ကရင်ပြည်နယ်၊ ဘားအံမြို့မ ရဲစခန်းကို မြို့ပြပြောက်ကျားတပ်ဖွဲ့က ဧပြီ ၁၂ ရက် ဒီနေ့ မနက်အစောပိုင်းက ဗုံးခွဲတိုက်ခိုက်ခဲ့ရာ ရဲ ၁ ဦး သေဆုံးသွားတယ်လို့ အဖွဲ့တာဝန်ရှိသူတဦးက ပြောပါတယ်။

ဧပြီ ၁၂ ရက်နေ့ မနက် ၅ နာရီ ၄၅ မိနစ်လောက်မှာ ဘားအံမြို့နယ်၊ အမှတ် ၂ ရပ်ကွက်ရှိ ဘားအံမြိုမရဲစခန်းကို မြို့ပြပြောက်ကျားတပ်ဖွဲ့က (HGF) အဖွဲ့က ဗုံးထောင်တိုက်ခိုက်ခဲ့ရာ စစ်ကောင်စီရဲတပ်ဖွဲ့က ဗုံးကိုဖြုတ်ဖို့ ကြိုးစားစဥ် ပေါက်ကွဲခဲ့ပြီး ရဲ ၁ ဦး သေဆုံးခဲ့တယ်လို့ ဆိုပါတယ်။

"အဲ့ရဲစခန်းက မူးယစ်ရမ်းကားပြီး ပြည်သူတွေကို ရိုင်းပျတာမျိုးတွေရှိတယ်” HGF တာဝန်ရှိသူက ပြောပါတယ်။ 

HGF အဖွဲ့အနေနဲ့ သင်္ကြန်ပွဲတော်ရက်အတွင်း အကြမ်းဖက် စစ်ကောင်စီတပ်ဖွဲ့ဝင်တွေနဲ့ ပူးပေါင်းအဖွဲ့တွေကို စစ်ရေးပစ်မှတ်ထားကာ အဓိကထားတိုက်ခိုက်သွားမှာဖြစ်တဲ့အတွက် ပြည်သူတွေအနေနဲ့ စစ်သား၊ ရဲတွေနဲ့ ပူးပေါင်းအဖွဲ့တွေ စခန်းချရာအနီးကကို မသွားကြဖို့  HPA AN GUERILLA FORCE - HGF အဖွဲ့က ထုတ်ပြန်ထားပါတယ်။ 

မတ်လ လဝက်လောက်ကစတင်ပြီး စစ်ကောင်စီတပ်က ဘားအံမြို့ သံလွင်တံတားကို လုံခြုံရေးတင်းကျပ်ပြီး လူငယ်တွေကို အဓိကထားစစ်ဆေး ငွေညှစ်နေတယ်လို့ သိရပါတယ်။

ဒီနေ့ ဧပြီ ၁၂ ရက်နေ့မှာပဲ စစ်ကောင်စီပြုလုပ်ထားတဲ့ ရေကစားမဏ္ဍပ် ၃ နေရာမှာ အသံဗုံး ပေါက်ကွဲခဲ့ပါသေးတယ်။

မဲဂနယ်ရွာ BGF စခန်းသိမ်းတိုက်ပွဲအတွင်း ကျားသစ်နက်စစ်ကြောင်းမှ ရဲဘော်နှစ်ဦး ကျဆုံးခဲ့တယ်လို့ ကျားသစ်နက်စစ်ကြောင်းက ဒီနေ့ ထုတ်ပြန်ထားပါတယ်။

မြဝတီမြို့ မဲဂနယ်ရွာမှာရှိတဲ့ စစ်ကောင်စီလက်အောက်ခံ နယ်ခြားစောင့်တပ်ဖွဲ့ (BGF) ရဲ့ သိန်းတန်ကုန်းစခန်းအား ဧပြီ ၁၁ ရက် ညနေက ကရင်အမျိုးသားလွတ်မြောက်ရေးတပ်မတော် (KNLA)၊ ကော်ဘရာစစ်ကြောင်းနဲ့ ကျားသစ်နက်စစ်ကြောင်းတို့ ပူးပေါင်း တိုက်ခိုက်သိမ်းယူနိုင်ခဲ့တယ်လို့ ဆိုပါတယ်။

