တောင်ကိုရီးယား ကေပေါ့ပ်အဖွဲ့ ASTRO ရဲ့ အဖွဲ့ဝင်တဦးဖြစ်တဲ့ မွန်းဘင်ကို ဆိုးလ်မြို့ ဂန်နမ်ခရိုင်မှာရှိတဲ့ သူ့ရဲ့နေအိမ်မှာ သေဆုံးနေတာကို တွေ့ရှိခဲ့တယ်လို့ ယွန်ဟပ် တောင်ကိုရီးယားသတင်းမှာ ဖော်ပြပါတယ်။

မွန်းဘင်သေဆုံးနေတာကို  ဧပြီ ၁၉ ရက် ည ၈နာရီ ၁၀ မိနစ်လောက်မှာ သူ့ရဲ့မန်နေဂျာက ပထမဆုံး တွေ့ရှိခဲ့ပြီးတော့ ရဲကိုဖုန်းဆက် အကြောင်းကြားခဲ့တာဖြစ်ပါတယ်။

တောင်ကိုရီးယားရဲတပ်ဖွဲ့ရဲ့ တရားဝင်ထုတ်ပြန်ချက်အရ မွန်းဘင် သေဆုံးမှုဟာ မိမိကိုယ်ကိုယ် သတ်သေမှုလို့ ယူဆရပြီး ရဲတပ်ဖွဲ့အနေနဲ့ သေဆုံးရတဲ့ အကြောင်းရင်းကို အတိအကျ သိရှိနိုင်ဖို့ အလောင်းကို ခွဲစိတ်စစ်ဆေးဖို့ရှိတယ်လို့လည်း သိရပါတယ်။

ရဲတပ်ဖွဲ့ ပြောဆိုခွင့်ရှိသူတဦးက “မွန်းဘင်က သူ့ကိုယ်သူ သတ်သေသွားပုံရပါတယ်။ တကယ် သေဆုံးရတဲ့ အကြောင်းရင်းကို တိတိကျကျ သိရှိနိုင်ဖို့အတွက် လောလောဆယ် အလောင်းခွဲစိတ်မှု ပြုလုပ်နိုင်ဖို့ ဆွေးနွေးမှုတွေ လုပ်နေပါတယ်” လို့ ပြောပါတယ်။

သူ့ရဲ့အေဂျင်စီကလည်း ဒီဆုံးရှုံးမှုအတွက် မိသားစုနဲ့ထပ်တူ ဝမ်းနည်းကြောင်း ထုတ်ပြန်ခဲ့ပါတယ်။

မွန်းဘင်ဟာ သူ မကွယ်လွန်ခင်မှာ အခုနှစ်အတွင်း ပြုလုပ်မယ့် 2023 Dream Concert  မှာ ပါဝင်ဖို့ စီစဥ်ထားခဲ့ပြီး အဆိုပါဖျော်ဖြေပွဲကို လာမယ့် မေလ ၂၇ ရက်နေ့ တောင်ကိုရီးယားနိုင်ငံ ဘူဆန်မြို့ အားကစားကွင်းကြီးမှာ ကျင်းပဖို့ ရှိနေတာပါ။

မွန်းဘင်ဟာ မကြာခင်က ဖိလစ်ပိုင်နိုင်ငံကို သွားရောက်လည်ပတ်ခဲ့ပြီး စိတ်ပိုင်းဆိုင်ရာ ပြဿနာတချို့ ကြုံတွေ့နေရတယ်လို့လည်း သူနဲ့နီးစပ်တဲ့ အသိုင်းအဝိုင်းနဲ့ ပရိသတ်တွေက ဆိုပါတယ်။

မွန်းဘင်ပါဝင်နေတဲ့ ASTRO ကေပေါ့ပ်အဖွဲ့ကို  ၂၀၂၀ ပြည့်နှစ်မှာ ပထမဆုံး စတင်ဖွဲ့စည်းခဲ့ပြီး ASTRO ရဲ့ တခြားအဖွဲ့ဝင်တွေကတော့ ဆန်းဟ၊ အမ်ဂျေ၊ ဂျင်ဂျင်းနဲ့ ချာအန်ဝူးတို့ဖြစ်ကြပြီး  မွန်းဘင်နဲ့ ဆန်းဟဆိုတဲ့ အဖွဲ့ခွဲတခုလည်း ဖွဲ့စည်းထားပါသေးတယ်။

