ရုရှားဟာ ပင်လယ်နက်ထဲကို ဝင်လာမယ့် သင်္ဘောတွေကို မှတ်ပုံတင်ခွင့်ပြုဖို့ ငြင်းဆန်ရင်း ပင်လယ်နက်ကိုဖြတ်သန်းပြီး ကောက်ပဲသီးနှံသယ်ဖို့ သဘောတူညီချက်ကို ထိထိရောက်ရောက် ရပ်တန့်လိုက်ပြီလို့ ယူကရိန်း ပြန်လည်တည်ဆောက်ရေးဝန်ကြီးဌာနက မေ ၈ ရက်မှာ ပြောလိုက်ပါတယ်။

ရုရှားရဲ့ ဒီလုပ်ရပ်က လက်ရှိသဘောတူညီချက်ရဲ့ စည်းကမ်းချက်တွေကို ဆန့်ကျင်နေတယ်လို့ ဝန်ကြီးဌာနက ထုတ်ပြန်ချက်ထဲမှာ ဖော်ပြထားပါတယ်။

ယူကရိန်းရဲ့ ပင်လယ်နက်ဆိပ်ကမ်းတွေကို မနှစ်က ရုရှားက ကျူးကျော်ပြီးတဲ့နောက် ပိတ်ဆို့ထားပေမဲ့ အဲဒီထဲက ၃ ခုကို ရုရှားနဲ့ ယူကရိန်းတို့ကြား သဘောတူညီချက်အရ ပြီးခဲ့တဲ့ ဇူလိုင်လက ပြန်ဖွင့်ပေးခဲ့ပါတယ်။

ကုန်တင်ဆောင်ဖို့ သင်္ဘော ၆၂ စင်း အပါအဝင် သင်္ဘောအစီး ၉၀ ဟာ ယူကရိန်း ဆိပ်ကမ်းတွေဆီ သွားဖို့ ခွင့်ပြုချက်အတွက် တူရကီရေပိုင်နက်မှာ စောင့်ဆိုင်းနေတယ်လို့ ဝန်ကြီးဌာနက ဆိုပါတယ်။

သဘောတူညီချက်ဟာ မေ ၁၈ ရက်မှာ သက်တမ်းကုန်ဆုံးမှာပါ။ ရုရှားအစိုးရကတော့ ကမ္ဘာ့စားနပ်ရိက္ခာ အကျပ်အတည်းကို ဖြေလျှော့ဖို့ ရည်ရွယ်ထားတဲ့ သဘောတူညီချက်ကနေ နုတ်ထွက်မယ်လို့ ခြိမ်းခြောက်ထားပါတယ်။

တူရကီနဲ့ ကုလသမဂ္ဂတို့ကတော့ သဘောတူညီချက်ကို သက်တမ်းတိုးဖို့ လုပ်ဆောင်နေပါတယ်။