နွေဦးတော်လှန်ရေးမှာ တက်ကြွစွာ ပါဝင်နေတဲ့ မင်းသား အကယ်ဒမီ မင်းမော်ကွန်း ဦးဆောင်တဲ့ “ကန့်ဘလူအကြွေး” ကမ်ပိန်းဟာ ပြီးဆုံးဖို့ ၁ ရက်သာကျန်တော့ကာ လတ်တလောမှာတော့ ငွေကျပ်သိန်း ၄,၇၀၀ ကျော် ရရှိနေပြီလို့ ထုတ်ပြန်ပါတယ်။
“ပထမအဆင့်အနေနဲ့ ရန်ပုံငွေရှာလို့ ပြီးပါတော့မယ်။ ဒုတိယကိစ္စ ဆက်သွားဖို့ တရက်ပဲ လိုပါကြောင်းဗျာ။ ‘ကန့်ဘလူအကြွေး’ ကမ်ပိန်း ၁ ရက်သာ ကျန်ပါတော့တယ်။ လက်ရှိ အချိန်ထိ ကျပ်သိန်းပေါင်း ၄,၇၃၄ ကျော် ရရှိထားပါတယ်။ ကန့်ဘလူအကြွေး ပြန်ယူချင်သူတွေအတွက် နောက်ဆုံးတရက်မှာ အစွမ်းကုန် အားဖြည့်ပေးကြပါအုံးခင်ဗျား။”
ပြီးခဲ့တဲ့ ဧပြီ ၁၁ ရက် မနက် ၈ နာရီဝန်းကျင်မှာ စစ်ကိုင်းတိုင်း၊ ကန့်ဘလူမြို့နယ်ထဲက ပဇီကြီးကျေးရွာကို စစ်ကောင်စီက ဂျက်တိုက်လေယာဉ်နဲ့ အင်အားပြင်းဗုံးကြဲချခဲ့သလို Mi35 စစ်ရဟတ်ယာဉ်နဲ့ ၄ ကြိမ်ထက်မနည်း ပစ်ခတ်တိုက်ခိုက်ခဲ့တာကြောင့် ကလေးသူငယ်တွေ၊ ကိုယ်ဝန်ဆောင်မိခင်တွေ အပါအဝင် ကျဆုံးခဲ့တဲ့ အပြစ်မဲ့ပြည်သူ အယောက် ၁၇၀ နီးပါးထိ မြင့်တက်နေခဲ့တာ ဖြစ်ပါတယ်။
၂၀၁၄ သန်းခေါင်စာရင်းအရ ပဇီကြီးကျေးရွာမှာ အိမ်ခြေ ၂၃၀ ကျော်ရှိပြီး လူဦးရေ ၁,၀၀၀ ကျော်နေထိုင်တဲ့ ကျေးရွာဖြစ်ပါတယ်။
စစ်ကောင်စီရဲ့ လေကြောင်းတိုက်ခိုက်မှုကြောင့် ပဇီကြီးရွာ အပါအဝင် အနီးနားက သာယာရွာ၊ လေးတွင်စဉ်ရွာ၊ မယ်ဇေတောရွာ၊ မလယ်ရွာ၊ ချောင်းမကြီးနဲ့ ခင်ဦးမြို့နယ်ဘက်ခြမ်းက ကျေးရွာက ဒေသခံတွေပါ ရွာထဲမှာ မနေရဲကြဘဲ ထွက်ပြေးနေကြတယ်လို့ ဒေသခံတွေက ပြောပါတယ်။ ဒါ့အပြင် ပဇီကြီးကျေးရွာမှာ ထိခိုက်ဒဏ်ရာရသူတွေကို ကုသဖို့ ဆရာဝန်နဲ့ ဆေးဝါးတွေ အရေးပေါ်လိုအပ်နေတယ်လို့လည်း ဆိုပါတယ်။
အာဏာသိမ်း အကြမ်းဖက်စစ်အုပ်စုကတော့ ၂ နှစ်ကျော်ကာလတွေအတွင်း ကလေးသူငယ်၊ ကိုယ်ဝန်ဆောင်အမျိုးသမီး၊ မသန်စွမ်းတွေပါမချန် အပြစ်မဲ့ပြည်သူတွေကို နိုင်ငံတဝန်း မြေပြင်ကရော လေကြောင်းကပါ အစုလိုက်အပြုံလိုက် ရာဇဝတ်မှုမြောက် ပစ်ခတ် သတ်ဖြတ်မှုတွေ ကျူးလွန်နေတာ ဖြစ်ပါတယ်။
NUG အစိုးရကတော့ ရာဇဝတ်ကောင် အကြမ်းဖက်စစ်ကောင်စီကို နိုင်ငံတကာက ထိရောက်တဲ့ အရေးယူမှုတွေ လုပ်ဆောင်နိုင်ဖို့ ဆက်လက်ကြိုးပမ်းနေတယ်လို့ ပြောကြားထားပါတယ်။
လတ်တလောမှာတော့ အကယ်ဒမီ မင်းမော်ကွန်း စီစဉ်တဲ့ “ကန့်ဘလူအကြွေး” ကမ်ပိန်း ကာလကို ၁၄ ရက်ပဲ သတ်မှတ်ထားတာမို့ ပြည်သူတွေအနေနဲ့ အမြန်ဆုံး ပူးပေါင်းပါဝင်ပေးကြဖို့ အလေးအနက် ဖိတ်ခေါ်ထားတာ ဖြစ်ပါတယ်။
