှိကြောင်း လူသားချင်းစာနာထောက်ထားမှုဆိုင်ရာ ဝန်ထမ်းတွေက ပြောပါတယ်။

ဒေသတွင်း ပဋိပက္ခရဲ့ လှိုင်းလုံးသက်ရောက်မှုက ထင်ရှားနေတယ်လို့ ကမ္ဘာ့စားနပ်ရိက္ခာအစီအစဉ် (WFP) ရဲ့ ဒေသဆိုင်ရာ ဆက်သွယ်ရေးအရာရှိ ဘရန်ဒါ ကာရူကီ က ရိုက်တာကို ပြောပါတယ်။

ဒါဟာ တကယ့်ကို စိုးရိမ်စရာဖြစ်ပြီး ငြိမ်းချမ်းရေးရဖို့ပဲ လိုအပ်ကြောင်းနဲ့ ဒီဒေသတခုလုံး မတည်မငြိမ် ဖြစ်နိုင်ခြေရှိလို့ စစ်ဖြစ်နေတဲ့ ၂ ဖွဲ့ ပူးပေါင်းပြီးတော့ ပဋိပက္ခ ပြေလည်ဖို့အတွက် နည်းလမ်းရှာဖို့ လိုအပ်ကြောင်းလည်း သူကဆိုပါတယ်။

WFP ရဲ့ အဖွဲ့ဝင်တဦး သေဆုံးမှုအပြီးမှာ WFP ဟာ ဆူဒန်က သူ့ရဲ့လုပ်ငန်းဆောင်တာတွေကို ဆိုင်းငံ့ထားမှာဖြစ်ကြောင်း မေ ၁ ရက်က ထုတ်ပြန် ကြေညာခဲ့ပါတယ်။

ဧပြီ ၁၅ ရက်က ဆူဒန်စစ်တပ်နဲ့ အရန် အမြန်ထောက်ပံ့ရေးတပ်ဖွဲ့ (RSF) တို့ကြား ရုန်းရင်းဆန်ခတ်မှုကြောင့် သူ့ရဲ့ဝန်ထမ်း ၃ ဦး သေဆုံးပြီးနောက်မှာ အေဂျင်စီဟာ ဆူဒန်က သူ့ရဲ့လုပ်ငန်းလည်ပတ်မှု အားလုံးကို ယာယီ ရပ်ဆိုင်းထားခဲ့ပါတယ်။