အခုရက်ပိုင်း မိုးသည်းထန်စွာ ရွာသွန်းနေတာကြောင့် ကေအိုင်အို ဌာနချုပ် လိုင်ဇာရှိ မုန်လိုင်ခက် ချောင်းရေကြီးနေပြီး ဩဂုတ်လ ၂၅ ရက်မနက်ပိုင်းမှာတော့ မြို့တွင်းလမ်းမတွေအထိ ရေတွေ ဝင်ရောက်နေတယ်လို့ ဒေသခံတွေဆီကသိရပါတယ်။
လိုင်ဇာ ဒေသခံ တစ်ဦးက “မိုးရွာနေတာ ကြာပြီ၊ ခါတိုင်းလည်း ဒီမုန်လိုင်ခက်ချောင်းက ကြီးနေကျပဲ၊ ဒီမနက်က ပိုကြီးလာတယ်၊ ရက်ကွက်တွင်းတချို့ လမ်းမပေါ်တွေထိ တောင်ကျချောင်းရေတွေ ကြီးနေဆဲဖြစ်တယ်” လို့ ပြောပါတယ်။
ဒီကနေ့မနက် တောင်ကျချောင်းရေ အရှိန်အဟုန်နဲ့ ကြီးလာတာကြောင့် ချောင်းတစ်ဖက်ကမ်းရှိ တရုတ်နယ်စပ်ခြံစည်းရိုးတွေ ချောင်းထဲမျောပါပျက်စီးသွားခဲ့တာရှိတယ်လို့ ဒေသခံတွေဆီက သိရပါတယ်။
ကချင်လွတ်မြောက်ရေးအဖွဲ့ (ကေအိုင်အို) ဌာနချုပ်ရှိရာ လိုင်ဇာမြို့ဘက်ကို ဩဂုတ် ၃ ရက် ည ၁၁ နာရီခွဲ လောက်ကစပြီး စစ်ကောင်စီတပ်က ပစ်လိုက်တဲ့ လက်နက်ကြီးကျည်တချို့ တရုတ်နိုင်ငံဘက်ခြမ်းကို ၂ ကြိမ်တိုင် ကျရောက်ပေါက်ကွဲခဲ့တယ်လို့ လိုင်ဇာမြို့ခံတစ်ဦးက ပြောပါတယ်။
လိုင်ဇာမြို့ရှိ ဒေသခံပြည်သူများနေထိုင်တဲ့ ရပ်ကွက်ဘက်ကို စစ်ကောင်စီတပ်ကတွေက လက်နက်ကြီးတွေနဲ့ ၆ ကြိမ် ပစ်ခတ်တိုက်ခိုက်ခဲ့ရာမှာ ၂ ကြိမ်က တရုတ်ပြည်ဘက်ခြမ်းကို ကျရောက် ပေါက်ကွဲသွားတယ်လို့ ဆိုပါတယ်။
ကချင်ပြည်နယ် ဝိုင်းမော်တိုက်ပွဲမှာ စစ်ကောင်စီတပ်တွေ အထိနာတာကြောင့် လိုင်ဇာကို လက်နက်ကြီးနဲ့ပစ်ခတ်တာဖြစ်နိုင်တယ်လို့ ဒေသခံတစ်ဦးက မှတ်ချက်ပြုပါတယ်။
မနေ့ညက ဝိုင်းမော်မြို့အခြေစိုက် စစ်ကောင်စီတပ်ရင်းအမှတ် ၅၈ ကို ကချင်လွတ်မြောက်ရေးတပ်မတော် (ကေအိုင်အေ)နဲ့ ပူးပေါင်းအဖွဲ့တွေက ဝင်ရောက်တိုက်ခိုက်ခဲ့တယ်လို့ ဒေသခံတွေက ပြောပါတယ်။
ဝိုင်းမော်မြို့အထွက် မဒိန်ကျေးရွာရှိ နယ်မြေခံ စစ်ကောင်စီ တပ်ရင်း ၅၈ မှာ လက်နက်ကြီးသံနဲ့ သေနတ်ပစ်သံတွေကို ည ၇ နာရီခွဲအချိန်လောက်ကစပြီး ည ၁၁ နာရီကျော်ဝန်းကျင်ထိ ဆက်တိုက်ကြားနေရကြောင်းနဲ့ နှစ်ရက်ဆက် တိုက်ပွဲဖြစ်ပွားခဲ့ရာမှာ မနေ့ညက တိုက်ပွဲပိုမိုပြင်းထန်ခဲ့တယ်လို့ အနီးအနားမှာ နေထိုင်တဲ့ ဒေသခံ တစ်ဦးက ဒီဗွီဘီကို ပြောပါတယ်။
“ပစ်တာက တနေကုန်ပဲ။ နေ့လယ်ကတည်းက လက်နက်ကြီးနဲ့ တစ်ချက် တစ်ချက် ရမ်းပစ်နေတာ ည ၇ နာရီ လောက်ကျတော့ပိုဆိုးလာတယ်။ အသံကလည်း ပိုကျယ်လာတယ်။ လက်နက်ကြီး လက်နက်ငယ်တွေရော မော်တာစက် သေနတ်သံတွေစုံနေတာပဲ။ မြစ်ကြီးနားကတောင်ကြားလို့ ဖုန်းလှမ်းဆက်လာကြတယ်။”