ASTRO အဖွဲ့ရဲ့ လူကြိုက်များ ရေပန်းစားတဲ့ သီချင်းတွေဖြစ်တဲ့ “Blue Flame”, “Candy Sugar Pop”, “Knock” နဲ့ “Crazy Sexy Cool” အပါအဝင် တခြားသီချင်းများစွာ ကျန်ရှိခဲ့ပြီး သူ့ရဲ့မိတ်ဆွေတွေ၊ ပရိသတ်တွေကတော့ သူ့အတွက် ဝမ်းနည်းနေကြပြီး များစွာ ပူဆွေးသောက ရောက်နေကြကြောင်း လူမှုကွန်ရက်တွေမှာ ဝေမျှပြောဆိုနေကြပါတယ်။

တောင်ကိုရီးယားနိုင်ငံက ဂရမ်မီဆုဆန်ကာတင်စာရင်းဝင် ကေပေါ့ပ်ဂီတအဖွဲ့တခုဖြစ်တဲ့ BTS အဖွဲ့ဝင်ဖြစ်သူ ဂျေဟုပ်ဟာ ဧပြီ ၁၈ ရက်မှာ စစ်မှုထမ်းဆောင်သွားပြီ ဖြစ်ပါတယ်။

တောင်ကိုရီးယားနိုင်ငံရဲ့ စစ်မှုမထမ်းမနေရ ဥပဒေအရ နောက်ထပ် BTS အဖွဲ့ဝင်ဖြစ်သူ ဂျင် ပြီးနောက် ဂျေဟုပ်က ဒုတိယမြောက် ဖြစ်လာခဲ့တာပါ။

ဆိုးလ်မြို့ကနေ ၅၄ မိုင်အကွာမှာရှိတဲ့ ဝန်ဂျူမြို့က စစ်မှုထမ်းအခမ်းအနား ကျင်းပရာနေရာကို ဂျေဟုပ်က ဗင်ကားတစီးနဲ့ တိတ်တဆိတ်သွားရောက်ခဲ့တယ်ဆိုပြီး ယွန်ဟပ် သတင်းအေဂျင်စီမှာ ဖော်ပြထားပါတယ်။

ဂျေဟုပ်ရဲ့ အမည်ရင်းဖြစ်တဲ့ ဂျွန်ဟိုဆော့က “ကျနော် ပြန်လာမှာပါ” ဆိုပြီး ခေါင်းတုံးဆံပင်ပေါက် ဓာတ်ပုံတပုံနဲ့အတူ ဧပြီ ၁၇ ရက်က ပရိသတ်တွေရှိရာ Weverse ဆက်သွယ်ရေးပလက်ဖောင်းမှာ ပို့စ်တင်ခဲ့ပါတယ်။

ဂျေဟုပ်ရဲ့ စစ်မှုထမ်းတာဝန်တွေ ပြီးဆုံးသွားတဲ့အခါ ကောင်းမွန်စွာ ပြန်လာခဲ့ပါဆိုပြီး ပရိသတ်တွေက မှတ်ချက်ပေါင်း ၁၀,၀၀၀ ကျော်နဲ့အတူ ဆုတောင်းပေးခဲ့ကြပါတယ်။

တောင်ကိုရီးယားနိုင်ငံမှာ အသက် ၁၈ နှစ်ကနေ ၂၈ နှစ်အတွင်းရှိ ကျန်းမာသန်စွမ်းတဲ့ အမျိုးသားအားလုံးဟာ ၁၈ လကနေ ၂၁ လအထိ စစ်မှုထမ်းဆောင်ရပါတယ်။

ကျန်ရှိခဲ့တဲ့ BTS အဖွဲ့ဝင် ဂျီမင်၊ ဗီနဲ့ ဂျောင်ကွတ်ခ် တို့ဟာလည်း လာမယ့် ၂၀၂၄ ခုနှစ်၊ ဇွန်လမှာ စစ်မှုထမ်းဆောင်သွားမှာ ဖြစ်ပါတယ်။