တူရကီနိုင်ငံမြို့တော် အန်ကာတာမှာ မေလ ၄ ရက်က ကျင်းပတဲ့ ပင်လယ်နက်နိုင်ငံများ အစည်းအဝေးမှာ ရုရှားကိုယ်စားလှယ်တဦးရဲ့ မျက်နှာကို  ယူကရိန်း လွှတ်တော်အမတ်တဦးက ထိုးကြိတ်ခဲ့လို့ ရုန်းရင်းဆန်ခတ်ဖြစ်ပွားပြီး တာဝန်ရှိသူတွေက ဝိုင်းဝန်း ဖျန်ဖြေပေးခဲ့ရပါတယ်။

အစည်းအဝေးကျင်းပတဲ့ လွှတ်တော်အဆောင်အအုံမှာ ရုရှားအမျိုးသမီး ကိုယ်စားလှယ်တဦးက တယ်လီဖုန်းကနေတဆင့် အင်တာဗျူးလုပ်နေစဉ်  ယူကရိန်း ကိုယ်စားလှယ်က အနောက်ကနေ ယူကရိန်းအလံကိုဖြန့်ပြီး အနှောင့်အယှက်ပေးခဲ့တယ်ဆိုပြီး တခြားရုရှားကိုယ်စားလှယ်တဦးက အလံကိုဆွဲယူသွားစဉ်  ယူကရိန်းကိုယ်စားလှယ်က လိုက်လံထိုးကြိတ်ခဲ့တာပါ။

ဒီမတိုင်ခင်ကလည်း အစည်းအဝေးမှာ ရုရှားကိုယ်စားလှယ်ရဲ့ မိန့်ခွန်းပြောဖို့လုပ်နေစဉ် ယူကရိန်းကိုယ်စားလှယ်တွေက နိုင်ငံအလံကို ကိုင်ဆောင်ရင်း အော်ဟစ် ကြွေးကြော်ဆန္ဒပြခဲ့ရာ သူတို့ကို အပြင်ဆွဲထုတ်ဖို့ ကြိုးပမ်းခဲ့တဲ့ လုံခြုံရေးအရာရှိတွေနဲ့ ရုန်းရင်းဆန်ခတ် ဖြစ်ပွားခဲ့ပါတယ်။ 

ဒီလို အနှောင့်အယှက်ဖြစ်စေခဲ့တဲ့ ဓာတ်ပုံတွေကို တူရကီ ပါလီမန်ရဲ့ ဝက်ဘ်ဆိုဒ်ပေါ်မှာ ထုတ်ပြန် ခဲ့တဲ့အပြင် ပါလီမန်အကြီးအကဲဖြစ်သူ မူစတာဖာ ဆန်းတော့ပ်ကလည်း ပြင်းထန်စွာ အခုလိုဝေဖန်ခဲ့ပါတယ်။ 

တူရကီနိုင်ငံအနေနဲ့ ငြိမ်းချမ်းတဲ့ ပတ်ဝန်းကျင်တစ်ခုကို ထူထောင်ရာမှာ အနှောင့်အယှက် ဖြစ်စေတဲ့ အပြုအမူမျိုးတွေကို ပြစ်တင်ရှုတ်ချပါတယ်လို့  ပြောကြားခဲ့ပါတယ်။