တိုက်ပွဲအတွင်း ကျားသစ်နက်စစ်ကြောင်း တပ်ခွဲ ၂ မှ ရဲဘော် နှစ်ဦးကျဆုံးပြီး ၁ ဦး ဒဏ်ရာရရှိခဲ့တယ်လို့ ရဲဘော်တဦးက ပြောပါတယ်။

ကျဆုံးခဲ့တဲ့ ရဲဘော်နှစ်ဦးစလုံးဟာ တော်လှန်ရေးအပေါ်ခံယူချက်ပြင်းထန်တဲ့ လူငယ်တွေဖြစ်ပြီး တိုက်ပွဲတိုင်း ပါဝင်ခဲ့ကြကြောင်း၊ အခုလို ကျဆုံးသွားတဲ့အတွက် အလွန်နှမြောမိတယ်လို့ ဆိုပါတယ်။
တိုက်ပွဲအတွင်း BGF အဖွဲ့ဘက်မှ  ၁၀ ဦး သေဆုံးခဲ့ပြီး  MA-1 ၁ လက်၊ M4 ၃ လက်၊ AK ၁ လက်၊ M22 ၁ လက်၊ ကာဘိုင် ၁ လက်၊ 40 မမ ဗုံးပစ်လောင်ချာ ၁ လက်၊ တူမီး ၁ လက်၊ ရှေ့ထွက်မိုင်း ၂ လုံးနဲ့အတူ ကျည်အိမ်တွေ၊ ကျည်ဆန်တွေ သိမ်းဆည်းရရှိခဲ့တယ်လို့ သိရပါတယ်။

အဆိုပါတိုက်ပွဲအတွင်း မြင့်မြတ်စွာ အသက်‌ပေးလှူခဲ့ရတဲ့ ကျားသစ်နက်စစ်ကြောင်း တပ်ခွဲ ၂ မှ ရဲဘော် နှစ်ဦးအား ထာဝရ အမှတ်ရ ဂုဏ်ယူနေမယ်လို့ ကျားသစ်နက်စစ်ကြောင်းက ထုတ်ပြန်ထားပါတယ်။

ကရင်ပြည်နယ်၊ ဘားအံမြို့ရှိ သင်္ကြန်မဏ္ဍပ်ဆောက်ထားတဲ့ နေရာ ၃ နေရာမှာ  ဧပြီ ၁၂ ရက် ဒီနေ့ မနက် ၆ နာရီခွဲလောက်က အသံဗုံးပေါက်ကွဲမှုဖြစ်ပွားခဲ့တယ်လို့  မြို့ခံပြည်သူတွေဆီက သိရပါတယ်။

သင်္ကြန်အတွက်ပြင်ဆင်ထားတဲ့ ရေကစားမဏ္ဍပ်တွေဖြစ်တဲ့ ဘားအံ ဗဟိုမဏ္ဍပ်၊ တပ်မ ၂၂ ရှေ့ မဏ္ဍပ်၊ နာရီစင်ထောင့်မဏ္ဍပ်တွေမှာ အသံဗုံးပေါက်ကွဲခဲ့တာဖြစ်ပြီး လူထိခိုက်ဒဏ်ရာရရှိသူမရှိဘူးလို့ မြို့ခံတွေက ပြောပါတယ်။

