ကမ္ဘောဒီးယားနိုင်ငံဟာ ဖုန်းနဲ့အွန်လိုင်း လိမ်လည်မှုတွေမှာ ပါဝင်ပတ်သက်မှုနဲ့ သံသယရှိ ဂျပန်နိုင်ငံသား ၁၉ ဦးကို ပြည်နှင်ဒဏ်ပေးပြီး ဧပြီလ ၁၁ ရက်မှာ ဂျပန်နိုင်ငံကို ပြန်ပို့ခဲ့ကြောင်း ကမ္ဘောဒီးယားရဲတပ်ဖွဲ့က ပြောပါတယ်။
ရဲကားကြီးတစ်စီးဟာ အင်္ဂါနေ့မွန်းလွဲပိုင်းက ဖနွမ်းပင်အပြည်ပြည်ဆိုင်ရာလေဆိပ်သို့ ရောက်ရှိလာခဲ့ပြီး သံသယရှိသူတွေကို ရဲဘတ်စ်ကားပေါ်ကနေ ဂျပန်နိုင်ငံကို ပျံသန်းမယ့် မလေးရှားလေကြောင်းလိုင်း လေယာဉ်ဆီကို လွှဲပြောင်းပေးခဲ့ပါတယ်။
အားလုံး အမျိုးသားတွေချည်းဖြစ်တဲ့ ဂျပန်နိုင်ငံသားတွေကို ဇန်နဝါရီ လနှောင်းပိုင်းက တောင်ပိုင်း ဆီဟာနုခ်ဗီးလ်မြို့မှာ ရဲတပ်ဖွဲ့ရဲ့စစ်ဆင်ရေးတစ်ခုမှာ ဖမ်းဆီးခဲ့တာဖြစ်ကြောင်း ကမ္ဘောဒီးယား ပြည်ထဲရေးဝန်ကြီးဌာနက ပြောပါတယ်။
အဲဒီနောက် သူတို့ကို မြို့တော် ဖနွမ်းပင်ကို ပို့ဆောင်လိုက်ပြီး ဂျပန်နိုင်ငံကို ပြန်ပို့တဲ့အထိ အဲဒီမှာပဲ ထိန်းသိမ်းခဲ့ပါတယ်။
သံသယရှိသူ ၁၉ ဦးစလုံးဟာ ဂျပန်နိုင်ငံကို လေကြောင်းခရီးနဲ့ လိုက်ပါသွားပြီဖြစ်ကြောင်း ကမ္ဘောဒီးယား ရဲတပ်ဖွဲ့ ပြောရေးဆိုခွင့်ရှိသူ ချောင်ကင်ခွန်က အတည်ပြု ပြောကြားခဲ့ပါတယ်။
ဂျပန်မီဒီယာတွေရဲ့ဖော်ပြချက်အရ တိုကျိုရဲတပ်ဖွဲ့ဟာ သံသယရှိသူ ၁၉ ဦးလုံးကို ဖမ်းဝရမ်း ထုတ်ထားကြောင်း သိရပါတယ်။
၂၀၂၃ ခုနှစ်အရှေ့တောင်အာရှအားကစားပြိုင်ပွဲ (ဆီးဂိမ်းစ်)မှာ မြန်မာအမျိုးသား ယူ-၂၂ ဘောလုံးအသင်းက အိမ်ရှင်ကမ္ဘောဒီးယား၊ အင်ဒိုနီးရှားတို့ ပါဝင်တဲ့အုပ်စု (က) မှာ ကျရောက်ခဲ့ပါတယ်။
ဘောလုံးပြိုင်ပွဲအတွက် မဲခွဲပွဲကို ဧပြီ ၅ ရက်က ပြုလုပ်ခဲ့တာဖြစ်ပြီး မြန်မာအသင်းက ကမ္ဘောဒီးယား၊ အင်ဒိုနီးရှား၊ ဖိလစ်ပိုင်၊ အရှေ့တီမာအသင်းတွေနဲ့ အုပ်စု (က)မှာတွေ့ဆုံခဲ့တာပါ။
တဖက်အုပ်စု(ခ)မှာတော့ ဗီယက်နမ်၊ ထိုင်း၊ မလေးရှား၊ စင်ကာပူနဲ့ လာအိုအသင်းတို့ တွေ့ဆုံပါတယ်။
အမျိုးသမီးပြိုင်ပွဲအုပ်စုမဲခွဲရာမှာတော့ မြန်မာအမျိုးသမီးအသင်းက ဗီယက်နမ်၊ ဖိလစ်ပိုင်၊ မလေးရှား၊ အင်ဒိုနီးရှားတို့နဲ့ အုပ်စု (က)မှာ ကျရောက်ပါတယ်။
ဒါပေမဲ့ မဲခွဲပြီးနာရီပိုင်းအတွင်းမှာပဲ အင်ဒိုနီးရှားအသင်းက ပြိုင်ပွဲကနေ နုတ်ထွက်ခဲ့တယ်လို့ သိရပါတယ်။
တစ်ဖက်အုပ်စု(ခ)မှာ အိမ်ရှင်ကမ္ဘောဒီးယား၊ ထိုင်း၊ စင်ကာပူနဲ့ လာအို အမျိုးသမီးအသင်းတို့ တွေ့ဆုံပါတယ်။
ဖူဆယ်ပြိုင်ပွဲမှာတော့ မြန်မာအပါအဝင် အသင်း ၅ သင်းက ပတ်လည် ယှဉ်ပြိုင်ကြရမှာဖြစ်ပါတယ်။
၃၂ ကြိမ်မြောက်ကျင်းပမယ့် ဆီးဂိမ်းစ်ပြိုင်ပွဲကို လာမယ့် မေလ ၅ ရက်ကနေ ၁၇ ရက်အထိ ကျင်းပမှာဖြစ်ပြီး ဘောလုံးပွဲစဉ်တွေကိုတော့ ဧပြီ ၂၉ ရက်မှာ စတင်မယ်လို့ သိရပါတယ်။