တော်လှန်နယ်မြေတနေရာမှာ ဖွင့်လှစ်ထားတဲ့ “နွေဦးကျန်းမာ” ဆေးရုံမှာ လိုအပ်တဲ့ဆေးဝါးနဲ့ စက်ပစ္စည်း လိုအပ်ချက်တွေအတွက် “ကျန်းမာရှေ့ဆက် စစ်တပ်အမြစ်ဖြတ်” ကမ်ပိန်း ရက်သတ္တပတ် ၂ ပတ်ကျော်အကြာမှာ လက်မှတ်စောင်ရေ ၁,၄၂၀ ရောင်းချနိုင်ခဲ့ပြီးဖြစ်ကာ ပြည်သူတွေအနေနဲ့ ဆက်လက်ပါဝင်နိုင်ဖို့ နှိုးဆော်ထားပါတယ်။
နွေဦးကျန်းမာဆေးရုံကိုတော့ ဆေးတက္ကသိုလ် ၂၊ ရန်ကုန် ကျောင်းသားကော်မတီက ဦးဆောင်ကာ ပြီးခဲ့တဲ့ ၂၀၂၂ ခုနှစ်၊ ဇန်နဝါရီ ၄ ရက် လွတ်လပ်ရေးနေ့တုန်းက စေတနာ့ဝန်ထမ်း ဆရာ၊ ဆရာမတွေနဲ့ ဦးစီးဖွင့်လှစ်လိုက်တာဖြစ်ပြီး အတွင်းလူနာဌာန၊ ကလေးကုသဆောင်၊ ခွဲစိတ်ခန်းနဲ့ လူနာသယ်ယူပို့ဆောင်ရေး စနစ်တွေကို ပြင်ဆင်နေကာ လိုအပ်တဲ့ ဆေးဝါးနဲ့ စက်ပစ္စည်းတွေကိုလည်း တပ်ဆင်ထားတယ်လို့ ဆိုပါတယ်။
လတ်တလော လိုအပ်နေတဲ့ ဆေးဂိုဒေါင်ဖြည့်နိုင်ဖို့နဲ့ အရေးပေါ်စက်ပစ္စည်း ဝယ်ယူနိုင်ဖို့အတွက် “ကျန်းမာရှေ့ဆက် စစ်တပ်အမြစ်ဖြတ်” ကမ်ပိန်းကနေ ရန်ပုံငွေ ကျပ်သိန်း ၅၀၀ ရရှိနိုင်ဖို့ လျာထားပြီး လက်မှတ်တစောင်ကို မြန်မာငွေကျပ် ၂၀,၀၀၀ နဲ့ နိုင်ငံတကာ သတ်မှတ်ငွေကြေးတွေအလိုက် ရောင်းချသွားမှာဖြစ်ကာ ပထမဆု - iPhone 14၊ ဒုတိယဆု - အင်ဒိုနီးရှားနိုင်ငံ ဘာလီကျွန်းခရီးစဉ် ကံထူးရှင် ၂ ယောက် (တော်လှန်ရေးကာလအလွန်)၊ တတိယဆု - Lančome Beauty Box or Blue Label၊ စတုတ္ထဆု - Versace Eros 100 ml ဆုမဲတွေ အသီးသီး သတ်မှတ်ထားပါတယ်။
“စခများကို နိုင်စေချင်ရင် မကူပါနဲ့။ မြို့ပြက အဆင်ပြေတဲ့ဘဝတွေနဲ့ အလှမ်းဝေးတဲ့ အသက်တွေ လျစ်လျူရှုနိုင်တယ်ဆို မကူပါနဲ့။ အနာဂတ်နဲ့ အိပ်မက်တွေ မရှိစေတော့ချင်ရင် မကူပါနဲ့။ အပြစ်မဲ့တဲ့ အသက်တွေ၊ အကျဉ်းစံရဲဘော်ရဲဘက်တွေအတွက် တာဝန်ရှိတယ်လို့ မခံစားရရင် မကူပါနဲ့။ ဒီအတိုင်း အဆင်ပြေကြတယ်ဆို မကူပါနဲ့။ ၂၀,၀၀၀ ကျပ်နဲ့ အသက်တချောင်းကို ကူနိုင်ခဲ့တာ ဂုဏ်ယူကြလိုက်ပါ တော်လှန်အမျိုးတို့ ခင်ဗျာ။”
လက်ရှိကာလ မြန်မာနိုင်ငံမှာ စစ်ကောင်စီက မတရားအာဏာသိမ်းယူထားခဲ့တာ ၂ နှစ်ကျော် ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေး စောင့်ရှောက်မှုတွေမှာ အဘက်ဘက်က ကျဆင်းနေပါတယ်။
ဒါ့အပြင် စစ်ကောင်စီဟာ အာဏာဖီဆန်ရေးလှုပ်ရှားမှု (CDM) မှာ ဦးဆောင်ပါဝင်ခဲ့ကြတဲ့ ဆရာဝန်၊ သူနာပြု စတဲ့ ကျန်းမာရေးဝန်ထမ်းတွေ အပါအဝင် စစ်အာဏာသိမ်းမှုကို ဆန့်ကျင်တဲ့ ပြည်သူတွေကို လက်နက်အားကိုးဖြိုခွင်းမှုတွေ ဆက်တိုက်လုပ်ဆောင်နေတာ ဖြစ်ပါတယ်။