ည ၁၁ နာရီကျော် သန်းခေါင်အချိန်လောက်မှာတော့ စစ်ကောင်စီဘက်က စစ်ရဟတ်ယာဉ် ပျံဝဲခဲ့တာကြောင့် တိုက်ပွဲက ပိုမိုပြင်းထန်ခဲ့ကာ မြစ်ကြီးနားဘက်ကနေလည်း တင့်ကားနဲ့ အကြမ်းဖက်စစ်ကောင်စီတပ်ဖွဲ့၀င်တွေ တပ်ကူလာကြတယ်လို့ မျက်မြင်တွေ့ သူတွေကဆိုပါတယ်။
ည ၇ နာရီမှစတင်ခဲ့တဲ့ အဆိုပါပစ်ခတ်မှုတွေဟာ နောက်မနက် ၅ နာရီအထိ ဖြစ်ပွားခဲ့တာကြောင့် တိုက်ပွဲဖြစ်ပွားရာ အနီးနားက ပြည်သူတချို့ ထွက်ပြေးတိမ်းရှောင်ခဲ့ ရပါတယ်။
အဆိုပါတိုက်ပွဲကြောင့် ရွာအနီးနားအိမ်တွေမှာ လက်နက်ကြီးကျည် သေနတ်ကျည်တွေထိမှန်ခဲ့ကာ အိမ်မွေးတိရစ္ဆာန်တွေ သေဆုံး ထိခိုက်မှုရှိခဲ့ပေမဲ့ လူ သေဆုံးမှုသတင်းတော့ မကြားသိရသေးဘူးလို့ ဒေသခံတွေက ဆိုပါတယ်။
တိုက်ပွဲအတွင်း နှစ်ဘက် ထိခိုက် သေဆုံး ဒဏ်ရာရမှု အခြေအနေကိုတော့ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်၊
အဲဒီတပ်စခန်းကို ဇူလိုင် ၂၉ ရက်နေ့ညကလည်း ကေအိုင်အေဘက်က သွားရောက်ပစ်ခတ်တိုက်ခိုက်ခဲ့ရာမှာ စစ်ကောင်စီတပ်သား ၂ ဦး သေဆုံးခဲ့ပါတယ်။
ကချင်လွတ်မြောက်ရေးအဖွဲ့ (ကေအိုင်အို) ထိန်းချုပ်ရာနယ်မြေဌာနချုပ် လိုင်ဇာမှာ ကိုဗစ်-၁၉ အတည်ပြုလူနာ ၁ ဦး ပထမဆုံး စတင်သေဆုံးခဲ့တယ်လို့ တာ၀န်ရှိသူတွေဆီက သိရပါတယ်။
သေဆုံးသူမှာ လိုင်ဇာ ဝေကြိုင်ရက်ကွက်က အသက် ၄၂ နှစ်အရွယ် ဆီးချို သွေးတိုး ရောဂါအခံရှိတဲ့ အမျိုးသမီးဖြစ်ပါတယ်။ ဇူလိုင် ၂၉ ရက်က ပိုးစစ်ဆေးတွေ့ရှိပြီးနောက် မုန်လိုင်ခက် ကွာရန်တင်းစင်တာမှာ ပို့ဆောင်ကာ ကုသမှုပေးနေစဉ် သေဆုံးသွားခဲ့တာလို့ မိသားစုနဲ့ နီးစပ်သူတွေဆီက သိရပါတယ်။
ဩဂုတ် ၃ ရက်နေ့ မနက်ပိုင်းမှာ သေဆုံးခဲ့တာဖြစ်ပြီး ကေအိုင်ထိန်းချုပ်နယ်မြေအတွင်း ပိုးတွေ့အတည်ပြုလူနာတွေထဲ ပထမဆုံးအကြိမ် သေဆုံးခဲ့တာလို့ ကူညီပေးနေတဲ့ အရပ်ဘက် အဖွဲ့အစည်းတွေထံဆီက သိရပါတယ်။
ကေအိုင်အိုထိန်းချုပ်ရာ လိုင်ဇာမှာ ဩဂုတ် ၃ ရက်နေ့အထိ ပိုးတွေ့အတည်ပြုလူနာ ၃၂ ယောက်အထိရှိလာပြီး အများစုက ဝေကြိုင်နဲ့ မြို့ပေါ်ရက်ကွက် ၅ က ဖြစ်တယ်လို့ လိုင်ဇာမြို့ခံတွေက ဆိုပါတယ်။
ကချင်လွတ်မြောက်ရေးအဖွဲ့ ကေအိုင်အိေဌာနချုပ် လိုင်ဇာမှာ ကိုဗစ်-၁၉ အတည်ပြုလူနာ ဆက်လက်တွေ့ရှိနေသေးတာကြောင့် လော့ဒေါင်းကာလတိုးမြှင့်လိုက်တယ်လို့ ကချင်လွတ်မြောက်ရေးအဖွဲ့ (KIO) ဗဟိုကိုဗစ်ကာကွယ်ထိန်းချုပ်ရေး ကော်မတီက ဩဂုတ် ၂ ရက်နေ့မှာ ထုတ်ပြန်ပါတယ်။
ပြီးခဲ့တဲ့ ဇူလိုင်လ ၂၆ ရက်နေ့က စတင်ပြီး လိုင်ဇာအနီးရှိ ဝေကြိုင်နဲ့ ဂျေယန့် စစ်ရှောင်စခန်းတွေမှာ ပိုးတွေ့အတည်ပြုလူနာ စတင်တွေ့ရှိပြီးနောက် ဇူလိုင် ၂၇ ရက်နေ့ကစ ဌာနချုပ်လိုင်ဇာကို လော့ဒေါင်းချကာ ကျန်းမာရေးစစ်ဆေးမှုတွေကို သက်ဆိုင်ရာက အရှိန်အဟုန်မြှင့် လုပ်ဆောင်နေခဲ့တာဖြစ်ပါတယ်။
