ဟောင်ကောင်ရဲတပ်ဖွဲ့ဟာ အဖျက်အမှောင့် လှုံ့ဆော်ဖို့ ကြိုးပမ်းမှုနဲ့ ဆက်စပ်နေတယ်ဆိုတဲ့ အထိမ်းအမှတ် ပစ္စည်းတခုကို မေလ ၅ ရက် သောကြာနေ့က သိမ်းဆည်းလိုက်ပါတယ်။

အဲဒီပစ္စည်းဟာ ၁၉၈၉ ခုနှစ်က ပေကျင်းမြို့တော် တီအန်နန်မင်ရင်ပြင်မှာ ဒီမိုကရေစီ ဆန္ဒပြသူတွေကို အကြမ်းဖက်ဖြိုခွင်းမှု အထိမ်းအမှတ်ဖြစ်တဲ့ 'Pillar of Shame' ရုပ်တု ဖြစ်ကြောင်း မီဒီယာတွေက ဖော်ပြပါတယ်။

ရဲတပ်ဖွဲ့ကတော့ ဗြိတိသျှကိုလိုနီဟောင်းဖြစ်တဲ့ ဟောင်ကောင်ကျွန်းရဲ့ ယွမ်လုံခရိုင်မှာ သူတို့ဖမ်းဆီးထားတယ်ဆိုတဲ့ ပစ္စည်းနဲ့ပတ်သက်ပြီး အသေးစိတ်ပြောကြားခြင်းမရှိပါဘူး။ 

အလေးချိန် ၂ တန်ရှိ Pillar of Shame ရုပ်တုကို ၁၉၉၇ ခုနှစ်က ဟောင်ကောင်မှာ ပထမဆုံးပြသခဲ့ပြီး အဲဒီနှစ်မှာပဲ ဗြိတိန်ကဟောင်ကောင်ကို တရုတ်နိုင်ငံဆီ ပြန်ပေးအပ်ခဲ့ပါတယ်။

၂၀၂၁ ခုနှစ်မှာ ဟောင်ကောင်တက္ကသိုလ်ဟာ ရုပ်တုကို ဖြိုဖျက်ပြီး ဖယ်ရှားခဲ့ပေမဲ့ တက္ကသိုလ်ပိုင်မြေပေါ်မှာ ကုန်သေတ္တာတခုထဲမှာ သိမ်းဆည်းထားခဲ့ပါတယ်။

နှစ်စဉ် ဇွန်လ ၄ ရက် တီအန်နန်မင်ရင်ပြင် အကြမ်းဖက်ဖြိုခွင်းမှု နှစ်ပတ်လည်နေ့ မတိုင်ခင် သီတင်းပတ်တွေအတွင်း ဖမ်းဆီးရမိခဲ့တာပါ။ ဟောင်ကောင်ဟာ ဒီမိုကရေစီဖြိုခွင်းခံရမှု အထိမ်းအမှတ်အတွက် ကမ္ဘာပေါ်မှာ နှစ်စဉ် အကြီးမားဆုံး လှုံ့ဆော်ဆန္ဒပြပွဲတွေကို ကျင်းပလေ့ရှိပါတယ်။