ရန်ကုန်၊ ကြည့်မြင်တိုင်မြို့နယ်၊ ဟုမ်းလမ်းမှတ်တိုင်နဲ့ သဲကွင်းမှတ်တိုင်ကြားရှိ ကမ်းနားလမ်းမပေါ်မှာ မတ်လ ၁၉ ရက် ညနေပိုင်းက အသက် ၅၀ အရွယ် အမျိုးသားတစ်ဦးဟာ YBS ဘတ်စ်ကားရှေ့ကို ခေါင်းနဲ့ပြေးဝင်တိုက်ပြီး ကိုယ့်ကိုယ်ကိုယ် သေကြောင်းကြံစည်မှု ဖြစ်ပွားခဲ့တယ်လို့ မြို့ခံတွေဆီက သိရပါတယ်။
မနေ့ညနေ ၅ နာရီခွဲလောက်က YBS ၂၃ ယာဉ်ဟာ ကမ်းနားလမ်းအတိုင်း မောင်းလာချိန် ဟုမ်းလမ်းမှတ်တိုင်အနီးမှာ အဆိုပါ အမျိုးသားက ဘတ်စ်ကားဆီပြေးဝင်လာပြီး အတင်းဝင်တိုက်ခဲ့လို့ YBS ယာဉ်မောင်းက ကွေ့ရှောင်နိုင်ခဲ့လို့ အသက်မသေခဲ့ဘဲ ထိခိုက်ဒဏ်ရာရသွားတာဖြစ်ပါတယ်။
ကြည့်မြင်တိုင်အခြေစိုက် လူမှုကူညီရေးအသင်းဝင်က "ရပ်ကွက်က သတင်းပို့တာပါ၊ YBS တစ်စီးကလူကို တိုက်သွားတယ် ဆိုပြီး အကြောင်းကြားတာနဲ့ ကယ်ဆယ်ရေးလုပ်တာပါ။ အဲ့ဒီမှာ တစ်ယောက်က အဲဒီလူက ရှေ့မှာလည်း ကား ၃ ၊ ၄ စီးကို အခုလို လုပ်နေတာ ရှိတယ်၊ မသင်္ကာလို့ ဗွီဒီယိုလိုက်ရိုက်ထားတာလို့ ပြောတယ်၊ ကြည့်လိုက်တော့ သူက ကားအရှေ့ကို ဒိုက်ဗင်ဝင်ထိုးတဲ့ ပုံစံကြီး တွေ့ပါတယ်။ ခေါင်းက ဖူးပြီးတော့ သွေးနည်းနည်း ထွက်သွားတယ်၊ အိမ်လိပ်စာ မေးတာတောင် ၄ နေရာလောက် ပြောနေတယ်၊ ပြီးတော့ သူ့ကိုယ်သူ မသေသေးဘူးလားလို့ ပြောတယ် " လို့ ဆိုပါတယ်။
အဆိုပါအမျိုးသားဟာ ယာဉ်ရဲ့ ညာအရှေ့ဘက်နဲ့ ရိုက်မိတာကြောင့် ဘယ်နားထင် ဖူးရောင် ဒဏ်ရာ၊ ပေါက်ပြဲ ဒဏ်ရာရရှိခဲ့လို့ ရန်ကုန်ဆေးရုံကို ပို့ဆောင်ပေးခဲ့တယ်လို့ သိရပြီး အဲ့ဒီတစ်နေ့တည်း YBS ကား သုံးစီးခန့် ရှေ့ကို အခုလို ပြေးဝင်ခဲ့သေးတယ်လို့ သိရပါတယ်။
အဲ့ဒီအမျိုးသားရဲ့ နေရပ်လိပ်စာကို မေးမြန်းရာမှာ အတည်တကျ မဖြေတာကြောင့် မိသားစုဝင်တွေနဲ့ အဆက်အသွယ် မရသေးဘူးလို့ သိရပြီး ဘာကြောင့်ခုလိုလုပ်ရတာလဲဆိုတာ ကြည့်မြင်တိုင်ရဲစခန်းမှာ မေးမြန်းနေဆဲဖြစ်ပါတယ်။