စစ်အာဏာသိမ်းစစ်ကောင်စီက နိုင်ငံတကာကို သတင်းမှားတွေနဲ့ လိမ်ညာဖို့ကြိုးစားနေတာဖြစ်လို့ ပြည်သူတွေအနေနဲ့ ပူးပေါင်းမပါဝင်မိစေဖို့နဲ့ စစ်ကောင်စီကိုသတိပေးတဲ့အနေနဲ့ ပြုလုပ်တာဖြစ်နိုင်တယ်လို့ ဘားအံမြို့ခံပြည်သူတစ်ဦးက ပြောပါတယ်။

“တနိုင်ငံလုံးမှာ မျက်ရည်ကျနေတဲ့အချိန် စစ်ကောင်စီက လူစည်းကားတယ်ဆိုပြီး နိုင်ငံတကာစိတ်ဝင်စားအောင် လုပ်ဆောင်နေတာဖြစ်တယ်။ ပြည်သူတွေအနေနဲ့ စစ်ကောင်စီပြုလုပ်တဲ့ ပျော်ပွဲရွှင်ပွဲတွေမှာ မပါဝင်ကျဖို့ တော်လှန်ရေးအင်အားစုတွေကလည်း သတိပေးထားတာရှိတယ်။ ဒါကြောင့် ပြည်သူတွေအနေနဲ့လည်း ပူးပေါင်းမပါဝင်ကျဖို့နဲ့ စစ်ကောင်စီကို သတိပေးတဲ့အနေနဲ့ ပြုလုပ်တာဖြစ်နိုင်တယ်။”

ပြည်နယ်ရုံးစိုက်ရာ ဘားအံမြိုအပါအဝင် ရပ်ကွက်၊ ကျေးရွာ၊ မြို့နယ်၊ ခရိုင်လိုက် မဟာသင်္ကြန်ပွဲတော်ကို စည်းကားအောင်လုပ်ဆောင်ဖို့ ဖိအားပေးစေခိုင်းနေတဲ့အပြင် တစ်အိမ်ထောင်ကို ငွေ ၃၀၀၀ ကျပ်ဖိအားပေးလိုက်လံကောက်ခံခဲ့တယ် မြို့ခံပြည်သူတွေက ပြောပါတယ်။

ဘားအံမြို့မှာ ဗဟိုရေကစားမဏ္ဍပ်အပါအဝင် ဌာနဆိုင်ရာမဏ္ဍပ်နဲ့ ရပ်ကွက်အလိုက်မဏ္ဍပ်ပေါင်း ၂၀ ကျော်ရှိပြီး ဒီနှစ်မှာတော့ အမှတ် ၄ ရပ်ကွက် ဖားမဲတောင်ခြေအနီးမှာ လမ်းလျှောက်သကြင်္န်ပွဲတော်ကိုပါ ထည့်သွင်းကျင်းပဖို့ရှိတယ်လို့ မြို့ခံတွေဆီက သိရပါတယ်။

ကရင်ပြည်နယ်၊ ကြာအင်းဆိပ်ကြီးမြို့နယ်အတွင်းရှိ ကြားကာလ ပြည်သူ့အခြေပြုပညာရေးကျောင်းတွေအတွက် ကျောင်းသင်ရိုးညွှန်းတန်း (ကျောင်းသုံး) စာအုပ်တွေကို ရန်ကုန်အနောက်ပိုင်းနည်းပညာတက္ကသိုလ် ယာယီတက္ကသိုလ်ကောင်စီနဲ့ ကျောင်းသားများသမဂ္ဂတို့က ဧပြီ ၉ ရက်မှာ  သွားရောက်လှူဒါန်းခဲ့ပါတယ်။

ရန်ကုန်အနောက်ပိုင်းနည်းပညာတက္ကသိုလ် ယာယီတက္ကသိုလ်ကောင်စီနဲ့ ကျောင်းသားများသမဂ္ဂ တို့ကိုယ်စား ရဲဘောမြဖြိုးကိုက သွားရောက်လှူဒါန်းပေးခဲ့တာပါ။ 

