ကချင်ပြည်နယ် ဖားကန့်မြိုနယ် လုံးခင်းကျေးရွာအုပ်စုမှာ မေ ၇ ရက် နေ့လယ်က ကားဝပ်ရှော့ လုပ်ငန်းလုပ်ကိုင်သူ အမျိုးသားတဦးကို  စစ်ကောင်စီတပ်က ဖမ်ဆီးသွားတယ်လို့ ဒေသခံတွေက ပြောပါတယ်။

လယ်ပြင်ကျေးရွာက ကားဝပ်ရှော့ဆိုင်ကို စစ်ကောင်စီတပ်က သေနတ်ပစ်ဖောက်ဝင်ရောက် စီးနင်းပြီး  ကားဝပ်ရှော့လုပ်ကိုင်နေတဲ့ အသက် ၃၀ အရွယ် အမျိုးသားတဦးကို ဖမ်းဆီးသွားတာလို့ ဆိုပါတယ်။

ဒေသခံတဦးက “နေ့လယ် ၁ နာရီလောက်  သေနတ်တွေ ပစ်ခတ်ပြီး ဝပ်ရှော့ကို ဝင်စီးတာ။ အဲဒီမှာ ကားပြင်လုပ်ငန်းလုပ်နေတဲ့ ကိုဖိုးသားကို ဝင်ဖမ်းတာ” လို့ ပြောပါတယ်။

ကိုဖိုးသားကို ကချင်လွတ်မြောက်ရေးတပ်မတော် (KIA)၊ ပြည်သူ့ကာကွယ်ရေးတပ် (PDF) တို့နဲ့ ပတ်သက်မှုရှိတယ်ဆိုပြီး စစ်ကောင်စီတပ်က ဖမ်းဆီးခဲ့တာလို့ ဆိုပါတယ်။

ကားဝပ်ရှောနဲ့ နီးစပ်သူတဦးက “ကားဝပ်ရှော့မှာက တခါတလေ KIA က ကားလာပြင်တာတွေရှိတယ်။ ကားဝပ်ရှော့ ကားလာပြင်တော့ မပြင်ပေးလို့မှ မရတာ ပြင်ပေးရတာပဲ။ အဲ့ဒါကို ပတ်သက်ဆက်နွှယ်တယ်ဆိုပြီး ဖမ်းသွားတာ” လို့  ပြောပါတယ်။

ဖားကန့်မြို့နယ်မှာ စစ်ကောင်စီတပ်က ဒေသခံပြည်သူတွေကို မကြာခဏ ဖမ်းဆီးတာတွေ ပြုလုပ်နေပြီး  မေ ၄ ရက်ကလည်း မှော်ဝမ်း ရပ်ကွက်က အမျိုးသားနှစ်ဦးနဲ့ ဧပြီ ၁၈ ရက်နေ့က ဆိုင်းဖရာကျေးရွာကို ဝင်ရောက်စီးနင်းပြီး အမျိုးသား၊ အမျိုးသမီး အယောက် ၃၀ ထက်မနည်း ဖမ်းဆီးခဲ့သလို ဧပြီ ၂၈ ရက်ကလည်း မှော်ရှန်ရပ်ကွပ်မှာရှိတဲ့ နေအိမ်တလုံးမှာ PDF တွေ ဝင်ရောက်နေထိုင်တယ်ဆိုတဲ့အကြောင်းပြချက်နဲ့ နေအိမ်ကို မီးရှို့ ဖျက်ဆီးခဲ့ပါသေးတယ်။