တရုတ်နိုင်ငံရဲ့ စီးပွားရေးမြို့တော် ရှန်ဟိုင်းက ကနေဒါကောင်စစ်ဝန်ချုပ်ရုံးက သံတမန်တယောက်ကို နှင်ထုတ်လိုက်ပြီလို့ တရုတ်နိုင်ငံခြားရေးဝန်ကြီးဌာန ပြောခွင့်ရက မေ ၉ ရက်မှာ ကြေညာခဲ့ပါတယ်။

ကနေဒါနိုင်ငံ တိုရွန်တိုမြို့က တရုတ်ကောင်စစ်ဝန်ချုပ်ရုံးမှာရှိတဲ့ သံတမန်တယောက်ကို ကနေဒါအစိုးရက မေ ၉ ရက် အစောပိုင်းမှာ နှင်ထုတ်ခဲ့ပြီးနောက် တရုတ်ဘက်က ပြန်လည်တုံ့ပြန်လိုက်တာပါ။

ကနေဒါအစိုးရရဲ့ လုပ်ရပ်ကို တရုတ်က အပြင်းအထန် ပြစ်တင်ရှုတ်ချပြီး ခိုင်ခိုင်မြဲမြဲ ဆန့်ကျင်တယ်လို့ ပြောရင်း အသည်းအသန် ကန့်ကွက်ခဲ့ပါတယ်။

အဲဒီနောက် လက်တုံ့ပြန်တဲ့အနေနဲ့ ကနေဒါကောင်စစ်ဝန် ဂျနီဖာ လင်း လာလွန်ဒေကို မေ ၁၃ ရက် မတိုင်ခင် ရှန်ဟိုင်းကနေ ထွက်သွားဖို့ နှင်ထုတ်ခဲ့တယ်လို့ ပြောခွင့်ရက ဆိုပါတယ်။

တရုတ်နိုင်ငံမှာ နောက်ထပ် တုံ့ပြန်ဖို့ အခွင့်အရေး ရှိသေးတယ်လို့လည်း ပြောခဲ့ပါတယ်။