လှူဒါန်းခဲ့တာနဲ့ပတ်သက်ပြီး WYTU ယာယီတက္ကသိုလ်ကောင်စီမှ တာဝန်ရှိသူ မခင်ဦးသန္တာက "ဖွင့်ထားတဲ့ကျောင်းက KG ကနေ G11၊ ကျောင်းသားဦးရေ ၃၀၀ နီးပါးရှိတယ်။ ထောက်ပံ့မှုကတော့ ကျောင်းသုံးပြဋ္ဌာန်းဘာသာစုံစာအုပ်တွေကို KG ကျောင်းသား ၁၀၀ ယောက် အတွက် လှူဒါန်းပေးခဲ့တာပါ" လို့ ပြောပါတယ်။

တော်လှန်ရေးခရီးအတွင်း ကျောင်းသားလူငယ်တွေ ပညာသင်ယူမှုအခွင့်အရေးကို မဆုံးရှုံးစေဖို့နဲ့ ပညာသင်ယူလိုစိတ် မပျောက်စေဖို့အတွက် ပညာရေးနဲ့သက်ဆိုင်တဲ့ လိုအပ်ချက်တွေကို ဖြည့်ဆည်းလှူဒါန်းပေးတာလို့ မခင်ဦးသန္တာက ပြောပါတယ်။ 

"တောင်ပိုင်းစစ်ဒေသ၊ စစ်ဒေသခွဲ အမှတ် ၃ အတွင်းမှာ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနနှင့် ပညာရေးဝန်ကြီးဌာနတို့ ပူးပေါင်းပြီး လူငယ်တွေရဲ့ ပညာသင်ယူနိုင်ရန် အခွင့်အလမ်းမဆုံးရှုံးစေရန်အတွက် တက္ကသိုလ်ဝင်တန်းစာမေးပွဲတွေနှင့် Home Based Learning Plan (နေအိမ်သင်ပညာရေး) တို့ကို အကောင်ထည်ဖော်ဆောင်ရွက်ခဲ့တာကိုလည်း တွေ့ရှိခဲ့ပါတယ်။ ကျောင်းသားသမဂ္ဂကလည်း ပညာသင်ယူနေသော ကျောင်းသားများအတွက် စိတ်အလုံခြုံမှုပေးနိုင်ဖို့ များစွာရရှိဖို့နဲ့ ကြားကာလ ပြည်သူ့အခြေပြုပညာရေးကျောင်းများကို ပညာရေးနဲ့ ပတ်သတ်ဆက်နွှယ်တဲ့ လုပ်ငန်းဆောင်တာများကို အကောင်အထည်ဖော်ရန်အတွက် အထောက်အပံ့များလည်း လိုအပ်နေတယ်။" 

စစ်အာဏာသိမ်း ၂ နှစ်ကျော်အတွင်းမှာ မြန်မာနိုင်ငံတဝန်းက ကျောင်းသားလူငယ်တွေရဲ့ အနာဂတ်တွေပျက်သုဥ်းခဲ့ရပြီး ပြီးခဲ့တဲ့ ၂၀၂၂ ခုနှစ်၊ စက်တင်ဘာ ၁၄ ရက်ကလည်း ကရင်ပြည်နယ်က ကျေးရွာတရွာမှာ ဖွင့်လှစ်ထားတဲ့ ကိုယ်ထူကိုယ်အထက်တန်းကျောင်းနဲ့ ကျေးရွာစာကြည့်တိုက်ဖြစ်မြောက်ရေးအတွက် ရန်ကုန်အနောက်ပိုင်းနည်းပညာတက္ကသိုလ် ကျောင်းသားများသမဂ္ဂ၊ စာပေချစ်မြတ်နိုးသူများနဲ့ MAEUSU LIBRARY တို့က  ပူးပေါင်းကာ စာကြည့်တိုက်အတွက် စာပေနဲ့ စာရေးကိရိယာတွေကို သွားရောက်လှူဒါန်းခဲ့ပါသေးတယ်။