ထိုင်း-မြန်မာနယ်စပ်၊ ထိုင်းနိုင်ငံဘက်ခြမ်း၊ ချင်းရိုင်ခရိုင်၊ မယ်ဆိုင်မြို့က နေအိမ် တလုံးမှာ ထိုင်းအာဏာပိုင်တွေက သတင်းအရ ဝင်ရောက်ရှာဖွေခဲ့ရာကနေ လက်နက်ခဲယမ်း ၁ဝဝ ကျော် ဖမ်းဆီးရမိခဲ့တယ်လို့ ထိုင်းနိုင်ငံအခြေစိုက် Maesai press သတင်းဌာနက ဖော်ပြထားပါတယ်။

ချင်းရိုင်ခရိုင်၊ မယ်ဆိုင်မြို့၊ ဆရီချိုင်ယာဖန်းရွာနားက နေအိမ်တလုံးကို မသင်္ကာဖွယ် သတင်းရရှိခဲ့တဲ့အတွက် မေ ၉ ရက် မနက်ပိုင်းက ရှာဖွေရေးဝရမ်းထုတ်ကာ ထိုင်းရဲတပ်ဖွဲ့၊ ခရိုတက်ခ် စစ်ထောက်လှမ်းရေးအဖွဲ့၊ နယ်ခြားစောင့်တပ်တွေနဲ့ ဝင်ရောက်စီးနင်း ရှာဖွေခဲ့ရာကနေ လက်နက်တွေ သိမ်းဆည်းရမိခဲ့တာပါ။

ဝင်ရောက်ရှာဖွေရာ အဆိုပါအိမ်အတွင်း သေနတ်အတိုတလက်၊ အရှည်တလက်နဲ့ ခဲယမ်းတွေ သိမ်းဆည်းရမိပြီး နောက်ထပ်အခန်းတခန်းကို ဆက်လက်ရှာဖွေရာ ပါဆယ်သေတ္တာတွေနဲ့ ထုပ်ပိုးထားတဲ့ လက်နက်နဲ့ ဆက်စပ်ပစ္စည်း ၁ဝဝ ကျော်ကို သိမ်းဆည်းရမိခဲ့တာဖြစ်ပြီး အခုလို ဖမ်းဆီးရမိတဲ့အိမ်နေရာ ဆရီချိုင်ရွာက မြန်မာနိုင်ငံ၊ တာချီလိတ်မြို့ နယ်စပ်မှာတည်ရှိပြီး လက်နက်တွေနဲ့အတူ ဖမ်းဆီးရမိတဲ့ အမျိုးသားက မြန်မာလား ထိုင်းလူမျိုးလား ဆိုတာကိုတော့ ဖော်ပြထားခြင်း မရှိပါဘူး။

လက်ရှိမှာတော့ ရွေးကောက်ပွဲကာအတွင်း မှုခင်းကျဆင်းရေး စီမံချက်နဲ့ နယ်စပ်လူကုန်ကူးမှုတွေ၊ တရားမဝင် လုပ်ဆောင်နေတဲ့ လုပ်ငန်းတွေကို အထူးတိုက်ဖျက်နေတာဖြစ်ပြီး ပြီးခဲ့တဲ့ မေ ၈ ရက်ကလည်း မဲဆောက်မြို့ရဲစခန်းမှာ ၃ နိုင်ငံ နယ်စပ်လူကုန်ကူးမှုကျဆင်းရေး တွေ့ဆုံပွဲတခု ပြုလုပ်ခဲ့ပါတယ်။