ရန်ကုန်တိုင်း၊ ကြည့်မြင်တိုင်မြို့နယ်၊ ဆိပ်ကမ်းသာပန်းခြံနဲ့ ကျောက်တံတားသမ္ဗန်ဆိပ်မှာ မပေါက်ကွဲသေးတဲ့ လက်လုပ်ဗုံးနှစ်လုံးတွေ့ပြီး စစ်တပ်က ဖောက်ခွဲဖျက်ဆီးကာ လမ်းသွားလမ်းလာ လူငယ်တယောက်ကို ဖမ်းဆီးသွားတယ်လို့ မြို့ခံတွေဆီက သိရပါတယ်။
ဖေဖော်ဝါရီ ၂၃ ရက် ဒီနေ့မနက် ၈ နာရီက ကြည့်မြင်တိုင် ကျောက်တံတား သမ္ဗန်ဆိပ်အနီးမှာ မပေါက်ကွဲသေးတဲ့ လက်လုပ်ဗုံးတွေ့လို့ စစ်တပ်က အတားအဆီးတွေလုပ်ပြီး ဖောက်ခွဲခဲ့တယ်လို့ သမ္ဗန်ဆိပ်အနီးနေသူတဦးက ပြောပါတယ်။
“သမ္ဗန်ဆိပ်အဆင်းက ဆိုက်ကားဂိတ်နားမှာ တွေ့တာ၊ စစ်တပ်က အဲ့ဒီလက်လုပ်ဗုံးကို ယူပြီး ကမ်းနားလမ်းပေါ်မှာ ဖောက်ပစ်တယ်။ ညက ပန်းခြံမှာ ဗုံးတွေ့လို့ဆိုပြီး အလုပ်ကပြန်လာတဲ့ ကောင်လေးတယောက် ဖမ်းသွားတယ်။”
မနေ့ည ၈ နာရီကျော်ကလည်း ကြည့်မြင်တိုင်၊ အိုးဘိုရပ်ကွက်၊ ကမ်းနားလမ်းမပေါ်ရှိ ဆိပ်ကမ်းသာပန်းခြံအတွင်းမှာ ဗုံးတွေ့လို့ စစ်ကောင်စီတပ်က ဖောက်ခွဲပြီး လမ်းသွားလမ်းလာ လူငယ်တဦးကို ဖမ်းဆီးခဲ့တယ်လို့ အိုးဘိုရပ်ကွက်နေသူတဦးက ပြောပါတယ်။
“ညက စစ်တပ်က လက်လုပ်ဗုံးကိုခွဲပြီး လမ်းသွားလမ်းလာတွေကို စစ်ဆေးပြီး အလုပ်ကပြန်လာတဲ့ ကောင်လေးတယောက်ကို ဖမ်းသွားတယ်။ ရှင်းပြနေတာတောင် မရဘူး။ ကမ်းနားလမ်းမှာပဲ ဖမ်းသွားတာ။”
စစ်ကောင်စီတပ်က မပေါက်ကွဲသေးတဲ့ လက်လုပ်ဗုံး နှစ်ကြိမ်တွေ့ပြီးနောက် ကမ်းနားလမ်း၊ ဗားကရာလမ်းနဲ့ ကြည့်မြင်တိုင်ငါးစျေးဘက်တွေမှာ လုံခြုံရေးတွေ ချထားတယ်လို့ မြို့ခံတွေဆီက သိရပါတယ်။
ရန်ကုန်က မြို့နယ်တချို့မှာ ဖေဖော်ဝါရီ ၁ ရက်ကနေ ၂၃ ရက်အတွင်း ပစ်ခတ်မှုနဲ့ ဗုံးပေါက်ကွဲမှုတွေကြောင့် ၁၁ ဦး သေဆုံးခဲ့ပြီး ၈ ဦး ထိခိုက်ဒဏ်ရာ ရရှိခဲ့ပါတယ်။
